ՀՀ ԿԲ նախագահի տեղակալի ստորագրությունը կեղծել են ու փորձել զեղծարարություն անել. Գալստյան
© Sputnik / Aram Nersesyan
Բաժանորդագրվել
ԿԲ նախագահը ֆինանսական զեղծարարությունից խուսափելու տարբերակ է առաջարկում։
ԵՐԵՎԱՆ, 4 նոյեմբերի – Sputnik. ՀՀ առևտրային բանկերում քաղաքացիների վարկային պորտֆելը հասնում է 7 տրիլիոնի, և շատ դժվար է կառավարել ու վերահսկել յուրաքանչյուր զեղծարարության դեպք։ Այդ մասին այսօր լրագրողների հետ հանդիպման ժամանակ ասաց ՀՀ կենտրոնական բանկի նախագահ Մարտին Գալստյանը։
ԿԲ նախագահը վստահեցրեց` աշխարհում չկա մի երկիր, որի բանկային համակարգում չլինեն զեղծարարություններ։
«Այս ուղղությամբ ԿԲ–ն պարբերաբար միջոցառումներ է ձեռնարկում։ Մեր նպատակն է, որ այդ դեպքերի քանակը հասցնենք նվազագույնի և հետո կարողանանք ինստիտուցիոնալ լուծումներ տալ»,– նշեց Գալստյանը։
Նա պատմեց, որ այսօր իրեն ցույց են տվել մի թուղթ, որի վրա կեղծել են իր տեղակալի ստորագրությունը։
«Իհարկե, նման ստորագրություն նա չունի, սակայն այդ թղթի վրա դրել էին սոցիալական ապահովության ինչ–որ հիմնադրամի կնիք, որպեսզի կարողանային ինչ–որ զեղծարարություն անել։ Սա ասում եմ, որ մեր քաղաքացիներն ամեն անգամ անվտանգության հիգիենայի կանոնները պահել։ Եթե զանգ են ստանում ֆինանսական ինչ–որ կառույցից, լինեն կասկածամիտ, միանգամից չվստահեն, անջատեն զանգը, հետ զանգեն։ Այսինքն` անպայման ինչ–որ քայլեր անեն համոզվելու համար, որ իրենք խոսում են այն մարդու հետ, ում հետ ուզում էին»,– ընդգծեց ԿԲ նախագահը։
Հիշեցնենք, որ օգոստոսի 5–ի մամուլի ասուլիսի ժամանակ ՀՀ ԿԲ նախագահի տեղակալ Արմեն Նուրբեկյանը հայտարարել էր, որ ԿԲ-ն զեղծարարությունների ռիսկերի կառավարման համակարգ է ներդնելու։
