Երևանի Մոսկվայի տանը բացվել է պատանի տաղանդների թատերական փառատոնը
© Sputnik / Aram Nersesyan
Բաժանորդագրվել
Փառատոնի շրջանակում հանդես են գալիս դպրոցական և բուհական թատերական ստուդիաների սաները, Երևանի Ստանիսլավսկու անվան ռուսական դրամատիկական թատրոնը:
ԵՐԵՎԱՆ, 8 ապրիլի - Sputnik. Երևանի Մոսկվայի տանը մեկնարկել է պատանի և երիտասարդ տաղանդների թատերական փառատոնը, որը կտևի երեք օր։ Այս մասին լրագրողներին ասաց հաստատության տնօրեն Հայկ Մելիքյանը։
Թատերական ստուդիաների մասնակիցների ելույթը Մոսկվայի տան համերգասրահի բեմում՝ մանկապատանեկան տաղանդների թատերական փառատոնի շրջանակներում
© Sputnik / Aram Nersesyan
Այսօր Մոսկվայի տան համերգասրահի բեմում հանդես կգան Երևանի դպրոցների և բուհերի թատերական ստուդիաների սաները: Փառատոնի շրջանակում իրենց գեղարվեստական հմտություններըկցուցադրեն մայրաքաղաքի տարբեր ուսումնական հաստատությունների սաները:
«Այսօր բացման օրն է, ելույթ են ունենում դպրոցական թատերական խմբերը։ Վաղը Ստանիսլավսկու անվան թատրոնի թատերախումբը հանդես կգա բեմադրությամբ, իսկ մյուս օրը կամփոփվեն արդյունքները, հայտնի դերասանների, օրինակ՝ Ռոբերտ Հակոբյանի մասնակցությամբ կանցկացվեն վարպետության դասեր», - ասաց Մելիքյանը։
Նա ընդգծեց, որ մասնակիցների հատուկ ընտրություն չի անցկացվել, ելույթ ունենալու հնարավորություն է տրվել բոլոր ցանկացողներին:
Տնօրենի խոսքով՝ մինչև տարեվերջ Մոսկվայի տանը նախատեսված է ևս մեկ միջոցառում, որը նվիրված է լինելու թատրոնի օրերին:
Մոսկվայի տանը կազմակերպված մանկապատանեկան տաղանդների թատերական փառատոնի ժյուրիի անդամները
© Sputnik / Aram Nersesyan
«Այս փառատոնով մենք ցանկանում ենք երիտասարդ խմբերին հնարավորություն տալ ինքնադրսևորվելու, զգալու բեմը, այցելելու Մոսկվայի տուն, հանդիպելու հայաստանցի հետաքրքիր արտիստների հետ։ Վստահ եմ, որ սա օգտակար կլինի և՛ մեր, և՛ նրանց համար»,- հավելեց նա։
Թատերական ստուդիաների մասնակիցների ելույթը Մոսկվայի տան համերգասրահի բեմում՝ մանկապատանեկան տաղանդների թատերական փառատոնի շրջանակներում
© Sputnik / Aram Nersesyan
Մելիքյանը կարևորեց նաև թատերական արվեստին աշակերտների ծանոթությունը:
Հիշեցնենք, որ ապրիլի 9-ին` ժամը 19:00-ին, տեղի կունենա Երևանի Ստանիսլավսկու անվան ռուսական դրամատիկական թատրոնի «Փղերի երկար ճանապարհը» ներկայացման ցուցադրությունը, որը բեմադրվում է իտալացի ժամանակակից դրամատուրգ Գասպարե Դորիի համանուն հոգեբանական դրամայի հիման վրա:
Թատերական ստուդիաների մասնակիցների ելույթը Մոսկվայի տան համերգասրահի բեմում՝ մանկապատանեկան տաղանդների թատերական փառատոնի շրջանակներում
© Sputnik / Aram Nersesyan
Փառատոնն անցկացվում է Մոսկվայի քաղաքապետարանի և Մոսկվայի Հայրենակցի տան աջակցությամբ:
Այն կեզրափակվի ապրիլի 10-ին՝ ժամը 19:00-ին, Երևանի «Մետրո» թատրոնին կից երիտասարդական ստուդիայի կողմից բեմադրված «Կարևորը, որ ձանձրալի չլինի» պլաստիկ դրամայի ցուցադրությամբ: Մեծ ծաղրածու Լեոնիդ Ենգիբարյանի ծննդյան 90-ամյակին նվիրված ներկայացումը հիմնված է նրա նովելների վրա:
