Բելառուսի ԿԸՀ նախագահը կմասնակցի Երևանի ավագանու ընտրությունների դիտարկմանը
21:10 15.09.2023 (Թարմացված է: 23:20 15.09.2023)
© Photo : Центральная Избирательная Комиссия
Բաժանորդագրվել
Իգոր Կարպենկոն ՀՀ ԿԸՀ նախագահին հրավիրել է Բելառուս։
ԵՐԵՎԱՆ, 15 սեպտեմբերի – Sputnik. Երևանի ավագանու ընտրությունների դիտարկմանը մասնակցելու համար Հայաստան է ժամանել Բելառուսի Հանրապետության ԿԸՀ նախագահ Իգոր Կարպենկոն։ Տեղեկությունը հայտնում է ՀՀ կենտրոնական ընտրական հանձնաժողովի մամուլի ծառայությունը։
Կարպենկոյի գլխավորած պատվիրակությունը այսօր հյուրընկալվել է ՀՀ ԿԸՀ-ում։ Բելառուսի ԿԸՀ նախագահին ուղեկցել է Հայաստանում Բելառուսի Հանրապետության դեսպան Ալեքսանդր Կոնյուկը։
Հյուրերին ընդունել են ՀՀ ԿԸՀ նախագահ Վահագն Հովակիմյանը, ԿԸՀ նախագահի տեղակալ Նունե Հովհաննիսյանը և ԿԸՀ անդամ Աննա Գրիգորյանը։
«Իգոր Կարպենկոն կարևորել է ՀՀ ԿԸՀ-ի հետ երկկողմ հարաբերությունները և ՀՀ ԿԸՀ նախագահին հրավիրել է Բելառուսի Հանրապետություն»,– ասված է հաղորդագրությունում։
Հովակիմյանը շնորհակալություն է հայտնել հյուրերին Երևանի ավագանու սեպտեմբերի 17-ի ընտրությունները դիտարկելու հրավերն ընդունելու և Հայաստան ժամանելու համար։
Հիշեցնենք, որ սեպտեմբերի 17–ին կայանալիք Երևանի ավագանու ընտրություններին մասնակցում են 13 կուսակցություն ու մեկ դաշինք.
1.
«Հայաստանի եվրոպական» կուսակցություն (թեկնածուն` Տիգրան Խզմալյան)2.
«Ժողովրդավարական համախմբում» կուսակցություն (Սուրեն Պետրոսյան),3.
«Քաղաքացիական պայմանագիր» կուսակցություն (Տիգրան Ավինյան),4.
«Հանուն սոցիալական արդարության» կուսակցություն (Արման Ղուկասյան),5.
«Ուժը հայրենյաց» կուսակցություն (Նելլի Հարությունյան),6.
«Հանրային ձայն» կուսակցություն (Արտակ Գալստյան),7.
«Ազգային առաջընթաց» կուսակցություն (Հայկ Մարության),8.
«Հաղթանակ» կուսակցություն (Վիկտոր Մնացականյան),9.
«Ապրելու երկիր» կուսակցություն (Մանե Թանդիլյան),10.
«Հանրապետություն» կուսակցություն (Արտակ Զեյնալյան),11.
«Միացյալ Հայաստան» կուսակցություն (Երվանդ Թարվերդյան),12.
«Արդար Հայաստան» կուսակցություն (Նորիկ Նորիկյան),13.
«Լուսավոր Հայաստան» կուսակցություն (Դավիթ Խաժակյան),14.
«Մայր Հայաստան» դաշինք («Երկիր Ծիրանի» և «Ինտելեկտուալ Հայաստան կուսակցություններ) (Անդրանիկ Թևանյան)։Սեպտեմբերի 7-ի դրությամբ Երևանում ընտրողների թիվը կազմում է 824 հազար 250։ Ըստ վարչական շրջանների` ամենաշատ ընտրողները Շենգավիթ համայնքում են` 110780, իսկ ամենաքիչը Նուբարաշենում` 8065։
