Երևանում «Նեմեսիս» գործողության հերոսների հիշատակը հավերժացնող հուշակոթող է տեղադրվել
19:37 25.04.2023 (Թարմացված է: 19:40 25.04.2023)
«Նեմեսիս» գործողության հերոսների հիշատակը հավերժացնող հուշակոթող
© Photo : official site of Yerevan municipality
Բաժանորդագրվել
Աղբյուր–հուշակոթողի վրա գրված են Հայոց ցեղասպանությունը կազմակերպած և իրականացրած երիտթուրքերի պարագլուխներից, ինչպես նաև 1918թ. Բաքվի հայերի ջարդի կազմակերպիչներից վրեժ լուծած հերոսների անունները։
ԵՐԵՎԱՆ, 25 ապրիլի – Sputnik. Երևանի կենտրոնում` Օղակաձև զբոսայգու 4-րդ հատվածում, «Նեմեսիս» գործողության հերոսների հիշատակը հավերժացնող աղբյուր–հուշակոթող է բացվել։
«Նեմեսիս» գործողության հերոսների հիշատակը հավերժացնող հուշակոթող
© Photo : official site of Yerevan municipality
Հուշարձանի վրա գրված են Սողոմոն Թեհլիրյանի, Արամ Երկանյանի, Արմեն Գարոյի, Գրիգոր Մերջանովի, Արա Սարգսյանի, Ավետիք Իսահակյանի, Հրաչ Փափազյանի, Շահան Նաթալիի, Հակոբ Մելքումովի, Երվանդ Ֆունդուկյանի, Միսաք Թորլաքյանի, Արշավիր Շիրակյանի, Արշակ Եզդանյանի, Ստեփան Ծաղիկյանի, Արտաշես Գևորգյանի, Պետրոս Տեր Պողոսյանի անունները։ Նրանք 1915թ. Հայոց ցեղասպանությունը կազմակերպած և իրականացրած երիտթուրքերի պարագլուխներից, ինչպես նաև 1918թ. Բաքվի հայերի ջարդի կազմակերպիչներից վրեժ լուծած հերոսներն են։ Այսուհետև սերունդները պատմությանը կծանոթանան նաև այս հուշարձանի միջոցով։
ՀՀ ԳԱԱ պատմության ինստիտուտի տնօրեն Աշոտ Մելքոնյանը նշել է, որ «Նեմեսիս» գործողությունը կարևոր իրադարձությունն է եղել հայ ժողովրդի կյանքում։ Նա հիշեցրել է, որ գործողության կատարման որոշումը կայացվել է 1919 թվականին Երևանում Հայ հեղափոխական դաշնակցության 9-րդ ընդհանուր ժողովում։ Այդ ժամանակ Հայոց ցեղասպանության հանցագործների 650 անուն է նշվել, որոնցից առանձնացվել են 41 գլխավոր հանցագործները։
«Սա զուտ կուսակցական որոշում չէր, այլ ազգային խնդիր, և հայ ժողովուրդն ազգովի լուծեց այն»,– ասել է Մելքոնյանը։
Հուշակոթողի տեղադրման միջնորդությունը ներկայացրել էին Հայոց ցեղասպանության վրիժառուների ժառանգները։ Նրանցից մեկը լրագրող, հաղորդավար Արտյոմ Երկանյանն է` Արամ Երկանյանի հետնորդներից։
«Մենք վրիժառուներին պարտական ենք արժանապատիվ ազգ լինելու համար: Կարո՞ղ եք պատկերացնել, թե ինչ կլիներ, եթե «Նեմեսիս» գործողությունը չիրականացվեր: Մենք հիվանդ ազգ էինք լինելու, հոգեբանական բարդույթներից տառապող: Ես նրանց հաճախ համեմատում եմ հոգեբույժների հետ: Նրանք թույլ են տվել մեզ արժանապատիվ զգալ: Այս մարդիկ ահաբեկիչներ չեն, այլ իրականացնողն են այն արդար դատավճռի, որը կայացվել էր օրինական իրավական ատյանի կողմից: Ես հավատում եմ, որ այն թուրքը, որը կցանկանա իրեն արժանապատիվ զգալ, պետք է գա, խոնարհվի այս հուշարձանի առաջ և հիշի, որ առաջին երկիրը, որը ճանաչել ու դատապարտել է Հայոց ցեղասպանությունը, եղել է Թուրքիան, որը հետո հեռացել է իր այդ սկզբունքից»,- ընդգծել է Երկանյանը:
Նշենք, որ աղբյուր–հուշակոթողը տեղադրվել է Երևանի ավագանու որոշմամբ, քանդակի հեղինակն է ճարտարապետ Տիգրան Բարսեղյանը։
