Խերսոնի հարցում չեն բացառվում բարդ որոշումները. ՌԴ գեներալ
ՌԴ զորքի միացյալ խմբավորման հրամանատար, բանակի գեներալ Սերգեյ Սուրովիկինը. Արխիվային լուսանկար
© Sputnik / Сергей Гунеев
Բաժանորդագրվել
Բանակի գեներալ Սերգեյ Սուրովիկինը նշել է, որ ուկրաինական զորքը Խորսոնում նպատակաուղղված հարվածներ է հասցնում ենթակառուցվածքներին և բնակելի տներին։
ԵՐԵՎԱՆ, 18 հոկտեմբերի – Sputnik. Խերսոնում բնակիչների համար վտանգավոր իրավիճակ է ստեղծվել, չեն բացառվում բարդ որոշումները։ Այս մասին լրագրողներին հայտնել է Հատուկ ռազմական գործողության անցկացման շրջանում ՌԴ զորքի միացյալ խմբավորման հրամանատար, բանակի գեներալ Սերգեյ Սուրովիկինը։
Ինչպես նշել է գեներալը, դժվարացել է պարենամթերքի մատակարարումը, խնդիրներ կան ջրամատակարարման և էլեկտրամատակարարման հետ։
«HIMARS ռեակտիվ արկերը վնասել են Անտոնովի կամուրջն ու Կախովսկայա ՀԷԿ–ի արգելապատնեշը, երթևեկությունն այդտեղ դադարեցվել է, ինչի հետևանքով դժվարացել է քաղաք սննդամթերքի մատակարարումը, որոշակի խնդիրներ են նկատվում ջրամատակարարման և էլեկտրամատակարարման հարցում։ Այս ամենը ոչ միայն զգալի դժվարացնում է քաղաքի բնակիչների առօրյան, այլև անմիջական սպառնալիք է ստեղծում նրանց կյանքի համար», – ասել է Սուրովիկինը։
Ըստ նրա` տվյալ ուղղությամբ բարդ իրավիճակ է ստեղծվել։ Հակառակորդը նպատակաուղղված հարվածներ է հասցնում Խերսոնի ենթակառուցվածքներին և բնակելի տներին։
Միևնույն ժամանակ գեներալը վստահեցրել է, որ ՌԴ բանակը ժամանակին կիրականացնի Խերսոնի մարզից խաղաղ բնակիչների տարհանումը։
«Այս պայմաններում մեր առաջնահերթ խնդիրը խաղաղ քաղաքացիների կյանքի ու առողջության պահպանումն է։ Այդ պատճառով նախևառաջ ռուսական բանակը կապահովի մարդկանց անվտանգ, արդեն իսկ հայտարարված դուրսբերումը ՌԴ կառավարության նախապատրաստվող վերաբնակեցման ծրագրով», – ասել է նա։
Ինչ վերաբերում է կոնկրետ մարզկենտրոնին` Խերսոն քաղաքին, ապա Սուրովիկինն ընդգծել է, որ ՌԴ ԶՈւ ծրագրերն ու գործողությունները կախված կլինեն ռազմամարտավարական իրավիճակից։
«Կրկնում եմ` այն արդեն այսօրվա դրությամբ բավական բարդ է։ Այնուամենայնիվ, ինչպես արդեն ասել եմ, մենք ելնելու ենք խաղաղ բնակիչների և մեր զինծառայողների կյանքն առավելագույնս պահպանելու անհրաժեշտությունից։ Գործելու ենք գիտակցաբար, ժամանակին, չեմ բացառում նաև բարդ որոշումների կայացումը», – նշել է գեներալը։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 236-րդ օրը։
