Ովքե՞ր կլինեն ՔՊ վարչության նոր կազմում․ «Ժողովուրդ»
10:16 12.08.2025 (Թարմացված է: 10:18 12.08.2025)
© Photo : press office of the Civil Contract Party
Բաժանորդագրվել
Վարչության նոր կազմի ընտրություններն անցկացվելու են սեպտեմբերի 20-ին, ՔՊ-ականները հիմա ակտիվ քարոզարշավով են զբաղված։
ԵՐԵՎԱՆ, 12 օգոստոսի – Sputnik. «Քաղաքացիական պայմանագիր» կուսակցության վարչության կազմում փոփոխություններ են սպասվում։ Սեպտեմբերի 20-ին կայանալիք ընտրություննեում 42 ՔՊ-ական է առաջադրվել, որոնցից ընտրվելու են 20-ը»։ «Ժողովուրդ» օրաթերթը, հղում անելով իր աղբյուրներին, հրապարակել է ՔՊ վարչության հնարավոր կազմը։
«ՔՊ վարչության նոր կազմում կլինեն, բնականաբար, ՀՀ վարչապետ Նիկոլ Փաշինյանը, Երևանի քաղաքապետ Տիգրան Ավինյանը, ԱԺ նախագահ Ալեն Սիմոնյանը, ՀՀ ՊՆ նախարար Սուրեն Պապիկյանը, ՀՀ տարածքային կառավարման և ենթակառուցվածքների նախարար Դավիթ Խուդաթյանը, ՀՀ էկոնոմիկայի նախարար Գևորգ Պապոյանը, ՀՀ կառավարության աշխատակազմի ղեկավար Արայիկ Հարությունյանը, ՊՎԾ նախկին ղեկավար, ՀԷՑ կառավարիչ Ռոմանոս Պետրոսյանը, ԱԺ փոխնախագահ Ռուբեն Ռուբինյանը, ԱԺ ՔՊ խմբակցության ղեկավար Հայկ Կոնջորյանը, ՔՊ խմբակցության պատգամավորներ Վահագն Ալեքսանյանը, Հասմիկ Հակոբյանը, Ալխաս Ղազարյանը, Սոնա Ղազարյանը, Փաշինյանի ամենավստահելի մարդկանցից Արուսյակ Մանավազյանը, Նիկոլ Փաշինյանի մամուլի խոսնակ Նազելի Բաղդասարյանը և Տավուշի մարզպետ Հայկ Ղալումյանը, որը Փաշինյանի ընտանիքի քավորն է»,- գրում է թերթը:
Ըստ տեղեկությունների՝ հիմա ՔՊ-ականներն ակտիվ քարոզարշավ են իրականացնում, փակ հանդիպումներ ունենում կուսակցական ակտիվի հետ։
Հիշեցնենք, որ 2022 թվականի նոյեմբերին «Քաղաքացիական պայմանագրի» նոր վարչության ընտրություններից հետո սկանդալ ծագեց, ԶԼՄ-ները գրեցին, որ ընտրությունները կեղծվել են։ Վարչության խորհրդում ի սկզբանե չէին ընդգրկվել այնպիսի գործիչներ, ինչպիսիք են առողջապահության նախկին նախարար Արսեն Թորոսյանը, արտակարգ իրավիճակների նախարար Արմեն Փամբուխչյանը և այլն։ Մի քանի օր անց, սակայն, պարզվեց, որ թյուրիմացություն է տեղի ունեցել, ձայների վերահաշվարկ է կատարվել, որի արդյունքում վարչության կազմից դուրս են եկել փոխվարչապետ Համբարձում Մաթևոսյանը, ՔՊ խմբակցության ղեկավար Հայկ Կոնջորյանը, սակայն նրանց փոխարեն վարչության կազմում են Թորոսյանն ու Փամբուխչյանը։ Բացի այդ, Փաշինյանի օգտին ավելացվել է ևս 4 ձայն (սկզբում նա ուներ 941 ձայն, վերահաշվարկից հետո դարձավ 945):
