«Սուրմալուում» մահացածների լուսանկարների հրապարակումը խնդրահարույց է. ԱՏՊ գործակալություն
12:02 17.08.2022 (Թարմացված է: 12:15 17.08.2022)
© Sputnik / Andranik Ghazaryan«Սուրմալուն» աղետից հետո
«Սուրմալուն» աղետից հետո
© Sputnik / Andranik Ghazaryan
Բաժանորդագրվել
Նշվում է, որ մարդու անձնական և ընտանեկան կյանքին վերաբերող տեղեկություն տարածելու դեպքերում անհրաժեշտ է, որ լրատվամիջոցը հստակ նշի նպատակը և գնահատի՝ արդյոք առկա՞ է հանրային այնպիսի շահ, որպեսզի տարածվի մարդու անձնական և ընտանեկան կյանքին վերաբերող տեղեկություն։
ԵՐԵՎԱՆ, 17 օգոստոսի – Sputnik. Անձնական տվյալների պաշտպանության գործակալությունը խնդրահարույց է համարում Երևանի «Սուրմալու» առևտրի կենտրոնում տեղի ունեցած պայթյունի հետևանքով մահացածների լուսանկարների հրապարակումը։
«Եթե անհետ կորածների տվյալների հրապարակման նպատակները և հրապարակվող տվյալների համաչափությունը առերևույթ խնդրահարույց չէ, քանի որ դրանք հրապարակվում են տվյալ քաղաքացիների վերաբերյալ տեղեկություն ստանալու համար, ապա զոհերի, մասնավորապես՝ մահացած կնոջ և իր երեխայի լուսանկարի հրապարակման նպատակը որոշակի մտահոգությունների տեղիք է տվել:
«Անձնական տվյալների պաշտպանության մասին» ՀՀ օրենքը չի արգելում կամ թույլատրում այս կամ այն անձնական տվյալի մշակումը, այլ սահմանում է տվյալների մշակման ընդհանուր կանոններ և սկզբունքներ, որոնք վերաբերում են անձնական տվյալների ցանկացած, այդ թվում՝ լրագրողական նպատակով մշակմանը»,- այս մասին հայտնել են գործակալության «Ֆեյսբուքի» էջում։
Նշվում է, որ անձնական տվյալների մշակման՝ լրագրողների ազատությունների, այդ թվում՝ արտահայտվելու ազատության իրավունքի իրացման շրջանակը սահմանված է «Զանգվածային լրատվության մասին» ՀՀ օրենքով, ինչպես նաև լրագրողի կողմից անձնական տվյալների մշակման հիմքեր են նաև այլ իրավական ակտերով, միջազգային իրավական ակտերով սահմանված դեպքերը։
«Նման իրադարձությունն ինքնին գտնվում է հանրային հետաքրքրության դաշտում, սակայն անգամ նման դեպքերի վերաբերյալ տեղեկություններ տրամադրելու շրջանակում կարևոր է չանտեսել համացանցում մարդկանց տվյալների պաշտպանության կարևորությունը և տվյալների մշակման հնարավոր ռիսկերը: Այսպես, անձնական տվյալների մշակման և մարդու անձնական և ընտանեկան կյանքին վերաբերող տեղեկություն տարածելու դեպքերում անհրաժեշտ է, որ լրատվամիջոցը հստակ նշի նպատակը և գնահատի՝ արդյոք առկա է հանրային այնպիսի շահ, որպեսզի տարածվի մարդու անձնական և ընտանեկան կյանքին վերաբերող տեղեկություն»,- ասված է հաղորդագրությունում:
Նշվում է, որ տվյալները պետք է մշակվեն այն քանակով, որն անհրաժեշտ է սահմանված նպատակին հասնելու համար։ Այս առումով կարևոր է հաշվի առնել, որ խոսքը տվյալները համացանցում հրապարակելու մասին է, երբ հրապարակված տվյալները հասանելի են դառնում անորոշ թվով այլ անձանց, և ըստ այդմ, կարող են ավելի էականորեն միջամտել օրինակ` զոհերի ընտանիքների, վիրավորների, անհետ կորածների ընտանիքների և ողջ գտնվելուց հետո նրանց կյանքին:
«Սուրմալու» առևտրի կենտրոնում տեղի ունեցած դժբախտ դեպքի լուսաբանման ընթացքում լրատվամիջոցները և սոցիալական ցանցերում տեղեկություններ տարածող այլ անձինք պետք է հաշվի առնեն համացանցի առանձնահատկությունները և տվյալների մշակման վերոնշյալ սկզբունքները:
Հիշեցնենք՝ «Սուրմալու» առևտրի կենտրոնում պայթյուն է տեղի ունեցել օգոստոսի 14-ին՝ մոտավորապես 13։23-ին։ Երևան քաղաքի ԲԿ-ներ էին դիմել 60 քաղաքացիներ, որոնցից 5-ը շարունակում են բուժում ստանալ, իսկ մյուսները, ստանալով համապատասխան բուժօգնություն, դուրս են գրվել։
Այս պահին հայտնի է, որ 16 մարդ մահացել է, դեռևս 2 մարդ որոնվում է։