Խրախուսել ներդրումները գիտության և ՏՏ ոլորտներում. Պապոյանը հանդիպել է ռուս գործընկերոջը
16:09 08.07.2024 (Թարմացված է: 16:11 08.07.2024)
© Photo : press office of the Ministry of Economy of RAԳևորգ Պապոյանն ու ՌԴ արդյունաբերության և առևտրի նախարար Անտոն Ալիխանովը հանդիպել են
![Գևորգ Պապոյանն ու ՌԴ արդյունաբերության և առևտրի նախարար Անտոն Ալիխանովը հանդիպել են Գևորգ Պապոյանն ու ՌԴ արդյունաբերության և առևտրի նախարար Անտոն Ալիխանովը հանդիպել են - Sputnik Արմենիա, 1920, 08.07.2024](https://cdn.am.sputniknews.ru/img/07e8/07/08/78117711_0:67:1280:787_1920x0_80_0_0_ff110a0c4d04eecac23ca3b673547721.jpg)
Գևորգ Պապոյանն ու ՌԴ արդյունաբերության և առևտրի նախարար Անտոն Ալիխանովը հանդիպել են
© Photo : press office of the Ministry of Economy of RA
Բաժանորդագրվել
ՀՀ էկոնոմիկայի նախարարն ասել է, որ անհրաժեշտ է բարենպաստ միջավայր ստեղծել նորաստեղծ ձեռնարկությունների և փոքր բիզնեսի զարգացման համար։
ԵՐԵՎԱՆ, 8 հուլիսի – Sputnik. ՀՀ էկոնոմիկայի նախարար Գևորգ Պապոյանն ու ՌԴ արդյունաբերության և առևտրի նախարար Անտոն Ալիխանովը քննարկել են արտահանման և ներմուծման նոր ուղիներ գտնելու հնարավորությունը։ Տեղեկությունը հայտնում է ՀՀ էկոնոմիկայի նախարարության մամուլի ծառայությունը։
Նշենք, որ Պապոյանը Եկատերինբուրգ է մեկնել «Իննոպրոմ» միջազգային արդյունաբերական ցուցահանդեսի շրջանակում Եվրասիական տնտեսական միության արդյունաբերական քաղաքականության խորհրդի 6–րդ նիստին մասնակցելու համար։ Ալիխանովի հետ հանդիպումը կայացել է այդ ցուցահանդեսի շրջանակում։
«Այսօր մենք իրական հնարավորություն ունենք քննարկելու մեր հարաբերությունները, համագործակցությունը և մեր երկրների զարգացման հեռանկարները տնտեսության և արդյունաբերության ոլորտում։ Ռուսաստանը Հայաստանի հիմնական առևտրային գործընկերներից մեկն է, որն ապահովում է ապրանքների ներմուծման և արտահանման զգալի մասը։ Մենք տեսնում ենք, որ թվայնացումը, նորարարական տեխնոլոգիաները և կայուն արտադրությունը դառնում են ապագա արդյունաբերական զարգացման հիմքը։ Մենք պետք է խրախուսենք ներդրումները գիտության և տեխնոլոգիաների մեջ»,– ասել է Պապոյանը։
Նա նշել է, որ անհրաժեշտ է ստեղծել բարենպաստ միջավայր նորաստեղծ ձեռնարկությունների և փոքր բիզնեսի զարգացման համար՝ ապահովելու երկրի տնտեսությունների կայուն աճը։
Հանդիպման ընթացքում կողմերը քննարկել են նաև ապրանքաշրջանառության, արդյունաբերական նախագծերի համատեղ իրականացման և դեղագործական ոլորտին վերաբերող մի շարք հարցեր։
Անդրադարձ է կատարվել նաև «Ռուսալ Արմենալ» ՓԲԸ-ի և «Ալյանս» ազատ տնտեսական գոտու գործունեությանը և հետագա աշխատանքները շարունակելուն։
Պապոյանը ներկայացրել է նաև ՀՀ կառավարության «Խաղաղության խաչմերուկ» նախաձեռնությունը, որը կնպաստի տարածաշրջանում քաղաքական կայունության և տնտեսական զարգացման խթանմանը։
Հանդիպմանը մասնակցել են նաև ՀՀ էկոնոմիկայի նախարարի տեղակալ Նարեկ Տերյանն ու ՌԴ արդյունաբերության և առևտրի նախարարի տեղակալ Ալեքսեյ Գրուզդևը։