Ձյուն, բուք, մերկասառույց. ինչ իրավիճակ է հայաստանյան ավտոճանապարհներին
Եղանակային պայմանների պատճառով ճանապարհներին խցանումներ. Արխիվային լուսանկար
© Photo : official site of the Police of RA
Բաժանորդագրվել
Որոշ ճանապարհներ դժվարանցանելի են բեռնատարների համար։
ԵՐԵՎԱՆ, 23 փետրվարի – Sputnik. Հանրապետությունում 22։00-ի դրությամբ կան փակ և դժվարանցանելի ճանապարահներ։ ՆԳՆ փրկարար ծառայության լրատվական բաժինը հայտնում է, որ Վարդենյանց լեռնանցքը ձյան և բքի պատճառով փակ է միայն կցորդիչով բեռնատարների համար։ Դիլիջանի ոլորանները դժվարանցանելի են կցորդիչով բեռնատարների համար:
Դժվարանցանելի են Արթիկ-Գեղանիստ ավտոճանապարհը, բեռնատարների համար` Սպիտակի ոլորանները։ Բացի այդ, Սպիտակի ոլորաններում, Գեղարքունիքի մարզի և Արագածի տարածաշրջանի ավտոճանապարհներին տեղ-տեղ մերկասառույց է:
«Սիսիան-«Զանգեր» կոչվող հատվածում, Սպիտակի ոլորաններում, Հրազդանի, Ապարանի, Թալինի, Արագածի, Գյումրիի, Անիի, Արթիկի, Սևանի, Դիլիջանի, Բերդի և Ջերմուկի տարածաշրջաններում տեղում է ձյուն»,– նշված է հաղորդագրության մեջ։
Նշենք, որ Ապարանի և Արագածի տարածաշրջաններում բուք է: Փակ են Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց և Քարի լիճ տանող ավտոճանապարհները։
