Հակոբ Արշակյանը հանդիպել է Իսրայելի Քնեսեթի պատվիրակության հետ
20:44 25.04.2022 (Թարմացված է: 09:55 26.04.2022)
© Photo : official site of the Parliament of RA
Բաժանորդագրվել
Իսրայել-Հայաստան բարեկամության խմբի նախագահը նշել է, որ իր առաջին այցը Հայաստան ապրիլի 24-ին էր պլանավորել 1,5 մլն սպանվածների հիշատակը հարգելու համար:
ԵՐԵՎԱՆ, 25 ապրիլի – Sputnik. Ազգային ժողովի փոխնախագահ Հակոբ Արշակյանը և ԱԺ Հայաստան-Իսրայել բարեկամական խմբի անդամները հանդիպել են Քնեսեթի Իսրայել-Հայաստան բարեկամության խմբի նախագահ, «Մերեց» կուսակցության պատգամավոր Մոսի Ռազի գլխավորած պատվիրակության հետ: Տեղեկությունը հայտնում են ՀՀ ԱԺ մամուլի ծառայությունից։
Հանդիպման ընթացքում ԱԺ փոխնախագահը հույս է հայտնել, որ Իսրայելը կճանաչի Հայոց ցեղասպանությունը:
«Հայ և հրեա ժողովուրդները, որոնք վերապրել են ցեղասպանության արհավիրքները, ունեն բարոյական պարտականություն՝ համախմբելու ջանքերն այս հարցում»,-ասել է նա:
ԱԺ փոխնախագահը խնդրահարույց է համարել Իսրայել-Ադրբեջան ռազմատեխնիկական համագործակցությունը և հատկապես 2020թ–ի 44-օրյա պատերազմի օրերին Ադրբեջանին սպառազինությունների մատակարարումները չդադարեցնելը:
Նշենք, որ «Մերեց» կուսակցությունը քննադատել է իսրայելական կողմից Ադրբեջանին սպառազինություն տրամադրելու փաստը և միշտ կողմնակից է եղել Հայոց ցեղասպանության ճանաչմանը:
ԱԺ փոխնախագահ Հակոբ Արշակյանը, ԱԺ Հայաստան-Իսրայել բարեկամական խմբի ղեկավար Ծովինար Վարդանյանը, խմբի անդամներ Բաբկեն Թունյանը, Մարիա Կարապետյանը և Միքայել Թումասյանը հանդիպել են Քնեսեթի Իսրայել-Հայաստան բարեկամության խմբի նախագահ Մոսի Ռազի գլխավորած պատվիրակության հետ (25 ապրիլի, 2022թ). Երևան
© Photo : official site of the Parliament of RA
Հակոբ Արշակյանը խոսել է նաև հայ-թուրքական հարաբերությունների կարգավորման գործընթացի մասին:
ԱԺ Հայաստան-Իսրայել բարեկամական խմբի ղեկավար Ծովինար Վարդանյանն էլ երախտագիտություն է հայտնել Քնեսեթի Իսրայել-Հայաստան բարեկամության խմբի անդամներին անմեղ զոհերի հիշատակի օրը Ծիծեռնակաբերդի հուշահամալիր և Ցեղասպանության թանգարան այցելելու համար:
Իսրայել-Հայաստան բարեկամության խմբի նախագահ Մոսի Ռազը նշել է, որ իր առաջին այցը Հայաստան պլանավորել էր հենց ապրիլի 24-ին` 1,5 մլն սպանվածների հիշատակը հարգելու համար:
Կողմերն անդրադարձել են տարբեր ոլորտներում փորձի փոխանակման անհրաժեշտությանը, բարեկամական խմբերի միջև կապերի ակտիվացմանը:
