Տան կանխավճար են ուզել քաղաքացիներից և յուրացրել գումարները. մեկ անձ ձերբակալվել է
13:44 09.08.2022 (Թարմացված է: 14:42 09.08.2022)
Բաժանորդագրվել
«Մի կտուրի տակ» անվանումով կազմակերպությունը մի խումբ քաղաքացիների է խաբել և խոշոր չափի գումարներ հափշտակել։
ԵՐԵՎԱՆ, 9 օգոստոսի – Sputnik. «Մի կտուրի տակ» անվանումով սպառողական կոոպերատիվների ղեկավարները մի խումբ քաղաքացիների են խաբել և տուն տրամադրելու պատրվակով կանխավճարներ վերցրել։ Տեղեկությունը հայտնում է Քննչական կոմիտեն։
Մասնավորապես, պարզվել է, որ մի շարք անձինք, ներկայանալով որպես բարերար, սոցիալապես անապահով բազմաթիվ քաղաքացիների խոստացել են աշխատանքով ապահովել, նրանց համար Երևանի մերձակայքում սեղմ ժամկետներում, շուկայականից զգալի ցածր գներով, անտոկոս, էկո բնակարաններ կառուցել։ 2018-2019թթ. հիմնադրել են «Մի կտուրի տակ» անվանումով թվով 10 սպառողական կոոպերատիվներ, ինչպես նաև համանուն ՀԿ, որոնց անդամակցել են բազմաթիվ քաղաքացիներ, և որպես անդամավճար փոխանցել են 2000-ական դրամ:
Ավելին, վերջիններս քաղաքացիներին հավաստիացրել են, թե իրենց ծրագրի իրականացման համար պետական աջակցություն ունեն և կարճ ժամանակահատվածում սպառողներին են հանձնելու բնակելի թաղամաս։ Նրանք պահանջել են կանխավճար անել` իբր պատահական զուգադիպությամբ ազատված տեղերում գրանցվելու և բնակարան ստանալու համար։
Բազմաթիվ քաղաքացիներ իբրև կանխավճար նշված սպառողական կոոպերատիվների հաշվեհամարին են փոխանցել խոշոր չափերի գումարներ, որոնք հափշտակել են կոոպերատիվների ղեկավարները:
Մեկ անձի մեղադրանք է առաջադրվել՝ խարդախությամբ խոշոր չափերի գումար հափշտակելու համար: Նախաքննությունը շարունակվում է:
