Ծեծկռտուք Աբովյան քաղաքում. դանակահարել են ԱԱԾ նախկին աշխատակցի որդուն
© Sputnik / Andranik Ghazaryan
Բաժանորդագրվել
Վիրավորին հիվանդանոց է տեղափոխել հայրը։
ԵՐԵՎԱՆ, 9 հոկտեմբերի – Sputnik․ Կոտայքի մարզի Աբովյան քաղաքում ծեծկռտուք է եղել, որի հետևանքով 20 տարեկան երիտասարդ է դանակահարվել։ Տեղեկությունը հայտնում է shamshyan.com-ը:
Երիտասարդը տեղափոխվել է «Աբովյան» բժշկական կենտրոն: Բժիշկները ոստիկանությանը հայտնել են, որ վիրավորն իրենց մոտ է տեղափոխվել «դեմքի, կրծքավանդակի, որովայնի առաջնային պատերի կտրած-ծակած վերք» ախտորոշմամբ և ի վիճակի չէ կատարվածի մասին բացատրություն տալ, քանի որ գտնվում է վիրահատարանում:
«Ոստիկանները պարզել են, որ հոկտեմբերի 8-ին՝ ժամը 23:10-ի սահմաններում, անձնական հարցերի շուրջ վիճաբանություն է տեղի ունեցել հիվանդանոց տեղափոխված Շանթ Հ.-ի, Կոտայքի մարզի բնակիչներ 20-ամյա Հրաչյա Հ.-ի, 20-ամյա Լեռնիկ Ա.-ի, 16-ամյա Մինաս Գ.-ի, 19-ամյա Վարդգես Ս.-ի, 19-ամյա Ասատուր Խ.-ի, մյուս կողմից Կոտայքի մարզի բնակիչներ 17-ամյա Ամուր Ա.-ի, 20-ամյա Վիրաբ Ա.-ի, 17-ամյա Ռաֆիկ Ա.-ի, 17-ամյա Կարեն Ե.-ի և 16-ամյա Հայկ Կ.-ի միջև, կռվի մասնակից անձանցից մեկն իր մոտ եղած սուր կտրող-ծակող առարկայով հարվածել է Շանթ Հ.-ին»,– հայտնում է կայքը։
Շանթ Հ.-ին հիվանդանոց է տեղափոխել հայրը: Լրատվամիջոցի տեղեկություններով՝ նա Աբովյան քաղաքում հայտնի «Բոշ»-ի Հայկի տղան է: Հայկը նախկինում աշխատել է ՀՀ ազգային անվտանգության ծառայությունում։
Դեպքի փաստով նախաձեռնվել է քրեական վարույթ, քայլեր են ձեռնարկվում հանցագործություն կատարած անձանց և հանցագործության գործիք դանակը հայտնաբերելու ուղղությամբ:
