https://arm.sputniknews.ru/20240227/inch-vitshak-e-nvor-areshum-teghi-unecats-pajtjunic-3-shabat-anc-patmum-en-bnakichnery-72797556.html

Ի՞նչ վիճակ է Նոր Արեշում տեղի ունեցած պայթյունից 3 շաբաթ անց. պատմում են բնակիչները

Ի՞նչ վիճակ է Նոր Արեշում տեղի ունեցած պայթյունից 3 շաբաթ անց. պատմում են բնակիչները

Sputnik Արմենիա

Նոր Արեշի պայթյունից որոշակի վնասներ կրած տների բնակիչները դժգոհում են, որ ավելի քան 20 օր է` համապատասխան կառույցներից որևէ փոխհատուցում չեն առաջարկել։... 27.02.2024, Sputnik Արմենիա

2024-02-27T22:20+0400

2024-02-27T22:20+0400

2024-02-27T22:20+0400

փլուզում

պայթյուն

գազ

էրեբունի

երևան

երևանի քաղաքապետարան

քաղաքապետարան

փոխհատուցում

https://cdn.am.sputniknews.ru/img/07e8/02/1b/72757115_0:83:1601:983_1920x0_80_0_0_eee65fcfab21d6a9670eb941ac85c27d.jpg

ԵՐԵՎԱՆ, 27 փետրվարի – Sputnik, Լիլիթ Դեմուրյան. Փլուզված և կիսափլուզված տներ, կոտրված պատուհաններ, անտուն մնացած քաղաքացիներ, փլատակներ. ահա այս պատկերն է Երևանի Էրեբունի վարչական շրջանի Նոր Արեշ թաղամասի 34–րդ փողոցում տեղի ունեցած պայթյունից 22 օր անց։Քաղաքացիները դժգոհ են` իրենց մոտ ոչ ոք չի եկել համապատասխան կառույցներից. ո՛չ օգնություն են առաջարկել, ո՛չ էլ փոխհատուցում. իրենք են մեկը մյուսին օգնելով փորձում գլուխ հանել ստեղծված իրավիճակից։Բացի ամբողջությամբ փլուզված 3 տնից, ևս 3 տան բնակիչներ դրսում են մնացել` մեկի տան դրսի պատն է կիսով չափ փլուզվել, մյուսի` տանիքը։ Մնացած տներում վնասվել են դռներ և պատուհաններ։Տիկին Գոհարի տանն էլ պատուհանները, դուռը և տանիքի որոշ հատվածն են վնասվել։ Հարևաններից մեկը պատուհան ու դուռ է նվիրել, տեղադրել են, բայց տանը դեռ հնարավոր չէ ապրել։ Առայժմ իր անչափահաս երեխայի և 2-րդ կարգի հաշմանդամություն ունեցող մոր հետ ապրում են քրոջ մոտ` Կոտայքի մարզի Կապուտան գյուղում։«Քույրս իր 5 երեխայի և ընտանիքի մյուս անդամների հետ Արցախից են տեղահանվել, իրենք էլ վարձով են ապրում։ Հիմա ես մեկ–մեկ գալիս եմ այստեղ, եղբորս ընկերը գալիս, օգնում է որոշ հարցերում, ուզում եմ որոշ չափով տունը կարգի բերել, որ գամ, ապրեմ։ Երեխաս դպրոց էլ չի գնում, միայն Viber-ով հանձնարարություններն իմանում ենք, անում, ուղարկում։ Եթե հնարավոր է, կցանկանայի, որպեսզի մի քիչ աջակցեին, տանիքը վերանորոգեինք։ Ինձ նման ևս 5 ընտանիք անտուն է մնացել»,– ասաց Գոհարը։Մեկ այլ բնակիչ էլ, որի պատշգամբի պատերը, պատուհաններն ու դռներն են վնասվել, նշեց, որ թեև քաղաքապետարանից լրատվամիջոցներին ասել են, թե կաջակցեն, բայց ինքն անձամբ չի հավատում դրան։«Իմ տանը «теплый пол» (ջեռուցվող հատակ,–խմբ.) էի արել, ամբողջությամբ տրաքել ու վնասվել է, ո՞վ է փոխհատուցելու։ Մոտ 5000-6000 դոլարի վնաս միայն ես ու իմ եղբայրն ենք կրել (նրանց տները նույն շենքում են` բաժանված 2 մասի,– խմբ.)»,– ասաց բնակիչը։Մեկ այլ բնակչուհի էլ պնդում է` թաղապետարանում նշել են` եթե հաստատվի, որ պայթյունը գազի հետևանքով է եղել, ապա «Գազպրոմ Արմենիան» կփոխհատուցի, եթե ոչ, ապա գործը դատարան կգնա։Երևանի փոխքաղաքապետ Սարգիս Մադաթյանը Sputnik Արմենիայի հետ զրույցում հակառակը պնդեց։ Նա ընդգծեց` փետրվարի 23-ին են հանդիպել ամբողջությամբ և մասնակի փլուզված տների բնակիչների, ընդհանուր առմամբ` 7 ընտանիքի հետ։«Այդ օրը որոշվեց, որ 7 ընտանիքին էլ միանվագ 300 000–ական դրամ կտրամադրենք բնակարաններ վարձակալելու նպատակով, որպեսզի այս պահին անօթևան չմնան։ Դիմումներն ընդունելու ընթացակարգն արդեն սկսված է։ Ներկայում էլ սպասում ենք իրավապահ մարմինների կողմից վերջնական եզրակացությանը»,– նշեց փոխքաղաքապետը։Խոսելով այն անձանց մասին, որոնց տների դռներն ու պատուհաններն են վնասվել, Մադաթյանը շեշտեց` Երևանի քաղաքապետարանը մասնավոր սեկտորի հանդեպ պարտավորություններ չունի վնասի փոխհատուցան։ Եթե պարզվի, որ գազի հետևանքով է պայթյունը տեղի ունեցել, հետագա փոխհատուցման հարցը կլինի «Գազպրոմ Արմենիա» ընկերության տիրույթում։ Այլ պատճառ ի հայտ գալու դեպքում կփորձեն հասկանալ, թե պետությունն ինչ է պատրաստ անել և ինչպես կարող են աջակցել տուժած բնակիչներին։Հավելենք, որ լուրերը, թե երիտասարդ տղան, որի տնից եղել է պայթյունը, հոգեկան առողջության հետ կապված խնդիրներ ունի, ըստ այդ փողոցի բնակիչների` սուտ են։Հիշեցնենք, որ պայթյունը Էրեբունիում տեղի էր ունեցել փետրվարի 5-ին։ Այդ օրը փրկարարները փլատակներից դուրս էին բերել Նոր Արեշի 34-րդ փողոցի տներից մեկում ապրող ամուսինների` 37-ամյա Հայկ Սողոմոնյանի և 54-ամյա Գայանե Եղոյանի դիերը։ Մի քանի օր առաջ էլ հիվանդանոցում մահացել է փլատակներից դուրս բերված 86-ամյա Ռոզա Նազարյանը։Փլատակներից դուրս բերված 30-ամյա Հրանտ Սարգսյանը դեռ բուժհաստատությունում է։Պայթյունի դեպքի առթիվ քրեական վարույթ է նախաձեռնվել։

երևան

2024

Լուրեր

am_HY

փլուզում, պայթյուն, գազ, էրեբունի, երևան, երևանի քաղաքապետարան, քաղաքապետարան, փոխհատուցում