Առաջատարը Ռուսաստանն է. Հայաստանը որքա՞ն հացահատիկ է ներմուծել այս տարի
Հացահատիկ
© Sputnik / Константин Михальчевский
Բաժանորդագրվել
Հայաստանը ցորենի ինքնաբավության մակարդակը 27,5 տոկոսից կարող է հասցնել 45 տոկոսի։
ԵՐԵՎԱՆ, 31 մայիսի – Sputnik. Հայաստան հացահատիկ ներմուծողների առաջատարը շարունակում է մնալ Ռուսաստանը։ Հայաստանը 2023 թվականի սկզբից ի վեր ներմուծել է տարվա ընթացքում երկրին անհրաժեշտ հացահատիկային մշակաբույսերի ընդհանուր ծավալի 41 տոկոսը։ Տեղեկությունը Sputnik Արմենիային հայտնեցին ՀՀ էկոնոմիկայի նախարարությունից՝ պատասխանելով մեր գրավոր հարցմանը։
Ռուսաստանից Հայաստան ներմուծված հացահատիկային մշակաբույսերի ընդհանուր ծավալը
© Sputnik / Shushanik Avdalyan
Գերատեսչությունում պարզաբանել են, որ Հայաստանին անհրաժեշտ հացահատիկի ներմուծման ծավալները գնահատվում են շուրջ 396 հազար տոննա, որից 295 հազարը` ցորեն, 33 հազարը` գարի, 68 հազարը` եգիպտացորեն։
«2023 թվականի մայիսի 19-ի դրությամբ ընթացիկ տարվա սկզբից ներմուծվել է շուրջ 165․2 հազար տոննա հացահատիկ, որից 122.1 հազար տոննան` ցորեն, 20.4 հազար տոննան` գարի, 22.7 հազար տոննան` եգիպտացորեն։ Հացահատիկը գրեթե ամբողջությամբ (99․9%) ներկրվել է Ռուսաստանի Դաշնությունից», - նշված է նախարարության պատասխանում։
Վերջին տարիներին Հայաստանը հենց Ռուսաստանից է ներմուծում հացահատիկի գրեթե ամբողջ ծավալը։ Վերջին հինգ տարում Ռուսաստանից հացահատիկի ներմուծման ծավալն ամենամեծը եղել է 2022 թվականին։
Հացահատիկային մշակաբույսերի ներմուծումը Ռուսաստանից Հայաստան 2018-2022
© Sputnik / Shushanik Avdalyan
Գերատեսչությունից պարզաբանել են նաև, որ Հայաստանի Հանրապետությունում հացահատիկի սպառման միջին տարեկան պահանջարկը կազմում է 527 հազար տոննա, որից ցորենը՝ 385 հազար տոննա, գարին՝ 70 հազար տոննա, եգիպտացորենը՝ 72 հազար տոննա:
2022 թվականին ՀՀ-ում ցորենի և գարու ինքնաբավության մակարդակն աննշան աճել է։ Այսպես` 2022 թվականին ցորենի ինքնաբավության մակարդակը բարձրացել է մինչև 27,5% (2021 թվականի 23,2%-ից), գարու դեպքում՝ մինչև 59,6% (2021 թվականի 49,1%-ի դիմաց), իսկ եգիպտացորենի ինքնաբավության ցուցանիշը 2022 թվականին կրճատվել է գրեթե 50%-ով՝ մինչև 4,8% (2021 թվականի 8,4%-ի դիմաց)։
Ցորենի միջին բերքատվությունը վերջին հինգ տարիներին կազմել է 22,4 ցենտներ մեկ հեկտարի համար։ Գերատեսչության կանխատեսմամբ՝ Հայաստանում ցանքատարածությունը կարող է ավելացվել գրեթե 22 հազար հեկտարով՝ մինչև 81 հազար հեկտար։ Դրա շնորհիվ համախառն բերքը կարող է կազմել տարեկան 181,4 հազար տոննա։ Հաշվի առնելով ցորենի տարեկան միջին պահանջարկը (385 հազար տոննա)` հացահատիկի ինքնաբավության մակարդակը Հայաստանում կարող է հասնել 45 տոկոսի։
Գյուղատնտեսության ոլորտի պետական օժանդակության ծրագրերի շրջանակում 2022 թվականին իրականացվել է Հայաստանի Հանրապետությունում աշնանացան ցորենի արտադրության խթանման պետական աջակցության ծրագիրը, որի հիմնական նպատակն էր նպաստել աշնանացան ցորենի ցանքատարածությունների ավելացմանը։ 2023 թվականին իրականացվելիք օժանդակության մասով դեռ քննարկումներ են ընթանում։
