ՀՀ նախագահն ու Կատարի էմիրը քննարկել են Հայաստանում դեսպանատուն բացելու հնարավորությունը
16:24 23.05.2023 (Թարմացված է: 16:51 23.05.2023)
© Photo : official site of the President of RA
Բաժանորդագրվել
Վահագն Խաչատուրյանը մասնակցել է Կատարի տնտեսական համաժողովի հանդիսավոր բացմանը, որից հետո հանդիպել է Կատարի Պետության էմիր շեյխ Թամիմ բին Համադ Ալ Թանին։
ԵՐԵՎԱՆ, 23 մայիսի – Sputnik. Աշխատանքային այցով Կատարում գտնվող ՀՀ նախագահ Վահագն Խաչատուրյանը Կատարի Պետության էմիր շեյխ Թամիմ բին Համադ Ալ Թանին է ներկայացրել հարավկովկասյան տարածաշրջանային իրողություններն ու ղարաբաղյան հիմնախնդրի բովանդակությունը։ Տեղեկությունը հայտնում է ՀՀ նախագահի մամուլի ծառայությունը։
ՀՀ նախագահ Վահագն Խաչատուրյանի ու Կատարի Պետության էմիր շեյխ Թամիմ բին Համադ Ալ Թանի հանդիպումը
© Photo : official site of the President of RA
Վահագն Խաչատուրյանը էմիրի հետ զրույցում շեշտել է, որ Հայաստանը հավատարիմ է տարածաշրջանում խաղաղության հաստատման և հարևան երկրների հետ բարիդրացիական հարաբերությունների հաստատման իր դիրքորոշմանը:
Շեյխ Թամիմ բին Համադ Ալ Թանին էլ իր խոսքում նշել է, որ տեղյակ է հայ-ադրբեջանական հակամարտությունից և հուսով է, որ իրողությունները կզարգանան կայուն խաղաղության հասնելու օրակարգով:
ՀՀ նախագահ Վահագն Խաչատուրյանի ու Կատարի Պետության էմիր շեյխ Թամիմ բին Համադ Ալ Թանի հանդիպումը
© Photo : official site of the President of RA
Զրույցի ընթացքում քննարկվել է նաև Հայաստանում Կատարի դեսպանատուն բացելու հնարավորությունը, երկուստեք շեշտվել է վերջինիս կարևորությունը, ինչը նոր մակարդակի կարող է բարձրացնել հայ-կատարական տնտեսական, գյուղատնտեսական, քաղաքական, մշակութային համագործակցությունը:
«Էմիրը նշել է, որ ներկայում Կատարից Հայաստան և հակառակ ուղղությամբ կատարվում է շաբաթական 10 թռիչք, ինչը վկայում է երկու երկրների միջև առկա համագործակցային ներուժի մասին: Թամիմ բին Համադ Ալ Թանին նաև շեշտել է, որ տարածաշրջանում կայունության և խաղաղության հաստատումը կնպաստի հարաբերությունների հետագա զարգացմանը»,– ասված է հաղորդագրությունում:
Այցի ընթացքում Վահագն Խաչատուրյանը մասնակցել է նաև Կատարի տնտեսական համաժողովի հանդիսավոր բացմանը:
ՀՀ նախագահ Վահագն Խաչատուրյանը Կատարի տնտեսական համաժողովի հանդիսավոր բացման ժամանակ
© Photo : official site of the President of RA
Հիշեցնենք` ՀՀ նախագահ Վահագն Խաչատուրյանը մայիսի 23-25-ը աշխատանքային այցով մեկնել է Կատարի Պետություն՝ մասնակցելու Կատարի տնտեսական համաժողովին։
«Համաշխարհային աճի նոր պատմությունը» խորագիրը կրող երրորդ տնտեսական համաժողովը նվիրված է համաշխարհային տնտեսության առջև ծառացած հրատապ մարտահրավերներին, ինչպես նաև դժվար տնտեսական պայմաններում համաշխարհային աճի համար նոր ճանապարհային քարտեզի մշակմանը:
Այցի ընթացքում նախատեսվում են ՀՀ նախագահի երկկողմ հանդիպումներ մի շարք երկրների և միջազգային գործընկեր կազմակերպությունների ներկայացուցիչների հետ։
ՀՀ նախագահը կհանդիպի նաև Կատարի հայ համայնքի ներկայացուցիչներին:
