Նիդեռլանդների թագավորը ներողություն է խնդրել ստրկատիրության համար
19:18 01.07.2023 (Թարմացված է: 19:35 01.07.2023)
Նիդեռլանդների թագավորը ներողություն է խնդրել
© AP Photo / Peter Dejong, Pool
Բաժանորդագրվել
Հուլիսի 1-ին Նիդեռլանդներում նշում են թագավորությունում ստրկության վերացման 150 տարին։
ԵՐԵՎԱՆ, 1 հուլիսի – Sputnik. Նիդեռլանդների թագավոր Վիլլեմ–Ալեքսանդրը ստրկության չեղարկման 150-ամյակի օրը ներողություն է խնդրել ստրկատիրության հարցում երկրի դերի և դրա հետևանքների համար: Տեղեկությունը հայտնում է ՌԻԱ Նովոստին։
Հուլիսի 1-ին Նիդեռլանդներում նշում են թագավորությունում ստրկության վերացման 150 տարին։ Այդ առիթով թագավոր Վիլեմ–Ալեքսանդրը Ամստերդամի Օստերպարկում ստրկության չեղարկման պատվին կանգնեցված ազգային հուշարձանի մոտ կազմակերպված միջոցառման ժամանակ հանդես է եկել խոսքով։
«Այսօր ես` որպես ձեր թագավոր և որպես կառավարության անդամ, անձամբ եմ ներողություն խնդրում։ Ստրկավաճառությունը և ստրկությունը մարդկության դեմ իրականացված հանցագործություն են ճանաչվել, սակայն շտատգալտերներն ու Օրանսկիների թագավորական տունը ոչինչ չարեցին, որպեսզի խանգարեն դրան։ Համաշխարհային երկրորդ պատերազմը ցույց տվեց, որ չի կարելի թաքնվել օրենքների հետևում, երբ մարդկանց կենդանիների են վերածում։ Նաև գործելու բարոյական պարտավորություն կա։ Այդ իսկ պատճառով ներողություն եմ խնդրում նաև չգործելու համար», – ասել է թագավորը, որի խոսքը հրապարակվել է Նիդեռլանդների թագավորական տան կայքում։
Նա նշել է, որ Նիդեռլանդների ստրկատիրական անցյալը մինչ օրս զգացվում է հասարակության մեջ ռասիզմի դրսևորման տեսքով։
Նիդեռլանդների թագավոր Վիլլեմ–Ալեքսանդր
© AP Photo / Remko de Waal/Pool Photo via AP
Թագավորը հայտնել է նաև, որ իր կողմից պատվիրված անկախ հետազոտությունը պետք է լույս սփռի Նիդեռլանդների գաղութային անցյալի և ստրկության պատմության հարցում Օրանսկի–Նասաու ընտանիքի թագավորական դերի վրա։
2022 թվականի դեկտեմբերին ստրկատիրության հարցում Նիդեռլանդների դերի համար ներողություն էր խնդրել երկրի վարչապետ Մարկ Ռյուտեն։
Ավելի վաղ հայտնի էր դարձել, որ Օրանսկի–Նասաու թագավորական դինաստիան Նիդեռլանդներում այսօրվա հաշվարկով առնվազն 545 մլն եվրո է վաստակել իր գաղութներում 1675-1770 թվականներին` ստրկավաճառության ամենաակտիվ շրջանում։
XVI-XX դարերում Նիդեռլանդները նշանակալի գաղութային տերություն էր։ Հոլանդիայի գաղութներում ստրկությունը չեղարկվեց 1863 թվականի հուլիսի 1-ին։ Ներկա պահին Նիդեռլանդներից կախում ունեն լուծարված Նիդեռլանդական Անթիլյան կղզիների անդրծովյան մի քանի տարածքներ` Արուբան, Կյուրասաոն, Սինտ Մարտենը, ինչպես նաև Կարիբյան Նիդեռլանդները` Բոնայրե կղզին, Սաբան և Սինտ Էստատիուսը։
