Ադրբեջանական դիրքերից կրակել են Խնապատ համայնքի բնակչի ուղղությամբ
19:12 04.08.2023 (Թարմացված է: 19:15 04.08.2023)
Բաժանորդագրվել
Հրադադարը խախտելու պատճառով դադարեցվել են գյուղատնտեսական աշխատանքները:
ԵՐԵՎԱՆ, 4 օգոստոսի – Sputnik. Ադրբեջանական մարտական դիրքերից կրակել են Արցախի Խնապատ համայնքի 40–ամյա բնակչի ուղղությամբ։ Տեղեկությունը հայտնում է Արցախի ՆԳՆ ոստիկանությունը։
«Օգոստոսի 4-ին ոստիկանության Ասկերանի շրջանային բաժինը հաղորդում է ստացել, որ ժամը 15:00-ի սահմաններում Ներքին Սզնեք գյուղի վարչական տարածքի «Դրավուն աղբյուր» կոչվող տեղամասին հարակից ադրբեջանական մարտական դիրքերից հրաձգային տարբեր տրամաչափի զենքերով կրակել են Խնապատ համայնքի 40-ամյա բնակիչ Կ. Մ.-ի ուղղությամբ, որը կոմբայնով հունձ էր կատարում ցորենի դաշտում։ Բարեբախտաբար, տուժածներ չկան»,– ասված է հաղորդագրությունում։
Հրադադարի պահպանման ռեժիմը խախտելու պատճառով դադարեցվել են գյուղատնտեսական աշխատանքները:
Հաղորդումը փոխանցվել է ռուսական խաղաղապահ զորակազմին։
Հիշեցնենք` հուլիսի 23-ին` ժամը 10:00-ից 12:50 ընկած ժամանակահատվածում ադրբեջանական զինուժն ընդհատումներով կրակ էր բացել Սարուշեն գյուղի տարածքում աշխատող կոմբայնի ուղղությամբ:
