ԵՄ–ն լիովին աջակցում է ԵԱՀԿ Մինսկի խմբի հովանու ներքո գործընթացի առաջմղմանը. Վիկտորին
14:33 22.08.2022 (Թարմացված է: 15:00 22.08.2022)
© Photo : Facebook / ՇԻՐԱԿԻ ՄԱՐԶՊԵՏԱՐԱՆԱնդրեա Վիկտորին
© Photo : Facebook / ՇԻՐԱԿԻ ՄԱՐԶՊԵՏԱՐԱՆ
Բաժանորդագրվել
Հայաստանում ԵՄ դեսպանը նշել է, որ Շառլ Միշելի միջնորդական ջանքերը ԼՂ կարգավորման հետ կապված հարցերում մրցակցություն չէ Մինսկի խմբի հետ, այլ փոխլրացում։
ԵՐԵՎԱՆ, 22 օգոստոսի – Sputnik. ԵՄ–ն լիովին աջակցում է ԵԱՀԿ Մինսկի խմբի հովանու ներքո գործընթացի առաջմղմանը: «Արմենպրեսի» հետ հարցազրույցում այս մասին հայտնել է Հայաստանում Եվրոպական միության պատվիրակության ղեկավար, դեսպան տիկին Անդրեա Վիկտորինը։
Նշենք, որ Վիկտորինից հետաքրքրվել են, թե ԵԽ նախագահ Շառլ Միշելի միջնորդությունը ԵԱՀԿ Մինսկի խմբի համանախագահության ձևաչափի տրամաբանության մե՞ջ է, թե՞ ինչ-որ առումով առանձին կամ զուգահեռ նախաձեռնություն է:
«ԵՄ-ն այժմ ավելի ակտիվ դիրք է ստանձնել և տեսանելի դեր է խաղում հնարավոր ամենաբարձր մակարդակով՝ ի դեմս նախագահ Միշելի, ինչպես նաև Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարի կանոնավոր խորհրդակցությունների և այցերի միջոցով: Մենք մշտական կապի մեջ ենք, Միշելն անձամբ է ներգրավված: Այս ջանքերը ոչ մի կերպ մրցակցության նպատակ չունեն կամ ուղղված չեն այլ դերակատարների դեմ. պետք է ընդգծեմ սա, քանի որ շատ են շահարկումներն այս հարցի շուրջ: Մենք պետք է խոսենք փոխլրացման, ոչ թե մրցակցության մասին»,–ասել է ԵԽ դեսպանը։
Նրա խոսքով` երեք եռակողմ հանդիպումները՝ 2021 թ. դեկտեմբերին, 2022 թ. ապրիլին և մայիսին Բրյուսելում, նպատակ ունեին աջակցելու խնդրի կայուն հանգուցալուծմանը: Նա հիշեցրել է, որ ԵՄ հատուկ ներկայացուցիչ Տոյվո Կլաարը նախաձեռնել է բարձր մակարդակի հանդիպումներ Հայաստանի ԱԽ քարտուղար Արմեն Գրիգորյանի և Ադրբեջանի նախագահի խորհրդական Հիքմեթ Հաջիևի միջև:
Վիկտորինը նշել է, որ Եվրամիությունն իսկապես հանձնառու է շարունակելու ջանքերն այդ ձևաչափերում:
«Բնականաբար, մենք լսում ենք երկու երկրների ցանկությունները: Բայց կրկնում եմ՝ սա մրցակցություն չէ, սա փոխլրացում է այլ ջանքերի միջոցով: Մենք ողջունում ենք նաև Հայաստանի և Ադրբեջանի արտգործնախարարների ուղիղ շփումը, որ տեղի ունեցավ հուլիսի 16-ին Թբիլիսիում: ԵՄ-ն ողջունում է ուղիղ կապը, որ հաստատվել է երկու արտգործնախարարների միջև: Կարծում եմ՝ բոլոր այս տարրերը միավորվում են, և ջանքեր են գործադրվում երկու երկրների միջև կայուն լուծում գտնելու նպատակով»,–ասել է ԵՄ դեսպանը։
Նրանից հետաքրքրվել են նաև Հայաստանի և Թուրքիայի միջև հարաբերությունների կարգավորման, սահմանի բացման իրական հնարավորությունների շուրջ ԵՄ դիրքորոշումը։ Ի պատասխան Վիկտորինը նշել է, որ ԵՄ–ն միշտ ակտիվորեն աջակցում է հարաբերությունների նորմալացման գործընթացներին:
Նրա խոսքով` ԵՄ–ն տարիներ շարունակ ակտիվ է եղել և աջակցել է Հայաստանի և Թուրքիայի հարաբերությունների կարգավորմանը: Ուստի, ըստ նրա, ԵՄ–ն ուզում է առաջընթաց տեսնել, քանի որ դա շահավետ է ժողովուրդների համար և նոր հնարավորություններ կբացի: