Միրզոյանն ու ԵՄ ներկայացուցիչը քննարկել են Լաչինի միջանցքի շուրջ ստեղծված իրավիճակը
20:03 26.01.2023 (Թարմացված է: 20:28 26.01.2023)
Արարատ Միրզոյանն ընդունել է ԵՄ արտաքին գործողությունների եվրոպական ծառայության գլխավոր քարտուղարի քաղաքական հարցերով տեղակալ Էնրիկե Մորային
© Photo : official site of MFA of RA
Բաժանորդագրվել
ԱԳ նախարարի խոսքով` ԵՄ քաղաքացիական մշտադիտարկման առաքելության տեղակայումը կնպաստի տարածաշրջանում կայունության և խաղաղության հաստատմանը։
ԵՐԵՎԱՆ, 26 հունվարի – Sputnik. ՀՀ արտգործնախարար Արարատ Միրզոյանն այսօր ԵՄ արտաքին գործողությունների եվրոպական ծառայության գլխավոր քարտուղարի քաղաքական հարցերով տեղակալ Էնրիկե Մորայի հետ քննարկել է Լաչինի միջանցքի շուրջ ստեղծված իրավիճակը: Տեղեկությունը հայտնում է ԱԳՆ մամուլի ծառայությունը։
Հանդիպմանը կարևորվել է ՀՀ-ԵՄ քաղաքական և անվտանգային հարցերով երկխոսության առաջին նիստի անցկացումը: Քննարկվել են Հայաստան-ԵՄ գործընկերության ընդլայնմանն առնչվող հարցեր:
«Արարատ Միրզոյանը և Էնրիկե Մորան անդրադարձ են կատարել տարածաշրջանային անվտանգության հարցերի: Միրզոյանը բարձր է գնահատել Հայաստանում ԵՄ քաղաքացիական մշտադիտարկման առաքելության տեղակայման մասին որոշումը՝ համոզմունք հայտնելով, որ այն կնպաստի տարածաշրջանում կայունության և խաղաղության հաստատմանը»,– նշված է հաղորդագրության մեջ։
Քննարկել են նաև Հայաստան-Ադրբեջան հարաբերությունների կարգավորման գործընթացի շուրջ վերջին զարգացումները:
Միրզոյանն անդրադարձել է Լաչինի միջանցքի արգելափակման հետևանքով Լեռնային Ղարաբաղում ստեղծված հումանիտար ճգնաժամին։ ՀՀ արտաքին քաղաքական գերատեսչության ղեկավարը շեշտել է, որ Ադրբեջանի գործողությունները 2020թ. նոյեմբերի 9-ի եռակողմ հայտարարության, նաև միջազգային հումանիտար իրավունքի կոպտագույն խախտում են: Նախարարը նշել է, որ Ադրբեջանի միջազգային հանձնառությունների չկատարումը և առավելապաշտական դիրքորոշումը խաթարում են տարածաշրջանում կայունության և անվտանգության հաստատման հայկական կողմի ջանքերը:
Նշենք, որ Մորան Երևան է ժամանել այսօր։ Նա կգլխավորի ՀՀ-ԵՄ քաղաքական և անվտանգային հարցերով երկխոսության առաջին բարձր մակարդակի հանդիպումը։ Հունվարի 23-ին ԵՄ դիվանագիտական ծառայությունը հայտնել էր, որ Եվրամիությունը նախատեսում է Հայաստանի և Ադրբեջանի սահման ուղարկել նոր առաքելություն, որը կունենա մինչև 100 դիտորդ։
Հիշեցնենք` դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից սկսած` ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Լաչինի միջանցքը շարունակում է փակ մնալ։
