Եթե հավանում է ՀՀ-ում աշխատելը, խնդրեմ. Պուտինը և Փաշինյանը քննարկել են միգրացիոն հոսքերը
14:30 07.09.2022 (Թարմացված է: 14:39 07.09.2022)
![Նիկոլ Փաշինյանի և Վլադիմիր Պուտինի հանդիպումը Նիկոլ Փաշինյանի և Վլադիմիր Պուտինի հանդիպումը - Sputnik Արմենիա, 1920, 07.09.2022](https://cdn.am.sputniknews.ru/img/07e5/07/07/28208761_0:0:3107:1748_1920x0_80_0_0_c94ade3ccb9d8f58a70420fc0c7cabaa.jpg)
Նիկոլ Փաշինյանի և Վլադիմիր Պուտինի հանդիպումը. Արխիվային լուսանկար
© Sputnik / Алексей Дружинин
/ Բաժանորդագրվել
Պուտինն ակնարկեց, որ Ռուսաստան գնացած հայաստանցիների թիվն այս տարի անհամեմատ ավելի մեծ է, քան ՀՀ եկած ռուսաստանցիներինը։ Փաշինյանին այդ փաստը չզարմացրեց։
ԵՐԵՎԱՆ, 7 սեպտեմբերի – Sputnik. Ռուս-ուկրաինական ճգնաժամի հետևանքով հազարավոր ռուսաստանցիներ տեղափոխվել են Հայաստան` արևմտյան սահմանափակումներից խուսափելու համար։
Ռուսաստան մեկնած հայաստանցի աշխատանքային միգրանտների թիվը ևս փոքր չէ։
Այս հարցն այսօր քննարկել են ՀՀ վարչապետ Նիկոլ Փաշինյանն ու ՌԴ նախագահ Վլադիմիր Պուտինը` Վլադիվոստոկում անցկացվող Արևելյան տնտեսական 7-րդ համաժողովի ընթացքում։
«Շատերը Հայաստան են տեղափոխվել, որպեսզի կարողանան աշխատավարձ ստանալ, քանի որ նրանք փաստացի գտնվելով Ռուսաստանում, աշխատում են արտասահմանում։ Ֆինանսական փոխանցումների պատճառով նրանք տեղափոխվել են Հայաստան։Հուսով եմ,մ որ այս տեղաշարժերը Ռուսաստանում ընկալվում են որպես շարժում ԵԱՏՄ ներսում։ Իսկ ԵԱՏՄ–ն հենց այդ նպատակով էլ ստեղծվել է, որ ազատ տեղաշարժ ապահովի` ապրանքների, ծառայությունների, աշխատուժի համար։ Այն, ինչ մենք տեսնում ենք իրականում»,– ասաց Փաշինյանը։
ՀՀ վարչապետը շեշտեց, որ հունվար–փետրվարին Հայաստանում բարձր տնտեսական աճ էր ակնկալվում, բայց մարտին խնդիրներ ի հայտ եկան, որոնք լուծվեցին շնորհիվ Հայաստան տեղափոխված ժամանակավոր միգրանտների։
Փաշինյանը նշեց, որ ռուսաստանցիների ներհոսքի արդյունքում Հայաստանում էապես բարձրացել են անշարժ գույքի վաճառքի ու վարձակալության գները, բայց դա միաժամանակ նաև բնակարանային շինարարության ակտիվացման առիթ է դարձել ինչի մասին վկայում է շինարարության այս տարվա 13 տոկոսանոց աճը։
«Կարծում եմ Ռուսաստանի բիզնեսը ևս շահագրգռված է այդ ոլորտում ներդրումներ անելու»,– ասաց Փաշինյանը։
ՌԴ նախագահ Վլադիմիր Պուտինը ակնարկեց, որ Ռուսաստան գնացած հայաստանցիների թիվն այս տարի անհամեմատ ավելի մեծ է` շուրջ 2 մլն մարդ։ Փաշինյանն էլ ասաց, որ նման մեծ թիվն իրեն չի զարմացնում։
«Ոչ մի նոր բան չկա դրանում, որ հայերը ՌԴ են մեկնում աշխատելու»,– ասաց նա։
Անդրադառնալով Ռուսաստանից հիմնականում ՏՏ ոլորտի մասնագետների և ընկերությունների արտահոսքի թեմային` ՌԴ նախագահը մասնավորապես ասաց. «Ես լիովին համաձայն եմ Նիկոլ Վովաևիչի հետ, կարելի է աշխատել Երևանում, իսկ բնակվել փաստացի Մոսկվայում, – ասաց Պուտինը,– եթե ինչ–որ մեկին դուրս է գալիս աշխատել Հայաստանում, խնդրեմ, այնպես, ինչպես, ասենք, Նիկոլ Վովաևիչն ինձանից չի նեղանա, սա կարգավորման տրենդի մեջ է, եթե ինչ-որ մեկին դուրս է գալիս ապրել Բաքվում, թող ապրեն Բաքվում, Ղազախստանում մենք ևս շատ լավ ֆինանսական գոտի ենք ստեղծել։ Բայց, իհարկե այն ամենը, ինչ կապված է ԵԱՏՄ-ի հետ, մարդկանց ավելի հեշտ է աշխատել այդ տարածքում, դա ակնհայտ է»։
Պաշտոնական վիճակագրության համաձայն` Հայաստանի Հանրապետություն 2022 թվականի առաջին կիսամյակում մուտք է գործել 372 086 ՌԴ քաղաքացի, որոնցից 331 306–ը լքել է երկրի տարածքը, իսկ 40 780–ն ավելի երկար ժամկետով են մնացել Հայաստանում։