ԱՄՆ-ն կշարունակի աջակցել Երևանին և Բաքվին վիճելի հարցերը խաղաղ ճանապարհով լուծելու համար
11:15 05.10.2022 (Թարմացված է: 11:31 05.10.2022)
ԱՄՆ պետդեպարտամենտ
© AP Photo / J. Scott Applewhite
Բաժանորդագրվել
Բլինկենը ընդգծել է, որ Հայաստանի և Ադրբեջանի միջև խնդիրները պետք է լուծվեն միայն դիվանագիտական ճանապարհով։
ԵՐԵՎԱՆ, 5 հոկտեմբերի – Sputnik. ԱՄՆ պետքարտուղար Էնթոնի Բլինկենը ողջունել է 17 հայ ռազմագերիների վերադարձը Ադրբեջանից Հայաստան։ Տեղեկությունը հայտնում է ԱՄՆ պետքարտուղարի մամուլի ծառայութունը։
«Բլինկենը ողջունել է հայ զինվորականների փոխանցումը Հայաստանին և վերահաստատել Միացյալ Նահանգների հանձնառությունը` օգնելու Հայաստանին և Ադրբեջանին լուծել խնդիրները խաղաղ ճանապարհով, ընդգծվել է, որ դիվանագիտությունը միակ ճանապարհն է»- հայտարարել է ԱՄՆ պետքարտուղարությունը:
Միաժամանակ, Բլինկենը թվիթերյան իր էջում գրառում է արել` անդրադառնալով ՀՀ ԱԳ նախարար Արարատ Միրզոյանի և Ադրբեջանի ԱԳ նախարար Գեյհուն Բայրամովի հետ երեկ կայացած հեռախոսազրույցին։ Բլինկենը նշել է, որ նախարարների հետ զրուցել է կայուն խաղաղ համաձայնության հասնելու քայլերի մասին։ Նրա խոսքով` ԱՄՆ–ն գնահատում է, որ Հայաստանն ու Ադրբեջանը ձեռնարկում են այդ կարևոր քայլը։
I spoke with Azerbaijani Foreign Minister @Bayramov_Jeyhun and Armenian Foreign Minister @AraratMirzoyan today on steps to reach a sustainable peace agreement between Armenia and Azerbaijan. We appreciate that Armenia and Azerbaijan are taking this critical move forward.
— Secretary Antony Blinken (@SecBlinken) October 4, 2022
Հիշեցնենք` ադրբեջանական կողմը հոկտեմբերի 4–ին հայկական կողմին վերադարձրեց 17 հայ ռազմագերիների: ՀՀ ՊՆ հրապարակել էր նրանց անուններն ու նշել, որ Ադրբեջանը գերիներին վերադարձրել է ԱՄՆ–ի միջնորդությամբ։
Նշենք, որ մինչ այդ, հոկտեմբերի 4–ին` ամերիկյան կողմի նախաձեռնությամբ տեղի էր ունեցել ՀՀ ԱԳ նախարար Արարատ Միրզոյանի, ԱՄՆ պետքարտուղար Էնթոնի Բլինկենի և Ադրբեջանի ԱԳ նախարար Ջեյհուն Բայրամովի հեռախոսազրույցը: Կողմերը կարծիքներ էին ներկայացրել հոկտեմբերի 2-ին Ժնևում կայացած հանդիպման վերաբերյալ:
Իսկ սեպտեմբերի 19–ին ամերիկյան կողմի նախաձեռնությամբ Նյու Յորքում տեղի ունեցավ Միրզոյան-Բլինկեն-Բայրամով եռակողմ հանդիպումը։
Հուլիսի 16-ին Թբիլիսիում կայացել էր Հայաստանի և Ադրբեջանի արտաքին գործերի նախարարների առաջին հանդիպումը: Այն տեղի էր ունեցել Վրաստանի ԱԳ նախարար Իլյա Դարչիաշվիլիի հյուրընկալությամբ։
Հայաստանի և Ադրբեջանի արտգործնախարարները մայիսին էլ եռակողմ հանդիպում էին ունեցել Դուշանբեում` Ռուսաստանի արտաքին քաղաքական գերատեսչության ղեկավար Սերգեյ Լավրովի մասնակցությամբ։
