Գրոհայինները հարյուրավոր քաղաքացիական անձանց են պահում Սևերոդոնեցկի «Ազոտ» գործարանում
23:56 09.06.2022 (Թարմացված է: 09:01 10.06.2022)
ՌԴ պաշտպանության կառավարման ազգային կենտրոնի պետ, գեներալ-գնդապետ Միխայիլ Միզինցևը. Արխիվային լուսանկար
© Sputnik / Пресс-служба Минобороны РФ
/ Բաժանորդագրվել
Ազգայնականներն ականապատել են քիմիապես վտանգավոր նյութերով տարաները, որոնք պատրաստվում են պայթեցնել նահանջի ժամանակ:
ԵՐԵՎԱՆ, 9 հունիսի - Sputnik. Գրոհայինները Սևերոդոնեցկի հարյուրավոր բնակիչների են պահում տեղի «Ազոտ» գործարանում, նրանք ականապատել են քիմիկատներով լի տարաները: Տեղեկությունը հայտնել է ՌԴ պաշտպանության կառավարման ազգային կենտրոնի պետ, գեներալ-գնդապետ Միխայիլ Միզինցևը:
«Լուգանսկի Ժողովրդական Հանրապետության Սևերոդոնեցկում, «Ազոտ» գործարանի ստորգետնյա կառույցներում Ուկրաինայի զինված ուժերի գրոհայինները բռնությամբ պահում են քաղաքի հարյուրավոր բնակիչների ու ձեռնարկության աշխատակիցների», - ասել է նա:
Միզինցևի խոսքով՝ ազգայնականներն ականապատել են քիմիապես վտանգավոր նյութերով տարաները, որոնք պատրաստվում են պայթեցնել նահանջի ժամանակ:
Բացի այդ, գեներալի խոսքով, ուկրաինացի զինվորականները հրետանի ու ՀԿՌՀ-ներ են տեղակայել Դոնեցկի Ժողովրդական Հանրապետության Կրամատորսկի «Կոնդիցիոներ» գործարանում ու աշխատակիցներին բռնությամբ պահում են ձեռնարկության տարածքներում:
Միևնույն ժամանակ, անցած օրվա ընթացքում Ուկրաինայի և Դոնբասի վտանգավոր շրջաններից Ռուսաստան առանց Կիևի մասնակցության տարհանվել է ավելի քան 20,7 հազար մարդ:
«Չնայած պաշտոնական Կիևի ստեղծած բոլոր դժվարություններին, անցած օրվա ընթացքում առանց Ուկրաինայի իշխանության մասնակցության Ուկրաինայի վտանգավոր շրջաններից ու Դոնբասի հանրապետություններից Ռուսաստանի Դաշնության տարածք է տարհանվել 20 հազար 733 մարդ, այդ թվում՝ 2880 երեխա։ Իսկ հատուկ ռազմական գործողության սկսվելուց ի վեր՝ 1 751 289 մարդ, որոնցից 281 819-ը երեխաներ են»,- ասել է Միզինցևը:
Նրա խոսքով՝ ՌԴ պետական սահմանը հատել է 255 806 միավոր անձնական ավտոմոբիլային տրանսպորտ, անցած օրվա ընթացքում՝ 3777 միավոր:
Նա նշել է, որ արդեն 1138 մարդասիրական ակցիա է անցկացվել։ Դրանցից ութը անցած օրվա ընթացքում իրականացվել են ԴԺՀ-ում ու ԼԺՀ-ում, Խարկովի և Խերսոնի մարզերում: Խաղաղ բնակչությանը փոխանցվել է 537 տոննա մարդասիրական օգնություն։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 105-րդ օրը։
