Անթույլատրելի ենք համարում ադրբեջանական կողմից հնչող հայտարարությունները. ՀՀ ԱԳՆ
20:05 03.08.2022 (Թարմացված է: 20:46 03.08.2022)
© Sputnik / Andranik GhazaryanՀայաստանի արտաքին գործերի նախարաության շենքը
![Հայաստանի արտաքին գործերի նախարաության շենքը Հայաստանի արտաքին գործերի նախարաության շենքը - Sputnik Արմենիա, 1920, 03.08.2022](https://cdn.am.sputniknews.ru/img/2255/04/22550498_0:85:1600:985_1920x0_80_0_0_b9062792a98dd3d14ad83c32cbb7de55.jpg)
© Sputnik / Andranik Ghazaryan
Բաժանորդագրվել
Հայաստանը միջազգային հանրությանը կոչ է արել Ադրբեջանի ագրեսիվ կեցվածքն ու գործողությունները կասեցնելու և դրա համար անհրաժեշտ միջազգային մեխանիզմներ գործարկելու միջոցներ ձեռնարկել:
ԵՐԵՎԱՆ, 3 օգոստոսի – Sputnik. Ադրբեջանը շարունակում է Լեռնային Ղարաբաղի բնակչությանը ահաբեկելու, Լեռնային Ղարաբաղն էթնիկ զտման ենթարկելու և Լեռնային Ղարաբաղի սողացող օկուպացման ծրագրավորված քաղաքականությունը` չնայած հայկական կողմի՝ տարածաշրջանում կայունության և խաղաղության հասնելու ուղղությամբ իրականացվող քայլերին: Այս հայտարարությունն արել է ՀՀ արտաքին գործերի նախարարության մամուլի ծառայությունը։
Նշենք, որ օգոստոսի 3-ին Ադրբեջանի զինված ուժերը, հերթական անգամ խախտելով Հայաստանի, Ռուսաստանի և Ադրբեջանի ղեկավարների՝ Լեռնային Ղարաբաղի հակամարտության գոտում կրակի դադարեցման մասին 2020թ․ նոյեմբերի 9-ի եռակողմ հայտարարությունը, ագրեսիա են ձեռնարկել ռուսական խաղաղապահ զորքերի պատասխանատվության գոտում։
«Անթույլատրելի ենք համարում ադրբեջանական կողմից հնչող հայտարարությունները, որոնցով փորձ է արվում միակողմանիորեն փոփոխել Լաչինի միջանցքում եռակողմ հայտարարության 6-րդ կետով սահմանված իրավական ռեժիմը։ Վերահաստատում ենք` Լաչինի միջանցքով անցնող երթուղին կարող է փոփոխվել միայն հայտարարությունը ստորագրած կողմերի հաստատած պլանի համաձայն։ Նոյեմբերի 9-ի հայտարարությամբ` կողմերի համաձայնեցմամբ առաջիկա 3 տարում կորոշվի Հայաստանի հետ Լեռնային Ղարաբաղի կապն ապահովող Լաչինի միջանցքով երթևեկության նոր երթուղու կառուցման պլանը, ռուսական խաղաղապահ զորակազմի հետագա վերատեղաբաշխմամբ՝ այդ երթուղու պահպանության համար»,- ասված է ԱԳՆ-ի հայտարարությունում։
Գերատեսչություն ընդգծել է, որ մինչ օրս եռակողմ ձևաչափով հաստատված նման պլան չկա, և կոչ է արել բոլոր կողմերին հավատարիմ մնալ իրենց ստանձնած պարտավորություններին։
Հայկական կողմը ևս մեկ անգամ արձանագրել է, որ Հայաստանը կատարել է բոլոր իր պարտավորությունները: Նշվում է, որ նոյեմբերի 9-ի եռակողմ հայտարարության մի շարք կետերի չկատարման պատճառը Ադրբեջանի կողմից դրանց կամայական մեկնաբանություններն են, շարունակվող ագրեսիվ հռետորաբանությունն ու գործողությունները:
Հայաստանը, վերահաստատելով իր հավատարմությունը տարածաշրջանում խաղաղություն և կայունություն հաստատելու օրակարգին, միջազգային հանրությանը կոչ է անում Ադրբեջանի ագրեսիվ կեցվածքն ու գործողությունները կասեցնելու և դրա համար անհրաժեշտ միջազգային մեխանիզմներ գործարկելու միջոցներ ձեռնարկել:
ԱԳՆ-ն հիշեցրել է, որ նմանօրինակ ագրեսիայի և հրադադարի խախտման դեպքեր են հանդիսանում այս տարվա մարտի 24-ին ադրբեջանական զինված ուժերի անօրինական առաջխաղացումը Փառուխ գյուղի ուղղությամբ, 2020 թվականի դեկտեմբերին 11-ին Խծաբերդ և Հին Թաղեր գյուղերի ուղղությամբ ձեռնարկված գրոհը, որոնք նույնպես գտնվում են Արցախում ՌԴ խաղաղապահ զորախմբի պատասխանատվության գոտում:
Հիշեցնենք` այսօր ժամը 09։00-ից ադրբեջանական ստորաբաժանումները թիրախավորել են ՊԲ մարտական դիրքերն ու զորամասերից մեկի մշտական տեղակայման վայրը՝ կիրառելով տարբեր տրամաչափի հրաձգային զինատեսակներ, ականանետներ, նռնականետներ և հարվածային ԱԹՍ-ներ։ Հայկական կողմն ունի 2 զոհ և 14 վիրավոր։