Միջազգային հանրությունը մեզ ասում էր` իջեցրեք ԼՂ կարգավիճակի հարցում ձեր նշաձողը. Փաշինյան
11:02 13.04.2022 (Թարմացված է: 11:44 13.04.2022)
© AFP 2024 / FRANCOIS WALSCHAERTSՀայաստանի վարչապետ Նիկոլ Փաշինյանը, Եվրոպական խորհրդի նախագահ Շառլ Միշելը և Ադրբեջանի նախագահ Իլհամ Ալիեւը Եվրոպական խորհրդում հանդիպումից առաջ (6 ապրիլի, 2022)․ Բրյուսել
![Հայաստանի վարչապետ Նիկոլ Փաշինյանը, Եվրոպական խորհրդի նախագահ Շառլ Միշելը և Ադրբեջանի նախագահ Իլհամ Ալիեւը Եվրոպական խորհրդում հանդիպումից առաջ (6 ապրիլի, 2022)․ Բրյուսել Հայաստանի վարչապետ Նիկոլ Փաշինյանը, Եվրոպական խորհրդի նախագահ Շառլ Միշելը և Ադրբեջանի նախագահ Իլհամ Ալիեւը Եվրոպական խորհրդում հանդիպումից առաջ (6 ապրիլի, 2022)․ Բրյուսել - Sputnik Արմենիա, 1920, 13.04.2022](https://cdn.am.sputniknews.ru/img/07e6/04/06/40632036_0:0:1601:901_1920x0_80_0_0_3ba0673eebafa28e517bd092f4361803.jpg)
Հայաստանի վարչապետ Նիկոլ Փաշինյանը, Եվրոպական խորհրդի նախագահ Շառլ Միշելը և Ադրբեջանի նախագահ Իլհամ Ալիեւը Եվրոպական խորհրդում հանդիպումից առաջ (6 ապրիլի, 2022)․ Բրյուսել. Արխիվային լուսանկար
© AFP 2024 / FRANCOIS WALSCHAERTS
Բաժանորդագրվել
ՀՀ վարչապետի խոսքով` հակառակ դեպքում միջազգային հանրությունը խնդրում էր իրենց վրա հույս չդնել։
ԵՐԵՎԱՆ, 13 ապրիլի – Sputnik. Միջազգային հանրությունը Հայաստանին ուղիղ ասում էր` մի փոքր իջեցրեք Լեռնային Ղարաբաղի կարգավիճակի հարցում ձեր նշաձողը։ Այս մասին այսօր ԱԺ–ում Կառավարության ծրագրի (2021-2026 թթ.) 2021 թվականի կատարման ընթացքի և արդյունքների զեկույցի ժամանակ հայտարարեց ՀՀ վարչապետ Նիկոլ Փաշինյանը։
«Ես չեմ կարող այս մասին ուղիղ չասել երկրի բարձրագույն օրենսդիր մարմնին ու ժողովրդին։ Այսօր միջազգային հանրությունը մեզ հստակ ասում է` լինել աշխարհի միակ երկիրը, որը երկկողմ մակարդակում չի ճանաչում Թուրքիայի դաշնակից Ադրբեջանի տարածքային ամբողջականությունը, մեծ վտանգ է ոչ միայն Արցախի, այլև Հայաստանի համար։ Միջազգային հանրությունը մեզ ուղիղ ասում էր` մի փոքր իջեցրեք ԼՂ կարգավիճակի հարցում ձեր նշաձողը, և միջազգային մեծ կոնսոլիդացիա կապահովեք Հայաստանի և Արցախի շուրջ։ Հակառակ դեպքում, ասում է միջազգային հանրությունը, խնդրում ենք` մեզ վրա հույս չդնել, ոչ թե այն պատճառով, որ մենք չենք ուզում ձեզ օգնել, այլ այն պատճառով, որ մենք չենք կարող ձեզ օգնել»,– ասաց Փաշինյանը։
Խոսելով Արցախի կարգավիճակի մասին` Փաշինյանը շեշտեց, որ եթե նախկինում ԼՂ կարգավորման հիմքում դրվում էր կարգավիճակը` դրանից բխեցնելով անվտանգության երաշխիքներն ու իրավունքները, ապա այժմ հիմքում դրվում են անվտանգության երաշխիքներն ու իրավունքները` դրանից բխեցնելով կարգավիճակը։
«Մենք արձանագրում ենք, որ կարգավիճակը տվյալ իրադրության մեջ ոչ թե նպատակ է, այլ միջոց` ապահովելու ԼՂ–ի հայության անվտանգությունն ու իրավունքները»,– ասաց Փաշինյանը։
ՀՀ վարչապետը շեշտեց, որ այդ ամենն ասելը հեշտ չէ, բայց եթե ՀՀ ժողովուրդը 44-օրյա պատերազմից հետո իրեն վստահելու որոշմանն է հանգել, այդ ամենն ասելն ու դրա համար պատասխանատվությունը ստանձնելն իր առաքելությունն է, իր լուծը, իր խաչը, որը պիտի տանի։