ՀՀ ԶՈւ բարձրաստիճան սպայակազմը կանգնում է տարբեր երանգների հանդերձանքով. Գեղամ Մանուկյան
15:53 11.04.2024 (Թարմացված է: 15:56 11.04.2024)
Գեղամ Մանուկյանն ԱԺ–ում. Արխիվային լուսանկար
© Sputnik / Asatur Yesayants
Բաժանորդագրվել
Պատգամավորը մի շարք հարցերի շուրջ քննադատության ենթարկեց ՀՀ ՊՆ-ին։
ԵՐԵՎԱՆ, 11 ապրիլի – Sputnik. ԱԺ «Հայաստան» խմբակցության պատգամավոր Գեղամ Մանուկյանը, ելույթ ունենալով Ազգային ժողովում, հայտարարեց, որ ՀՀ պաշտպանության նախարարությունը չի կարողանում ապահովել նոր համազգեստի արտադրությունը՝ չնայած նախարար Սուրեն Պապիկյանի խոստումներին:
«Դուք պաշտոնապես հայտարարել եք, որ 2024 թ. նոր համազգեստ է լինելու և ոչինչ չեք արել։ ՀՀ ԶՈւ բարձրաստիճան սպայակազմը կանգնում է տարբեր երանգների հանդերձանքով։ Մի ժամանակ Անդրանիկ Քոչարյանը Դավիթ Տոնոյանին էր ասում ձկնորսական շորերով, հիմա կեսը որսորդական շորերով են»,– հայտարարեց պատգամավորը։
Նա նաև քննադատեց պաշտպանության նախարարությանը մի շարք այլ խնդիրների համար, որոնց ականատեսն են եղել, երբ այցելել են առաջնագիծ։ Խոսքը մասնավորապես վերաբերում է առաջնագծում կառուցվող ինժեներական կառույցներին:
«Եթե շինարարական ընկերությունները չեն ցանկանում մասնակցել ձեր մրցույթներին, լուծեք այդ հարցը։ Դա ձեր պարտականությունն է»,– նշեց Մանուկյանը։
Բացի այդ, ըստ նրա, զինված ուժերում ատեստավորում է անցել քննություն անցած զինվորականների միայն 40 տոկոսը։
Պատգամավորը նաև նշեց, որ շատ ցածր տոկոս են կազմում ատեստավորումը հաջողությամբ անցած զինվորականները. մինչ այժմ ատեստավորմանը մասնակցել է շուրջ 5800 մարդ, նրանցից միայն 2573-ն է դրական գնահատական ստացել: «Հայրենիքի պաշտպան» ծրագրով քննություն հանձնած 155 զինծառայողներից ատեստավորում Է անցել ընդամենը երեքը:
Ծրագրում ասվում է, որ 2023 թ. մշակվել և հաստատվել են պաշտպանության ոլորտի կարևորագույն մի շարք փաստաթղթեր՝ 2023-2027 թթ. ԶՈւ զարգացման և կիրառման պլանը, սպառազինությունների, զինտեխնիկայի պետական ծրագիրը:
«ԶՈւ կիրառման պլանն ամբողջ բանակի գործունեությունն է ցանկացած իրավիճակում: Անվտանգության խորհրդով հաստատել են, բայց գլխավոր շտաբի պետին ու պաշտպանության նախարարին, երբ հարցնում եմ ՀՀ ԶՈւ զորամիավորումներից մեկի վրա ինչ–որ մի դեպքի մասին, ասում է` այս պլանով այլ բան էր նախատեսված, բան չենք արել, որ լայնածավալ պատերազմ չլինի: Այսինքն, օրինակ, Տավուշի 3–րդ բանակային կորպուսի վրա որ հարձակում լինի, 2-րդ բանակային կորպուսն ասելու է, քանի որ լայնածավալ պատերազմ է լինելու, եկեք 3–րդ բանակային կորպուսին միայնակ թողնենք: Սա է ամբողջ ՀՀ զինված ուժերի ռազմավարությունը»,– ընդգծեց Մանուկյանը:
Նրա խոսքով` 2021 թ. ՀՀ կառավարությունը խոստանում էր անցում կատարել արհեստավարժ բանակի, փոխել ժամկետային և զորահավաքային զինծառայության կառուցվածքը, սակայն այսօր պրոֆեսիոնալ բանակը չկա, բայց ու զորահավաքային ծառայության կառուցվածքը փոխվել է՝ սկզբից եռամսյա, հետո 25–օրյա վարժական հավաքներ:
