Միջազգային մարդասիրական իրավունքը պարտվել է ԼՂ–ում. Ալեն Սիմոնյանը` Նիլս Ուշակովսին
11:52 25.02.2025 (Թարմացված է: 12:13 25.02.2025)
Ալեն Սիմոնյանն ընդունել է Նիլս Ուշակովսի գլխավորած պատվիրակությանը
Բաժանորդագրվել
ԱԺ նախագահը շնորհակալություն հայտնեց ԵԽ այն պատգամավորներին, որոնք տարբեր զեկույցներում դատապարտել են Լեռնային Ղարաբաղում Ադրբեջանի կողմից սանձազերծված կործանարար պատերազմը, գերիների խնդիրները և այլն։
ԵՐԵՎԱՆ, 25 փետրվարի – Sputnik. Միջազգային մարդասիրական իրավունքը պարտվել է Լեռնային Ղարաբաղում։ Այս մասին Հայաստան–ԵՄ խորհրդարանական գործընկերության կոմիտեի 4–րդ նիստի ժամանակ ասաց ՀՀ ԱԺ նախագահ Ալեն Սիմոնյանին` դիմելով կոմիտեի համանախագահ Նիլս Ուշակովսին։
«Շնորհակալ եմ ԵԽ այն բոլոր պատգամավորներին, որոնք այս տարիների ընթացքում հետևել են տարածաշրջանում տեղի ունեցող գործընթացներին, ՀՀ–ի առջև ծառացած մարտահրավերներին, ականջալուր են եղել մեր ահազանգերին։ Շնորհակալ եմ նաև, որ ԵԽ–ի ընդունած զեկույցներում դատապարտվել են Լեռնային Ղարաբաղում Ադրբեջանի կողմից սանձազերծված կործանարար պատերազմը, 100 000–ից ավելի հայերի բռնի տեղահանումը, ՀՀ ինքնիշխան տարածքի բռնազավթումը, մարդու իրավունքների կոպտագույն խախտումները, Ադրբեջանում պահվող գերիների փաստը, հայկական մշակութային և կրոնական ժառանգության հանդեպ իրականացված վանդալիզմը։ Ցավոք, այդ բոլոր արձագանքները բավարար չեղան ու Միջազգային մարդասիրական իրավունքը պարտվել է Լեռնային Ղարաբաղում»,– նշեց ԱԺ նախագահը։
Սիմոնյանը նաև վստահություն հայտնեց, որ առաջիկայում ավելի սերտ և արդյունավետ համագործակցություն կլինի, քանի որ առկա է քաղաքական ամուր կամք։
Հիշեցնենք` ՀՀ ներքին գործերի նախարարության միգրացիայի և քաղաքացիության ծառայության տվյալներով՝ 2023 թվականի սեպտեմբերից հետո Արցախից 115 365 մարդ է բռնի տեղահանվել։
