Փաշինյանը նպատակ ունի ՊՊԾ–ն դարձնել պետական անվտանգությունն ապահովող հատուկ ծառայություն
20:34 07.03.2024 (Թարմացված է: 20:38 07.03.2024)
Բաժանորդագրվել
ՀՀ վարչապետը ՊՊԾ ծառայողներին է ներկայացրել նորանշանակ պետ Արթուր Գասպարյանին ու խոսել ծառայության զարգացման, ինչպես նաև առաջիկա անելիքների մասին։
ԵՐԵՎԱՆ, 7 մարտի – Sputnik. ՀՀ վարչապետ Նիկոլ Փաշինյանը նպատակ ունի ՊՊԾ–ն զարգացնել է դարձնել պետական անվտանգությունն ապահովող հատուկ ծառայություն։ Այս մասին նա հայտնել է Պետական պահպանության նորանշանակ պետ Արթուր Գասպարյանին ծառայության աշխատողներին ներկայացնելու ժամանակ, հայտնում է ՀՀ վարչապետի մամուլի ծառայությունը։
ՀՀ վարչապետ Նիկոլ Փաշինյանը Պետական պահպանության նորանշանակ պետ Արթուր Գասպարյանին ներկայացնում է ծառայության աշխատողներին
Փաշինյանն ընդգծել է, որ 2023 թ–ն ծառայության համար շրջադարձային էր, քանի որ այն ԱԱԾ ենթակա մարմնից ստացավ վարչապետին ենթակա մարմնի կարգավիճակ։
«Առաջին օրից, քայլ–քայլ տարբեր կարգավիճակների ձեռքբերումով ՊՊԾ–ն զարգացել է։ Դա առաջին քայլն է կամ ավելի ճիշտ՝ երկար ճանապարհի սկիզբն է, որովհետև հույս ունենք, որ Պետական պահպանության ծառայությունը կկարողանա զարգանալ և դառնալ պետական անվտանգություն ապահովող գործունակ հատուկ ծառայություն: Ակնայտ է, որ դա մի օրում հնարավոր չէ անել, ոչ էլ երկու օրում, մեզ պետք է հստակ պատկերացում ունենալ, հստակ պլան, թե ինչպես ենք դա իրականացնելու։ Այդ ծրագիրն առնվազն ձևավորման փուլում է, պատկերացումները հիմնականում ձևավորված են»,– նշել է վարչապետը։
Նա ընդգծել է, որ անկախ ամեն ինչից, համոզված է որոշման ճիշտ լինելու մեջ։
Արթուր Հովհաննիսյանն էլ շնորհակալություն է հայտնել իրեն վստահելու համար ու վստահեցրել է` ծառայությունը մեծ պատվով կկատարի։
Հիշեցնենք` Գասպարյանն այս պաշտոնում նշանակվել էր մարտի 4–ին։
ՊՊԾ նախկին պետ Սարգիս Հովհաննիսյանին ՀՀ վարչապետը պաշտոնից ազատել էր 2023–ի սեպտեմբերի 10–ին։
Հովհաննիսյանը 2004 թվականից ծառայել է ՀՀ ազգային անվտանգության մարմինների Պետական պահպանության ծառայությունում՝ զբաղեցնելով բաժանմունքի պետից մինչև ծառայության պետի պաշտոններ: ՊՊԾ պետ էր նշանակվել 2020 թվականի դեկտեմբերին, վերանշանակվել՝ 2023թ. ապրիլին։
Նրա շուրջ աղմուկ բարձրացավ 2022 թվականի մայիսին, երբ ընդդիմադիրների բողոքի ակցիայի ժամանակ ոտքով հարվածեց իրեն նկարող օպերատորին։
Նշենք, որ Պետական պահպանության ծառայությունը առանձնացվել է ԱԱԾ–ից ու գործում է որպես վարչապետին ենթակա մարմին։
