Ճամփորդություն գիտելիքի հետևից. ռուսական մշակույթի բնօրրանից դեպի հայկական դպրոցներ
18:18 25.06.2024 (Թարմացված է: 18:20 25.06.2024)
Հայաստանում ռուսաց լեզու դասավանդող ուսուցիչները վերապատրաստում են անցնում Սանկտ Պետերբուրգում
© Photo : Альфа-Диалог | Образовательный центр
Բաժանորդագրվել
Հայաստանում ռուսաց լեզու դասավանդող ուսուցիչները վերապատրաստում են անցնում Սանկտ Պետերբուրգում։
ԵՐԵՎԱՆ, 25 հունիսի – Sputnik. Հայաստանյան դպրոցների և բուհերի տասներկու մանկավարժներ՝ երիտասարդ մասնագետներից մինչև 30 տարվա փորձ ունեցող ուսուցիչներ, Սանկտ Պետերբուրգում ուսումնասիրում են ռուսաց լեզվի դասավանդման ժամանակակից մեթոդները:
«Ուսուցչի համար կարևոր է թարմացնել գիտելիքները ոչ միայն առարկայի առումով, այլև մշակութային կյանքին հաղորդակից լինելու միջոցով։ Առաջին իսկ օրը գործընկերները հրավիրվեցին Միխայլովսկի թատրոն ՝ «Ռոմեո և Ջուլիետ» բալետին։ Այսինքն՝ ծանոթացան բեմում գրական տեքստի մեկնաբանման փորձին։ Նախատեսվում է ծանոթանալ քաղաքի պատմական կենտրոնին, զբոսնել Նևայի ափերին»,-ասում է «Ալֆա-Դիալոգ» լրացուցիչ մասնագիտական կրթության կենտրոնի տնօրեն Ելենա Յադրովսկայան:
Հայաստանում ռուսաց լեզու դասավանդող ուսուցիչները վերապատրաստում են անցնում Սանկտ Պետերբուրգում
© Photo : Альфа-Диалог | Образовательный центр
Յադրովսկայայի ղեկավարած կազմակերպությունն արդեն երրորդ տարին է, ինչ ստաժավորում է կազմակերպում հայաստանցի դասախոսների համար Սանկտ Պետերբուրգում: Մանկավարժական գիտությունների դոկտոր, Ռուսաստանի Ա.Ի․ Գերցենի անվան պետական մանկավարժական համալսարանի կրթական տեխնոլոգիաների և բանասիրության ամբիոնի պրոֆեսոր Յադրովսկայան կարծում է, որ Հայաստանի և Ռուսաստանի ուսուցիչների միջև շփումները հատկապես կարևոր են տուրբուլենտության և գլոբալ փոխակերպումների դարաշրջանում:
Ծրագրի շրջանակում վերապատրաստում անցնող մասնագետները ծանոթանում են, թե ինչպես է համացանցի օգտագործման մշակույթն ազդում ուսման վրա, սովորում են ճիշտ ներկայացնել գեղարվեստական տեքստերը և աշխատել այն աշակերտների հետ, որոնք միայն փոքր ծավալի տեքստ կարող են ընկալել։ Դիտարկվում են նաև ռուսերենի քերականության ամենաբարդ հարցերը։
Հայաստանում ռուսաց լեզու դասավանդող ուսուցիչները վերապատրաստում են անցնում Սանկտ Պետերբուրգում
© Photo : Альфа-Диалог | Образовательный центр
Ռուսերենը որպես օտար լեզու դասավանդելու դասերին ներգրավված են Սանկտ Պետերբուրգի լավագույն ուսուցիչները։ Նրանք ռուս բանասիրության բարձր որակավորում ունեցող մասնագետներ են, տվյալ ոլորտի փորձագետներ, գիտությունների դոկտորներ և թեկնածուներ: Հայաստանցի մասնակիցները կծանոթանան նաև նախագծային գործունեության և դաստիարակչական աշխատանքի փորձին:
«Ռուս-հայկական կապերի պահպանումը՝ մշակութային և մարդկային, շատ կարևոր է անկայունության դարաշրջանում։ Հատկապես կարևոր են նույն լեզվով խոսող և նույն առարկան դասավանդող ուսուցիչների միջև կապերը։ Հայաստանը մեզ համար ջերմ վերաբերմունքի և բարեկամության խորհրդանիշ է։ Մենք ապրում և աշխատում ենք ընդհանուր հոգևոր դաշտում: Մեր ծրագիրը հոգով և մասնագիտությամբ հոգեհարազատ մարդկանց հանդիպում է»,- ընդգծում է Յադրովսկայան։
Ծրագիրը ներառում է վարպետության դասեր Սանկտ Պետերբուրգի լավագույն վարժարաններից մեկում՝ թիվ 59 վարժարանում, և թիվ 259 հայկական դպրոցում: Հայաստանցի մանկավարժները կայցելեն նաև հայկական եկեղեցուն կից Լազարյաների անվան ուսումնադաստիարակչական կենտրոն և կծանոթանան հոգևոր-բարոյական դաստիարակության աշխատանքներին: Պուշկինի ծննդյան 225-ամյակի կապակցությամբ նախատեսվում է այցելություն նրա տուն-թանգարան:
Յադրովսկայայի խոսքով` «Ալֆա-Դիալոգ» կենտրոնում «Ժամանակակից ռուսաց լեզու և ռուսաց լեզուն որպես օտար լեզու դասավանդման մեթոդիկա» խորացված դասընթացի շրջանակում ռուսաց լեզվի ուսուցիչների վերապատրաստումն իրականացվում է Երևանի «Մոսկվայի տան» նախկին տնօրեն Վահրամ Կարապետյանի նախաձեռնությամբ, Ռոսսոտրուդնիչեստվոյի և «Կոնցեռն Ռոսէներգոատոմ» ԲԸ-ի աջակցությամբ, որոնք էլ հատկացրել են անհրաժեշտ ֆինանսական միջոցները, ներառյալ հուլիսի վերջին Երևանում ռուսաց լեզվի վերաբերյալ սեմինարի անցկացումը:
