https://arm.sputniknews.ru/20231016/virtuvoz-jutakahar-ev-hetaqrqir-patmutjunner-ara-malikjani-khelahegh-hamergy-erevanum-67346036.html

Վիրտուոզ ջութակահար և հետաքրքիր պատմություններ. Արա Մալիկյանի խելահեղ համերգը Երևանում

Վիրտուոզ ջութակահար և հետաքրքիր պատմություններ. Արա Մալիկյանի խելահեղ համերգը Երևանում

Sputnik Արմենիա

Մալիկյանի երաժշտությունը քնքշանք է, կիրք ու ցասում, ժանրերի սիմբիոզ ու զգացմունքների խառնուրդ։ Մալիկյանին դիտելն ու լսելը լիակատար հաճույք է։ Բայց, ինչպես... 16.10.2023, Sputnik Արմենիա

2023-10-16T21:04+0400

2023-10-16T21:04+0400

2023-10-16T21:04+0400

արա մալիկյան

համերգ

երևան

ջութակ

ջութակահար

https://cdn.am.sputniknews.ru/img/07e7/0a/10/67348018_0:68:1600:968_1920x0_80_0_0_85a8fdb0f3d6534ed5be26a5c23b0d82.jpg

ԵՐԵՎԱՆ, 16 հոկտեմբերի — Sputnik, Նանա Մարտիրոսյան. Հազիվ թե որևէ մեկին կարելի է զարմացնել իսպանահայ ջութակահար Արա Մալիկյանի երաժշտական տաղանդի և պրոֆեսիոնալիզմի մասին պատմությամբ։ Հենց դրա համար էլ նա աշխարհահռչակ երաժիշտ է և շատ վաղուց վիրտուոզի համբավ ունի։Փորձառու հանդիսատեսին չի զարմացնի նաև նրա էպատաժային տեսքը, խելահեղ էներգետիկան և էքսպրեսիան. դա ակնհայտ է յուրաքանչյուրի համար, ով գոնե մեկ անգամ տեսել է նրան բեմում կամ էկրանին։ Իսկ այ իրական բացահայտում կարող է դառնալ այն, որ նա նաև հոյակապ պատմող է, եթե շատ խոսակցական ասենք` «թույն ստենդափեր»։Համենայնդեպս, Մալիկյանն իր տաղանդի հենց այս կողմը բացահայտեց իր երևանյան համերգի ժամանակ` զվարճալի պատմություններ պատմելով իր հայ ընտանիքի, ստեղծագործական ուղու և պարզապես ամեն տեսակ անհարմար իրավիճակների մասին: Այս ամենին առանձնահատուկ հմայք էր հաղորդում երաժիշտի արևմտահայերեն խոսքը, որը պարբերաբար համեմվում էր իսպաներեն և անգլերեն բառերով:Բեմում նրան ուղեկցում էր հավատարիմ թիմը, որի հետ Մալիկյանն աշխատում է արդեն 30 տարի։ Իսկ այս բարեկամության պատմությունը սկսվել է Կուբայում: Այն ժամանակ շատ երիտասարդ երաժիշտներ պետք է ելույթ ունենային մասնավոր երեկույթի ժամանակ, որտեղ պետք է քիչ հայտնի ժամանակակից կոմպոզիտորի ստեղծագործություններ ներկայացնեին։ Ջութակահարը պատմում է, որ երաժշտությունն այնքան վատն էր, որ թիմը, ինքնաբուխ և առանց պայմանավորվելու, սկսեց տեղում իմպրովիզացիա անել` արժանանալով բոլոր ներկաների հիացական արձագանքներին։ Միայն մեկ, բայց էական բացառությամբ… Ստեղծագործությունների հեղինակը շատ էր նեղվել, ինչը, ի դեպ, կարելի է հասկանալ։Բոլորովին վերջերս Մալիկյանն իր արվեստում կրկին հայկական թեմատիկայի է անդրադարձել։ Նոր ստեղծագործությունը կոչվում է «Երևանյան էտյուդներ»։ Այն Երևանի հանդիսատեսի համար կատարելիս՝ Մալիկյանը խնդրում էր դահլիճին ևս բղավել՝ հիմարնե՜ր, տխմարնե՜ր, բայց դահլիճը չէր ենթարկվում, քանի որ առանց այն էլ հիացունքի մեջ էր։Մաեստրոյի հաջորդ պատմությունը «այլմոլորակայինների գրասենյակի մասին էր»․հենց այսպես էին 80-90-ականներին Լոնդոնում անվանում օտարերկրացիներին սպասարկող գրասենյակները։ Մալիկյանը խոստովանեց, որ զայրացել էր նման անվանումից և որոշել էր պատմել այդ մասին իր համերգների ժամանակ։ Բացի այդ նա երաժշտություն է գրել, որը տոգորված է իր հույզերով՝ զայրույթ, տխրություն, ցասում, տեղ-տեղ՝ խելահեղություն։ Համարի ժամանակ նա հանկարծ իջեցրեց ջութակն ու 1,5-2 րոպե պտտվեց դրա առանցքի շուրջ, այնուհետև անմիջապես բարձրացրեց գործիքն ու սկսեց նվագել։ Հանկարծ ջութակահարն ընկավ բեմի վրա և շարունակեց նվագել պառկած, դահլիճն էլ սկսեց անդադար ծափահարել։«Խելագար է։ Նրանք բոլորն են ցնորված։ Որքան հրաշալի է այս ամենը․սրա մասին ֆիլմեր պետք է նկարել», - բացականչեց մեր հետևում նստած հայ ռեժիսորը։Լույսը մարեց։ Թվում էր, թե տեխնիկական խափանում է։ Բայց ոչ, լսվում է ջութակի ծորուն ձայնն ու Ֆրեդերիկ Շոպենի թովիչ «Նախերգանք մի մինոր №4»-ը։ Մալիկյանը ծնկի եկավ և սկսեց նվագել անհավանական նուրբ երաժշտություն։ Դահլիճը սառեց։ Բայց արդեն երկու րոպեից Մալիկյանը թռչկոտեց ամբողջ բեմով, ցատկեց և պարեց` միաժամանակ նվագելով իր հայտնի «Ռոբոտ-ութոտնուկը», որը գրել է որդու խնդրանքով։Ի դեպ, նման խնդրանքներ հաճախ է ստացել։ Եվ նա կրկին ստենդափ ժանրում պատմում է պատմություններ իր կյանքի մասին։ Մի անգամ նա երաժշտություն էր նվիրել մորը, ինչից հետո կրտսեր քույրը՝ Նանիկը զայրացած պահանջել էր, որ իր համար էլ որևէ բան հորինի։ Ապա սկսել էր բողոքել ավագ քույրը՝ Տալինը։«Ես գրեցի մի գործ բոլորի համար, և նրանք մեկ տարի չէին խոսում ինձ հետ։ Հաշտվեցին, երբ ես խոստացա, որ այլևս երբեք և ոչ մեկ դա չի լսի։ Հիմա ես ձեզ համար կնվագեմ, միայն թե սոցցանցերում չտեղադրեք, նրանք հետևում են», - խնդրեց երաժիշտը դահլիճի ծիծաղի ներքո։Մինչ նա նվագում էր, իմ կողքին նստած լիբանանցի տղամարդը կնոջը շշնջաց․ «Քույրերիս մասին է, մեկը՝ ուրախ և ակտիվ է, մյուսը՝ նուրբ ու չխոսկան»։ Իսկ ինձ թվաց, որ ճանաչում եմ Նանիկին ու Տալինին, և նույնիսկ պատկերացրի, ինչ տեսք ունեն նրանք։ Ու մինչ ես այդ մասին էի մտածում, Արան ասաց, որ ինքն Ցեղասպանությունից փրկվածների ընտանիքից է, որը հաստատվել էր Լիբանանում։ Հայրը՝ ջութակահար էր, և հենց նա է սեր սերմանել գործիքի հանդեպ, իսկ մայրը հայոց լեզվի ուսուցչուհի էր և հետևում էր, որ երեխաները հայերեն խոսեն։«Եթե նա այստեղ լիներ, վիզս կկտրեր նման հայերենի համար։ Բայց կհպարտանար, որ իրականացրել եմ երազանքս և ելույթ եմ ունենում հայրենիքում», - ասաց երաժիշտը։Լեռնային Ղարաբաղի իրադարձությունների ֆոնին երաժիշտը երկար մտածում էր` չեղարկել երևանյան համերգը, թե ոչ։ Բայց որոշեց նվագել և հայ հանդիսատեսին նվիրել ներկայացում, որը որոշ ժամանակով մոռացության կտա իրականությունը։ Համերգից ստացված ողջ հասույթը ջութակահարն ու իր խումբը որոշել են ուղղել ԼՂ-ից բռնի տեղահանված 5 ընտանիքի։Դահլիճը երկար հոտնկայս ծափահարում էր, իսկ Մալիկյանը խոստացավ վերադառնալ սիրված երաժշտությամբ և նոր պատմություններով։

երևան

2023

Լուրեր

am_HY

արա մալիկյան, համերգ, երևան, ջութակ, ջութակահար