Հայկական բանկերը շատ խիստ են վերաբերվում հաճախորդներին. ԿԲ նախագահը` սանկցիաների մասին
Մարտին Գալստյան. Արխիվային լուսանկար
© Sputnik / Asatur Yesayants
Բաժանորդագրվել
Մարտին Գալստյանը խոսեց նաև հայաստանյան բանկի միջոցով Ուկրաինայի քաղաքացու ռիսկային համարված ֆինանսական շարժի մասին։
ԵՐԵՎԱՆ, 13 դեկտեմբերի – Sputnik. ՀՀ ֆինանսական համակարգը խստորեն հետևում է բոլոր միջազգայնորեն ընդունված սանկցիաներին` հնարավոր խնդիրներից խուսափելու համար։ Այս մասին այսօր մամուլի ասուլիսում հայտարարեց ՀՀ ԿԲ նախագահ Մարտին Գալստյանը` հավելելով, որ վերահսկողության առաջին գիծն ապահովում են հենց հայաստանյան բանկերը։
«Բանկերն այս պահի դրությամբ թե՛ մեր հորդորով, թե՛ իրենց աշխատանքի միջոցով փորձում են լավացնել համապատասխանության ֆունկցիան, որի միջոցով մենք հենց առաջին գծով փորձում ենք պաշտպանել բանկին այդ պոտենցիալ ռիսկից։ Բանկերում, ես համոզված եմ, որ օրվա, շաբաթվա, ամսվա կտրվածքով լինում են բազում դեպքեր։ Ու մենք դրա մասին լսում ենք, բայց հակառակ կողմից։ Լսում ենք, որ այս բանկը այս հաճախորդին չսպասարկեց, հայկական բանկերը շատ խիստ են վերաբերվում հաճախորդներին, դրա համար հաճախորդները գնում են այլ երկրներ։ Այդ ամենը վկայում է, որ մեր բանկերը ճիշտ ու պատասխանատու կերպով կարողանում են արձագանքել ռիսկերին»,– ասաց Գալստյանը։
ԿԲ նախագահը հայտնեց, որ հայկական բանկերով իրականացվող ֆինանսական շարժերին ԿԲ–ն ևս հետևում է։
«Այս պահի դրությամբ մեզ հայտնի է երկու դեպք` շատ փոքր դեպքեր` մի քանի հազար կամ մի քանի տասնյակ հազար դոլարի շարժերի հետ կապված, որոնք իրենց մեջ որոշակի վիճահարույց բաներ ունեն։ Շվեյցարական ֆիրմա, որի տնօրենը Ուկրաինայի քաղաքացի է և այլն։ Եղել են ինչ–որ էպիզոդներ»,– ասաց Գալստյանը։
ԿԲ նախագահը շեշտեց՝ ՀՀ ֆինանսական համակարգը պատշաճ վերահսկողության ներքո է։
