Ադրբեջանը միջազգային հանրությանը մասնակից է դարձնում ԼՂ-ի և Հայաստանի դեմ քայլերին. ՀՀ ԱԳՆ
10:40 19.09.2023 (Թարմացված է: 10:42 19.09.2023)
© Sputnik / Andranik GhazaryanՀՀ ԱԳՆ
![ՀՀ ԱԳՆ ՀՀ ԱԳՆ - Sputnik Արմենիա, 1920, 19.09.2023](https://cdn.am.sputniknews.ru/img/2344/76/23447699_0:0:1600:901_1920x0_80_0_0_ecdf6091beef8c07739f215345480d5f.jpg)
ՀՀ ԱԳՆ
© Sputnik / Andranik Ghazaryan
Բաժանորդագրվել
Ադրբեջանի ԱԳՆ-ում դիվանագիտական կորպուսի ներկայացուցիչների հետ հանդիպման ժամանակ ադրբեջանական կողմի ներկայացրած թեզերը տարածաշրջանում նոր ռազմական էսկալացիա ծավալելու դիվանագիտական նախապատրաստության են նման:
ԵՐԵՎԱՆ, 19 սեպտեմբերի – Sputnik. Ադրբեջանը Լեռնային Ղարաբաղում էթնիկ զտումների և Հայաստանի դեմ ագրեսիայի քաղաքականության իրականացման գործում միջազգային հանրությանը «համապատասխանատու» կարգելու նպատակ ունի, գրում է ՀՀ արտաքին գործերի նախարարությունը։
Գերատեսչությունից նշում են, որ Ադրբեջանի արտաքին գործերի նախարարությունում դիվանագիտական կորպուսի ներկայացուցիչների հետ հանդիպման ժամանակ ադրբեջանական կողմի ներկայացրած թեզերը տարածաշրջանում նոր ռազմական էսկալացիա ծավալելու, Լեռնային Ղարաբաղում էթնիկ զտումներ իրականացնելուն ուղղված կոնկրետ գործողություններ սկսելու դիվանագիտական նախապատրաստության են նման:
«Վերոհիշյալ հանդիպման ժամանակ Ադրբեջանի ներկայացուցիչները պնդել են, թե Հայաստանի Հանրապետությունը մերժում է լարվածության թուլացմանն ուղղված բոլոր առաջարկները: Անհասկանալի է, թե ինչ առաջարկների մասին է խոսում Ադրբեջանը, և օտարերկրյա դիվանագետների հետ հանդիպման մասին հաղորդագրության մեջ տվյալ հարցը պարզաբանված չէ: Հարկ ենք համարում նշել, որ Հայաստան-Ադրբեջան պետական սահմանից զորքերի հայելային հետքաշման առաջարկը շարունակում է մնալ ուժի մեջ, և ՀՀ–ն պատրաստ է օր առաջ ներգրավվել դրա իրականացման քննարկումներում»,– նշված է հաղորդագրության մեջ:
ՀՀ ԱԳՆ-ից նաև նշում են, որ Ադրբեջանի պնդումները, թե Հայաստանի Հանրապետությունը Լեռնային Ղարաբաղի տարածքում ստեղծել է վարչակարգ, իրականության հետ որևէ աղերս չունեն:
Արտաքին գերատեսչությունից ընդգծում են, որ Հայաստանի Հանրապետության աջակցությունը Լեռնային Ղարաբաղին ունի հումանիտար բնույթ, ինչի անհրաժեշտությունը ավելի է ընդգծվում Լաչինի միջանցքի ապօրինի արգելափակման հետևանքով ծավալվող հումանիտար ճգնաժամով:
«ՀՀ–ն ողջունում է երկարատև դադարից հետո հումանիտար առաջին բեռների մուտքը Լեռնային Ղարաբաղ և հույս ունի, որ այն շարունակական ու կայուն բնույթ կկրի: Միևնույն ժամանակ հարկ ենք համարում ընդգծել, որ Լաչինի միջանցքի 9 ամիս շարունակվող արգելափակումը 2020թ․ նոյեմբերի 9-ի եռակողմ հայտարարության և Արդարադատության միջազգային դատարանի փետրվարի 22-ի և հուլիսի 6-ի իրավաբանական պարտադիր ուժ ունեցող որոշումների կոպտագույն խախտում է»,– նշում են ՀՀ ԱԳՆ–ից:
Ընդգծվում է` եթե Ադրբեջանն իր ապօրինի գործողություններով չստեղծեր հումանիտար ճգնաժամ Լեռնային Ղարաբաղում և չխոչընդոտեր ՄԱԿ կառույցների և այլ միջազգային գործընկերների մուտքը ԼՂ, չէին լինի Հայաստանի, միջազգային գործընկերների, անգամ Ադրբեջանի կողմից Լեռնային Ղարաբաղին հումանիտար աջակցություն տրամադրելու պատրաստակամության մասին հայտարարությունները։
Արտաքին գործերի նախարարությունից ևս մեկ անգամ վերահաստատում են, որ Լեռնային Ղարաբաղի շուրջ ստեղծված իրավիճակի, լարվածության թուլացման միջոց են համարում Բաքու-Ստեփանակերտ երկխոսությունը:
Հիշեցնենք, որ սեպտեմբերի 18–ի առավոտյան Բերձորի (Լաչին) միջանցքով՝ Գորիս-Ստեփանակերտ մայրուղով, Ստեփանակերտ է տեղափոխվել մոտ 23 տոննա հայկական արտադրության ալյուր, իսկ Ակնա-Ստեփանակերտ ճանապարհով՝ արտասահմանյան (ռուսական, շվեյցարական) արտադրության բժշկական և հիգիենայի պարագաներ։