Ապօրինի ծագում ունեցող գույքի բռնագանձման վերաբերյալ ևս 2 դիմում է ներկայացվել
16:34 22.03.2023 (Թարմացված է: 16:49 22.03.2023)
ՀՀ գլխավոր դատախազություն
© Sputnik / Aram Nersesyan
Բաժանորդագրվել
Հայցադիմումով պահանջվում է բռնագանձումներ կատարել Էրեբունու նախկին թաղապետից և «ԱԼՔՍ» ՍՊԸ–ի տնօրենից։
ԵՐԵՎԱՆ, 22 մարտի – Sputnik. Ապօրինի ծագում ունեցող գույքի բռնագանձման վերաբերյալ ևս երկու հայցադիմում ընդունվել է Հակակոռուպցիոն դատարանի վարույթ, հայտնում են դատախազությունից:
Մեկ հայցադիմումով Երևան քաղաքի Էրեբունի վարչական շրջանի նախկին ղեկավար Արմեն Հարությունյանից պահանջվում է հօգուտ Հայաստանի Հանրապետության բռնագանձել`
Արաբկիր վարչական շրջանի Գուլակյան փողոցում գտնվող տունը, իսկ անհնարինության դեպքում՝ դրա միջին շուկայական արժեքը, որն ընդհանուր կազմում է ավելի քան 82 մլն դրամ,
Շուրջ 312 մլն դրամ՝ որպես օրինական եկամուտներով չհիմնավորվող և բարեխիղճ երրորդ անձանց փոխանցված դրամ:
Մյուս հայցադիմումով պահանջ է ներկայացվել դատարանին «ԱԼՔՍ» ՍՊ ընկերության տնօրեն Ա.Ք.-ից հօգուտ Հայաստանի Հանրապետության բռնագանձել`
Կոտայքի Ծաղկաձոր քաղաքի Տանձաղբյուրի փողոցի քոթեջը, իսկ անհնարինության դեպքում միջին շուկայական արժեքը՝ 73 մլն 950 հազար դրամ,
Երևանի Նորք-Մարաշ վարչական շրջանի Ամառանոցային փողոցում գտնվող անշարժ գույքը, իսկ անհնարինության դեպքում միջին շուկայական արժեքը՝ 90 մլն 950 հազար դրամ,
Երևանի Շենգավիթ վարչական շրջանի Արտաշիսյան փողոցում գտնվող անշարժ գույքը, իսկ անհնարինության դեպքում միջին շուկայական արժեքը՝ 10 մլն 900 հազար դրամ,
Երևանի Շենգավիթ վարչական շրջանի Արտաշիսյան փողոցում գտնվող մեկ այլ անշարժ գույքը, իսկ անհնարինության դեպքում միջին շուկայական արժեքը՝ 13 մլն 665 հազար դրամ,
TOYOTA CAMRY 2.5 GAS մակնիշի տրանսպորտային միջոցը, իսկ անհնարինության դեպքում միջին շուկայական արժեքը՝ 6 մլն 500 հազար դրամ,
PORSCHE CAYENNE S 4.8 մակնիշի տրանսպորտային միջոցը,
«ԱՔԼՍ» ՍՊ ընկերության 100 տոկոս մասնակցությունը,
«Եվրոթեքնոլայթ» ՍՊ ընկերության 100 տոկոս մասնակցությունը,
61 մլն 650 հազար 164 դրամը՝ որպես ապօրինի դրամական միջոցների մնացորդ,
2 մլն 319 հազար 095 դրամի չափով գումարը, որը չի հիմնավորվում անձի օրինական եկամուտներով, ունի ապօրինի ծագում, փոխանցվել է բարեխիղճ ձեռքբերողի կամ հնարավոր չէ նույնականացնել և բռնագանձել:
Հիշեցնենք, որ Sputnik Արմենիայի հարցմանն ի պատասխան ՀՀ գլխավոր դատախազությունից հայտնել էին, որ ՀՀ գլխավոր դատախազությունում 3 տարի առաջ ձևավորված Ապօրինի ծագում ունեցող գույքի բռնագանձման գործերով վարչությունում մինչ օրս նախաձեռնել է 374 ուսումնասիրություն, որից ՀՀ հակակոռուպցիոն դատարան է ներկայացվել 29 հայցադիմում։
