ՍԾՏՀ տարածաշրջանում շարունակում ենք բախվել անվտանգային լուրջ մարտահրավերների. Սիմոնյան
17:40 04.05.2023 (Թարմացված է: 18:25 04.05.2023)
Ալեն Սիմոնյանը Սևծովյան տնտեսական համագործակցության խորհրդարանական վեհաժողովի գագաթնաժողովում
© Photo : official site of the Parliament of RA
Բաժանորդագրվել
ԱԺ նախագահն ընդգծել է, որ Հայաստանը տարածքային պահանջներ չունի հարևան երկրներից և ակնկալում է, որ մեր հարևանները նույնպես կառաջնորդվեն այդ սկզբունքով:
ԵՐԵՎԱՆ, 4 մայիսի – Sputnik. Սևծովյան տնտեսական համագործակցության տարածաշրջանում անվտանգային լուրջ մարտահրավերները շարունակվում են։ Լեռնային Ղարաբաղում 2020 թվականի աշնանը տեղի ունեցած 44-օրյա պատերազմը, Ուկրաինայում շարունակվող պատերազմը լուրջ աշխարհաքաղաքական հետևանքներ ունեն ընդհանուր անվտանգային ճարտարապետության համար: Այս հայտարարությունն արել է ՀՀ ԱԺ նախագահ Ալեն Սիմոնյանը` ելույթ ունենալով Սևծովյան տնտեսական համագործակցության խորհրդարանական վեհաժողովի 30-ամյակին նվիրված գագաթնաժողովում: Տեղեկությունը հայտնում է ԱԺ մամուլի ծառայությունը։
Նա նշել է, որ 2021 թվականին, այնուհետև 2022 թվականի սեպտեմբերին Ադրբեջանը ձեռնարկել է հերթական չհրահրված ռազմական ագրեսիան Հայաստանի արևելյան և հարավարևելյան սահմանների երկայնքով` ներխուժելով և գրավելով Հայաստանի ինքնիշխան տարածքները:
«Այս պահին արդեն շուրջ 5 ամիս է` Ադրբեջանը, կոպտորեն խախտելով 2020 թվականի նոյեմբերի 9-ի եռակողմ հայտարարության դրույթները, արգելափակել է Ռուսաստանի Դաշնության խաղաղապահների պատասխանատվության հատվածում գտնվող Լաչինի միջանցքը՝ Լեռնային Ղարաբաղի կյանքի միակ ճանապարհը, ինչը հանգեցրել է հումանիտար ճգնաժամի: Ապրիլի 23-ին Ադրբեջանն անօրինական անցակետ է տեղադրել Լաչինի միջանցքի սկզբնամասում»,– ասել է նա։
ԱԺ նախագահն ընդգծել է, որ չնայած ադրբեջանական կողմը պնդում է, որ միջանցքը բաց է, այն փաստացի շարունակում է փակ մնալ ազատ երթևեկության համար:
Սիմոնյանը հիշեցրել է, որ ճգնաժամն ունեցել է միջազգային լայն արձագանք: Մարդու իրավունքների եվրոպական դատարանը, ՄԱԿ-ի արդարադատության միջազգային դատարանը Լաչինի միջանցքի ապաշրջափակման վերաբերյալ որոշումներ են կայացրել, որոնք արհամարհվել են պաշտոնական Բաքվի կողմից:
«Պատերազմի ավարտից անցել է երկուսուկես տարի, իսկ Ադրբեջանն առ այսօր առնվազն 33 ռազմագերի է պատանդ պահում: Հայաստանի դեմ ագրեսիայի կիրառումից ստեղծվող իրավիճակը չի կարող հիմք դառնալ կայուն և տեւական խաղաղության համար»,–նշել է նա:
ԱԺ նախագահն իր ելույթում ընդգծել է, որ Հայաստանը տարածքային պահանջներ չունի հարևան երկրներից և ակնկալում է, որ մեր հարևանները նույնպես կառաջնորդվեն այդ սկզբունքով:
Սևծովյան տնտեսական համագործակցության խորհրդարանական գագաթնաժողով
© Photo : official site of the Parliament of RA
Նա հիշեցրել է, որ 2022 թվականի հոկտեմբերի 6-ին Պրահայում տեղի ունեցած քառակողմ հանդիպման ժամանակ Ֆրանսիայի նախագահի և Եվրոպական խորհրդի նախագահի մասնակցությամբ Հայաստանի ու Ադրբեջանի ղեկավարները հաստատել են իրենց հանձնառությունը ՄԱԿ-ի կանոնադրությանը և 1991 թվականի Ալմա Աթայի հռչակագրին, որոնց միջոցով երկու կողմերն էլ ճանաչում են միմյանց տարածքային ամբողջականությունն ու ինքնիշխանությունը:
Սիմոնյանը նաև հայտնել է, որ այս օրերին Վաշինգտոնում Միացյալ Նահանգների Պետական քարտուղարի նախաձեռնությամբ ընթանում են Հայաստանի և Ադրբեջանի արտաքին գործերի նախարարների ղեկավարած պատվիրակությունների բանակցությունները: Քննարկման առարկա են տարածաշրջանում ստեղծված անվտանգային իրավիճակին, Հայաստանի և Ադրբեջանի միջև հարաբերությունների կարգավորման գործընթացին վերաբերող հարցեր:
«Կարծում եմ՝ սա դրական զարգացում է, և ես հաջողություն եմ մաղթում դիվանագետներին: Հակամարտությունները պետք է կարգավորվեն խաղաղ ճանապարհով: Մենք համոզված ենք, որ տարածաշրջանային տնտեսական համագործակցությունը կարող է նպաստել խաղաղության, կայունության և մարդկանց բարեկեցության ամրապնդմանը, ինչպես ամրագրված է ՍԾՏՀ կանոնադրությամբ և Խորհրդարանական վեհաժողովի համապատասխան կանոնադրական փաստաթղթերով»,–ասել է նա:
Նշենք, որ Սևծովյան տնտեսական համագործակցության խորհրդարանական վեհաժողովի հիմնադրման 30-ամյակին նվիրված անդամ պետությունների խորհրդարանների ղեկավարների գագաթնաժողովն անցկացվում է Թուրքիայում։ Ալեն Սիմոնյանի գլխավորած պատվիրակությունն Անկարա է մեկնել մայիսի 3-ին։
