Երբ և ինչպես կգործարկվի Հայաստանում ԱԲ–ի մեգա-կենտրոնը. նախագծի համահիմնադրի պարզաբանումը
13:39 11.02.2026 (Թարմացված է: 13:40 11.02.2026)
Team հեռահաղորդակցական օպերատորի և «Firebird» տվյալների կենտրոնի համահիմնադիր Ալեքսանդր Եսայանը
© Sputnik / Aram Nersesyan
Բաժանորդագրվել
Հզորությունների զգալի մասն արդեն մշակված է արտասահմանից նախնական պատվերների համար։ Հետաքրքրություն կա նաև ներքին շուկայում. հայկական ստարտափերը սկսել են ավելի ակտիվ աշխատել արհեստական բանականության նախագծերի վրա։
ԵՐԵՎԱՆ, 11 փետրվարի – Sputnik. «Firebird» ընկերության տվյալների կենտրոնի առաջին մասը կգործարկվի այս մայիսի վերջին, երկրորդը՝ մինչև տարեվերջ։ Այս մասին Առաջատար տեխնոլոգիաների ձեռնարկությունների միության (UATE) տարեկան հավաքի շրջանակում Sputnik Արմենիային հայտնեց Team հեռահաղորդակցական օպերատորի և «Firebird» տվյալների կենտրոնի համահիմնադիր Ալեքսանդր Եսայանը։
«Nvidia» գրաֆիկական պրոցեսորների նոր խմբաքանակով (մատակարարման վերաբերյալ ձեռք բերված պայմանավորվածությունների մասին հայտարարել էր ԱՄՆ փոխնախագահ Ջեյմս Դեյվիդ Վենսը վերջերս Հայաստան կատարած իր այցի ժամանակ – խմբ.) նոր կենտրոնը, ամենայն հավանականությամբ, կդառնա ամենամեծը տարածաշրջանում, այդ թվում` Արևելյան Եվրոպայում, և հնարավոր է՝ նույնիսկ Պարսից ծոցի երկրներում։
«Արաբական Միացյալ Էմիրություններում ևս մեծ կենտրոն է կառուցվում։ Տեղյակ չեմ` որքանով է այն այժմ օգտագործվում։ Սակայն եթե մինչև տարեվերջ ամեն ինչ ընթանա մեր ծրագրերի համաձայն, և մենք շահագործման հանձնենք մեր նախատեսածը, ապա Հայաստանը գրաֆիկական պրոցեսորների քանակով կլինի աշխարհում երրորդը կամ չորրորդը մեկ շնչի հաշվով», – հավելեց Եսայանը։
Երկու փուլի ավարտից հետո տվյալների կենտրոնն ընդհանուր առմամբ կունենա մոտ 50 հազար Nvidia գրաֆիկական պրոցեսորներ՝ GB300 և P2000 մոդելների։
Նախնական պատվերներով` հիմնականում ԱՄՆ–ից, տվյալների կենտրոնի զգալի մասն արդեն իսկ մշակվել է։ Հայաստանում համագործակցության վերաբերյալ քննարկումներ է վարում բարձր տեխնոլոգիական արդյունաբերության նախարարությունը (հայաստանյան բուհերի և գիտական կենտրոնների համար հզորությունների մի մասն օգտագործելու համար)։
Եսայանը նշեց, որ ոգևորությունը մեծացել է նաև տեղական ՏՏ ընկերությունների և ստարտափերի շրջանում, որոնցից գնալով ավելի շատ հայտեր են ստացվում տվյալների կենտրոնն օգտագործելու համար։
«Նախկինում քչերն էին մտածում հսկայական տվյալների և արհեստական բանականության վրա հիմնված արտադրանք ստեղծելու մասին՝ հասկանալով, որ անհրաժեշտ հզորություններին հասանելիություն ստանալը շատ դժվար կլինի։ Այժմ, երբ հեռանկարներ են բացվել, նաև նախագծեր են հայտնվում», – հավելեց Եսայանը։
Հիշեցնենք, որ «Firebird» նախագիծն Ալեքսանդր Եսայանը հիմնադրել է Հայաստանից և սփյուռքից մի շարք այլ ՏՏ ձեռնարկատերերի հետ, իսկ նախագծի տեխնիկական գործընկերը դարձել է «Nvidia» ընկերությունը՝ փոխնախագահ Ռև Լեբարեդյանի ջանքերով։
Ավելի վաղ նշվել է, որ նախագծում ներդրումները պետք է մոտ 500 մլն դոլար կազմեն։
