Մահացել է ԱԱԾ պետի նախկին տեղակալ Հրանտ Եպիսկոպոսյանը
15:22 12.10.2025 (Թարմացված է: 20:27 12.10.2025)
© Photo : social media of Hrant Yepiskoposyan
Բաժանորդագրվել
Նա ընկել է սեփական ավտոմեքենայի տակ՝ ճանապարհին հայտնված ոզնուն հեռացնելու պատճառով։
ԵՐԵՎԱՆ, 12 հոկտեմբերի – Sputnik. Երևանի հիվանդանոցներից մեկում մահացել է Ազգային անվտանգության ծառայության պետի նախկին տեղակալ, գեներալ-լեյտենանտ Հրանտ Եպիսկոպոսյանը: Այս մասին հայտնում է shamshyan.com-ը։
Պարզվում է, որ նա հիվանդանոցում է եղել հոկտեմբերի 3-ից Երևան–Սևան ավտոճանապարհին տեղի ունեցած պատահարից հետո։
Ըստ ԶԼՄ-ների՝ նա այդ օրը ընկել էր սեփական ավտոմեքենայի տակ՝ ճանապարհին հայտնված ոզնուն հեռացնելու պատճառով։
«Ցանկանալով ոզնուն հեռացնել ճանապարհից, որպեսզի կենդանուն վրաերթի չենթարկեն, նա կանգնեցրել է իր վարած մեքենան ու իջել մեքենայից: Եպիսկոպոսյանը մոռացել է փոխանցման տուփը փոխադրել կայանման վրա, և մեքենան առաջ է ընթացել: Եպիսկոպոսյանը փորձել է բացել դուռը, որպեսզի կարողանա կանգնեցնել թափ հավաքող մեքենան: Մեքենայի թափից, սակայն, դուռը հարվածել, գետնին է գցել նրան, և վերջինս ընկել է սեփական մեքենայի տակ»,– գրված է կայքում։
Վրաերթի հետևանքով Եպիսկոպոսյանը գանգուղեղի կոտրվածք էր ստացել, նրա վիճակը ծանր էր:
Հավելենք, որ 2021-ի ապրիլի 15-ին Հրանտ Եպիսկոպոսյանը համախոհների հետ ձևավորել էր «ԱԱԾ պահեստազորի սպաների միություն» հասարակական կազմակերպությունը, որի խորհրդի նախագահն էր։
