Լիտվան, Գերմանիան և Ավստրիան կոչ են արել Ադրբեջանին անհապաղ հրադադար հաստատել
19:05 19.09.2023 (Թարմացված է: 19:07 19.09.2023)
Անալենա Բերբոկ. Արխիվային լուսանկար
© AP Photo / Markus Schreiber
Բաժանորդագրվել
Լիտվայի, Գերմանիայի և Ավստրիայի արտգործնախարարությունները կոչ են արել Ադրբեջանին դադարեցնել ռազմական գործողությունները և վերադառնալ բանակցությունների սեղանի շուրջ։
ԵՐԵՎԱՆ, 19 սեպտեմբերի – Sputnik. Լիտվայի, Գերմանիայի և Ավստրիայի արտաքին գործերի նախարարությունները Ադրբեջանին կոչ են արել անհապաղ դադարեցնել ռազմական գործողությունները և հրադադար հաստատել։
«Ղարաբաղի հայերի նկատմամբ ամիսներ տևած շրջափակումից հետո Ադրբեջանի սկսած ռազմական գործողությունները խաթարում են տևական խաղաղություն հաստատելուն ուղղված միջազգային հանրության ջանքերը։ Կոչ ենք անում անհապաղ հրադադար հաստատել և սկսել երկխոսություն Բաքվի և Ղարաբաղի հայերի միջև, քանի որ դա խաղաղ համակեցություն տանող միակ ճանապարհն է»,– այս մասին X-ի իր էջում գրել է Լիտվայի ԱԳ նախարար Գաբրիելիուս Լանդբերգիսը։
Military operation launched by AZ after months of blockade imposed on Karabakh Armenians undermines efforts by intl community to bring lasting peace. We urge immediate ceasefire&launching of dialogue between Baku & Karabakh Armenians as the only way towards peaceful coexistence.
— Gabrielius Landsbergis🇱🇹 (@GLandsbergis) September 19, 2023
Իսկ Ավստրիայի արտգործանախարարությունը X-ում նշել է, որ խիստ անհանգստացած են Հարավային Կովկասում տեղի ունեցած հարձակումից։ Նրանք կոչ են անել Ադրբեջանին անհապաղ դադարեցնել ցանկացած ռազմական գործողություն։ Շեշտել են` հենց հիմա դեէսկալացիա է պետք։
Գերմանիայի արտաքին քաղաքական գերատեսչության նախարար Անալենա Բերբոկն ընդգծել է, որ Ադրբեջանը պետք է դադարեցնի գնդակոծությունները և վերադառնա բանակցությունների սեղանի շուրջ։ Բերբոկն ընդգծել է, որ իրենք աջակցում են ԵՄ–ի ղեկավարության ներքո ընթացող բանակցություններին։
Հիշեցնենք` Ադրբեջանն այսօր լայնամասշտաբ հարձակում է սկսել Արցախի դեմ։ Արցախի ՊՆ–ի հաղորդագրության համաձայն` ժամը 13։00–ի սահմաններում ադրբեջանական զինուժը շփման գծի ողջ երկայնքով խախտել է հրադադարը` հասցնելով հրթիռահրետանային հարվածներ։
Ադրբեջանի պաշտպանության նախարարությունը հայտարարել է, թե լոկալ բնույթի հակաահաբեկչական միջոցառումներ է անցկացնում։
Արցախի մարդու իրավունքների պաշտպան Գեղամ Ստեփանյանը հայտնել է, որ Ադրբեջանի հարձակումների հետևանքով խաղաղ բնակչության շրջանում առնվազն 2 զոհ կա, այդ թվում՝ մեկ երեխա, ևս 26-ը վնասվածքներ են ստացել, վիրավորներից 11–ը երեխաներ են։
