ԵԱՀԿ Մինսկի խմբի լուծարման գործընթացը մեկնարկել է
19:07 11.08.2025 (Թարմացված է: 19:12 11.08.2025)
© Sputnik / Andranik Ghazaryan
Բաժանորդագրվել
ԱՄՆ–ում ստորագրված հռչակագրի 2-րդ կետում նշված է, որ Հայաստանի և Ադրբեջանի արտաքին գործերի նախարարները ԵԱՀԿ Մինսկի գործընթացի և կից կառուցակարգերի լուծարման վերաբերյալ համատեղ դիմում են ստորագրել։
ԵՐԵՎԱՆ, 11 օգոստոսի – Sputnik. ԵԱՀԿ Մինսկի խմբի լուծարման գործընթացը մեկնարկել է։ Այս մասին հաղորդագրություն տարածել ՀՀ ԱԳՆ–ն։
Ինչպես հայտնել ենք, օգոստոսի 8–ին ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը Վաշինգտոնում ստորագրել են յոթ կետից բաղկացած համատեղ հռչակագիր, որը ամրագրում է կողմերի խաղաղության ձգտումը` առանց մանրամասները ներկայացնելու։ Փաստաթղթի տակ ստորագրություն է դրել նաև ԱՄՆ նախագահ Դոնալդ Թրամփը։ Հռչակագրի 2-րդ կետում նշված է, որ Հայաստանի և Ադրբեջանի արտաքին գործերի նախարարները Եվրոպայում անվտանգության և համագործակցության կազմակերպությանն (ԵԱՀԿ) ուղղված՝ ԵԱՀԿ Մինսկի գործընթացի և կից կառուցակարգերի լուծարման վերաբերյալ համատեղ դիմում են ստորագրել, երկրների ղեկավարները կոչ են անում ԵԱՀԿ բոլոր մասնակից պետություններին ընդունել այս որոշումը։
«Ըստ նախապես հայտարարված համաձայնության` այսօր ԵԱՀԿ մասնակից պետություններին շրջանառվել է ԵԱՀԿ Մինսկի գործընթացի և առնչվող կառույցների լուծարման վերաբերյալ համատեղ դիմումը և առաջարկվող համապատասխան որոշման նախագիծը»«–ասվում է ԱԳՆ հաղորդագրության մեջ:
Հիշեցնենք` Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովն էլ Հայաստանի, Ադրբեջանի և ԱՄՆ ղեկավարների ներկայությամբ Վաշինգտոնում նախաստորագրել են «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիր։
