ՄԻՊ–ն ԱՄՆ դեսպանին ներկայացրել է Լաչինի միջանցքի արգելափակման հետևանքով առաջացած խնդիրները
21:51 25.04.2023 (Թարմացված է: 21:59 25.04.2023)
© Photo : Facebook / ՀՀ Մարդու իրավունքների պաշտպան - Human Rights Defender of ArmeniaԱնահիտ Մանասյանը ապրիլի 25-ին ընդունել է ՀՀ-ում ԱՄՆ դեսպան Քրիստինա Քվինին
![Անահիտ Մանասյանը ապրիլի 25-ին ընդունել է ՀՀ-ում ԱՄՆ դեսպան Քրիստինա Քվինին Անահիտ Մանասյանը ապրիլի 25-ին ընդունել է ՀՀ-ում ԱՄՆ դեսպան Քրիստինա Քվինին - Sputnik Արմենիա, 1920, 25.04.2023](https://cdn.am.sputniknews.ru/img/07e7/04/19/58747424_0:85:1600:985_1920x0_80_0_0_c5f87ee23cf9144c20a660b6a8d0234c.jpg)
Անահիտ Մանասյանը ապրիլի 25-ին ընդունել է ՀՀ-ում ԱՄՆ դեսպան Քրիստինա Քվինին
Բաժանորդագրվել
Անահիտ Մանասյանը ԱՄՆ դեսպանի հետ հանդիպմանը անդրադարձել է ապրիլի 14-ին Սյունիքի մարզ կատարած այցի արդյունքներին, բարձրաձայնել ադրբեջանական զինված ուժերի գործողությունների հետևանքով սահմանային բնակավայրերում ստեղծված իրավիճակը։
ԵՐԵՎԱՆ, 25 ապրիլի – Sputnik. ՀՀ մարդու իրավունքների պաշտպան Անահիտ Մանասյանը ընդունել է ՀՀ-ում ԱՄՆ դեսպան Քրիստինա Քվինին և նրա ուշադրությունը հրավիրել Ադրբեջանի կողմից Լաչինի միջանցքի արգելափակման հետևանքով արցախահայության իրավունքների պաշտպանության խնդրի հրատապությանը։ Տեղեկությունը հայտնում է ՀՀ մարդու իրավունքների պաշտպանի գրասենյակը։
«Մանասյանը կարևորել է մարդու իրավունքներին վերաբերելի խնդիրների լուծման ուղղությամբ շուտափույթ քայլերի ձեռնարկման անհրաժեշտությունը։ Նա ընդգծել է պատերազմական հանցագործությունների փաստերի ամրագրման և մարդու իրավունքների միջազգային մանդատ ունեցող կազմակերպություններին ու դերակատարներին ներկայացման հարցում հաստատության կատարած աշխատանքները»,– ասված է հաղորդագրությունում։
ՀՀ ՄԻՊ–ն անդրադարձել է նաև ապրիլի 14-ին Սյունիքի մարզ կատարած այցի արդյունքներին, բարձրաձայնել ադրբեջանական զինված ուժերի գործողությունների հետևանքով սահմանային բնակավայրերի բնակչության կյանքի և անվտանգության, սեփականության, ֆիզիկական ու հոգեկան անձեռնմխելիության, երեխաների կրթության իրավունքների խախտումների մասին։
Դեսպանին են ներկայացվել նաև ՀՀ-ում կալանավորված ադրբեջանցի զինծառայողներին տեսակցելու մանրամասները։
Հանդիպմանը կողմերը վերահաստատել են մարդու իրավունքների պաշտպանության ոլորտում համագործակցելու և փոխգործակցության ոլորտներն ընդլայնելու իրենց պատրաստակամությունը: