Թուրքիայում մարտի 21-ին տեղի ունեցած ցույցերի ժամանակ 350 մարդ է ձերբակալվել
15:21 22.03.2025 (Թարմացված է: 15:22 22.03.2025)
Թուրքիա
© AP Photo / Emrah Gurel
Բաժանորդագրվել
Թուրքիայի ներքին գործերի նախարարը հայտարարել է, որ որևէ մեկին թույլ չեն տա սպառնալ երկրի կայունությանը։
ԵՐԵՎԱՆ, 22 մարտի – Sputnik. Թուրքիայում մարտի 21-ին տեղի ունեցած ցույցերի ժամանակ շուրջ 350 մարդ է ձերբակալվել։ Ինչպես տեղեկացնում է ՌԻԱ Նովոստին, այս մասին հայտնել է երկրի ներքին գործերի նախարար Ալի Երլիկայան։
«Երեկ երեկոյան 343 կասկածյալ է ձերբակալվել Ստամբուլում, Անկարայում, Իզմիրում, Ադանայում, Անթալիայում, Չանաքքալեում, Էսքիշեհիրում, Քոնյայում և Էդիրնում բողոքի ակցիաների ժամանակ։ Նրանց, ովքեր ձգտում են խախտել հասարակական կարգը, սպառնում են մեր երկրի կայունությանն ու անվտանգությանը, ձգտում են անկարգությունների և սադրանքների, երբեք նման հնարավորություն չի տրվի», - ասել է Երլիկայան։
Հիշեցնենք, որ Թուրքիայում մարտի 19-ից զանգվածային բողոքի ակցիաներ են անցկացվում Ստամբուլի քաղաքապետ Էքրեմ Իմամօղլուի ձերբակալությունից հետո։
Թուրքիայի նախագահ Ռեջեփ Թայիփ Էրդողանը ընդդիմությանը մեղադրել է ոստիկանության և դատական համակարգի վրա ճնշում գործադրելու փորձերի մեջ՝ նշելով, որ կառավարությունը կենտրոնացած է երկրի հրատապ խնդիրների լուծման վրա:
Արդարադատության նախարար Յլմազ Թունչը նույնպես կոչ է արել զերծ մնալ փողոցային բողոքներից՝ ընդգծելով, որ Իմամօղլուի գործը Էրդողանի հետ կապ չունի:
Նախագահի աշխատակազմը հայտարարել է, որ պետության ղեկավարի հասցեին հնչող մեղադրանքները զրպարտություն են:
Իմամօղլուն Էրդողանի հիմնական մրցակիցն է համարվում հնարավոր արտահերթ ընտրություններում։
