Ուղղորդում են դատաիրավական համակարգին. Աբրահամյանը` սրբազանի և մյուսների գործի մասին
16:18 10.09.2025 (Թարմացված է: 16:29 10.09.2025)
Բաժանորդագրվել
Պատգամավորի խոսքով` Փաշինյանն իր որդեգրած անբարոյական գիծը փորձելու է տանել մինչև վերջ։
ԵՐԵՎԱՆ, 10 սեպտեմբերի – Sputnik. Հայաստանում աննախադեպ ապօրինություն է տեղի ունենում, որտեղ քննիչներից, դատախազներից, իշխող քաղաքական թիմի ներկայացուցիչներից յուրաքանչյուրն ունի իր փայաբաժինը։ Բագրատ սրբազանի և մյուսների գործով դատական նիստից առաջ լրագրողների հետ ճեպազրույցում այս հայտարարությունն արեց ԱԺ «Պատիվ ունեմ» խմբակցության քարտուղար Տիգրան Աբրահամյանը։
«Չեմ էլ կասկածում, որ Փաշինյանն իր անբարոյական քաղաքական գիծը, որ դրել է և իրացնում է խորհրդարանում, կառավարությունում, դատական, դատախազական, քննչական և մնացած բոլոր համակարգերում, փորձելու է մինչև վերջ տանել և հասցնել այն հանգրվանային կետին, երբ որ արժեքային առումով կունենանք զրոյացում, քաղաքական դաշտը կլինի ամայացված, այսինքն՝ կա՛մ քաղաքական պրոցեսները կդադարեն, կա՛մ մարդիկ, որոնք ակտիվ պայքարում են, կհայտնվեն անազատության մեջ»,- ասաց Աբրահամյանը։
Նա անդրադարձավ նաև իշխանության ներկայացուցիչների կողմից պարբերաբար հնչեցվող «ահաբեկիչ» ձևակերպմանը՝ նշելով, որ ոչ միայն խախտվում է նրանց անմեղության կանխավարկածը, այլև այս ձևակերպումը կոնկրետ քաղաքական ուղղորդում և ճնշում է դատաիրավական համակարգի համար՝ որևէ դեպքում չշեղվել որդեգրած «կուրսից»։
Հիշեցնենք` ահաբեկչության ու իշխանությունը յուրացնելու փորձի գործով 18 մեղադրյալ կա, որոնցից մեկը Բագրատ սրբազանն է։
