Հաջիևը լավ կանի՝ դադարեցնի ստի արշավը. Մարուքյանը` Բաքվի պարտավորությունների մասին
12:49 15.08.2023 (Թարմացված է: 12:57 15.08.2023)
Էդմոն Մարուքյան. Արխիվային լուսանկար
© Sputnik / Aram Nersesyan
Բաժանորդագրվել
Էդմոն Մարուքյանը հիշեցրել է, որ մինչ օրս հայկական կողմը ձեռնարկել է բոլոր անհրաժեշտ քայլերը վստահության ամրապնդման համատեքստում։
ԵՐԵՎԱՆ, 15 օգոստոսի – Sputnik. Ադրբեջանը շարունակում է կեղծ մեղադրանքներ հնչեցնել ականների շարունակական տեղադրման վերաբերյալ, չնայած, Հայաստանն արդեն փոխանցել է ականապատ տարածքների բոլոր քարտեզները։ Այս մասին Twitter–ի իր էջում գրել է ՀՀ հատուկ հանձնարարություններով դեսպան Էդմոն Մարուքյանը։
«Մինչ օրս հայկական կողմը ձեռնարկել է բոլոր անհրաժեշտ քայլերը վստահության ամրապնդման համատեքստում, այդ թվում՝ ականապատ տարածքների բոլոր քարտեզների փոխանցումն Ադրբեջանին։ Այդ երկիրը, չնայած պայմանավորվածություններին, նույնիսկ ազատ չի արձակել ռազմագերիներին և իր բանտերում պահվող այլ անձանց՝ որպես վստահության ամրապնդման միջոց»,– գրել է Մարուքյանը։
Նա ընդգծել է, որ Ադրբեջանը պարբերաբար հարձակվում և օկուպացնում է Հայաստանի ինքնիշխան տարածքի տարբեր հատվածներ, խախտում է 2020 թ. նոյեմբերի 9-ի հիմնարար պարտավորությունները և լիակատար շրջափակման մեջ է պահում Լեռնային Ղարաբաղի ժողովրդին:
Till today, the Armenian parties have taken all the necessary steps, in the context of confidence building, including handing over all the landmine maps to Azerbaijan, but in response, Azerbaijan continues to make false accusations about ongoing installation of minefields and… pic.twitter.com/QZ1fQtGjFe
— Edmon Marukyan (@edmarukyan) August 15, 2023
Մարուքյանը նաև անդրադարձել է Ադրբեջանի նախագահի օգնական Հիքմեթ Հաջիևի այս մասով արած հայտարարությանը և շեշտել, որ վերջինս լավ կաներ՝ դադարեցներ ստի այս արշավը, քանի որ այն որևէ կերպ չի կարող շեղել միջազգային հանրության ուշադրությունը Ադրբեջանի կողմից իրականացվող էթնիկ զտումների քաղաքականության թեմայից։
Հիշեցնենք, որ Հաջիևը երեկ հայտարարել էր, որ Հայաստանն ավելի քան 1 մլն ական է տեղադրել «ադրբեջանական օկուպացված տարածքներում»։ Նա նաև նշել էր, թե Ադրբեջանն ականներով ամենաաղտոտված երկիրն է աշխարհում։
Հավելենք, որ 2021 թվականի հունիսին ադրբեջանական կողմը վերադարձրել է ընդամենը 15 զինվորականի ՝ Աղդամի շրջանում ականապատ դաշտերի քարտեզների դիմաց։
2023 թվականի ապրիլին ՀՀ ԱԺ նախագահ Ալեն Սիմոնյանը հայտարարեց, որ Հայաստանն Ադրբեջանին է փոխանցել ականապատ դաշտերի բոլոր քարտեզները։
