Հայկական սուզանավեր` Սևանից Սև ծով, կամ լուրջ փորձագետների անլուրջ վերլուծությունները
Սևանա լիճ. Արխիվային լուսանկար
© Sputnik / Aram Nersesyan
Բաժանորդագրվել
Ուկրաինացի փորձագետի` ամենայն լրջությամբ արված հայտարարությունը` Սևանի սուզանավերի ու ավիակիրների մասին, մեծ տարածում է գտել սոցկայքերում` ամենատարբեր քննադատությունների ու սրամիտ կատակների առիթ դառնալով։
ԵՐԵՎԱՆ, 29 մարտի – Sputnik. Պարզվում է Հայաստանը Ռուսաստանին որպես ռազմական օգնություն ատոմային սուզանավեր է ուղարկել ու այն էլ` միանգամից Սևանա լճից։
Հայաստանցի քաղաքական վերլուծաբան Տիգրան Գրիգորյանը Twitter-ում կատակով գրել է. «Բարի լույս ժողովուրդ, բազմաթիվ վստահելի աղբյուրների համաձայն, Հայաստանը որոշել է իր ավիակիրներն ու ատոմային սուզանավերը Սևանից ուղարկել Սև ծով` ՌԴ–ին Ուկրաինայի դեմ պատերազմում օգնելու համար»։
Հայկական հումորի այս դրսևորմանը թերևս չէինք անդրադառնա, եթե այն համացանցում մեծ արձագանքի չարժանանար։
Բանն այն է, որ հայ վերլուծաբանի կատակով արված այս գրառումը միանգամայն լուրջ իր էջում վերահրապարակել է Ուկրաինայի պաշտպանության անկախ հակակոռուպցիոն կոմիտեի գլխավոր քարտուղար, պաշտպանական արդյունաբերության հարցերով փորձագետ Ելենա Տրեգուբը։
This is outrageous indeed. Armenian exceptionalism has reached new heights. It shouldn't be tolerated. pic.twitter.com/Yvheo2A2On
— Tigran Grigoryan (@Tigartsakh) March 29, 2022
Նա ոչ միայն արտատպել է հրապարակումը, այլև միանգամայն լուրջ վերլուծել` գրելով, որ նույնիսկ ՆԱՏՕ–ն, Լեհաստանն ու ԱՄՆ–ն են վախենում Ուկրաինային ռազմական աջակցություն ցույց տալ, մինչդեռ Հայաստանը դա անում է միանգամայն բաց եղանակով ընդդեմ Ուկրաինայի։
Բայց Տիգրան Գրիգորյանն իր կատակը չհասկացած մեկնաբանին անպատասխան չի թողել։ Նա հրապարակել է Տրեգուբի գրառման լուսանկարն` իրեն հղումով ու ավելացրել. «Սա իսկապես զայրացուցիչ է: Հայկական բացառիկությունը նոր բարձունքների է հասել. Չի կարելի դա հանդուրժել։
Այն բանից հետո, երբ ուկրաինացի փորձագետի հայտարարությունը Սևանի սուզանավերի ու ավիակիրների մասին սկսել է տարածվել ոչ միայն Twitter-ում, այլև այլ սոցկայքերում` ամենատարբեր քննադատությունների ու սրամիտ կատակների առիթ դառնալով, Ելենա Տրեգուբն այն հեռացրել է իր էջից։ Բայց, ինչպես ասում են, արդեն ուշ էր` «սքրիշոթն» արված էր։
Հայաստանցի հայտնի մեդիափորձագետ Սամվել Մարտիրոսյանը պաշտպանական արդյունաբերության հարցերով փորձագետին խորհուրդ է տալիս լուրջ բաների մասին դատողություններ անելուց առաջ գոնե Wikipedia կարդալ։
This sarcastic tweet from @Tigartsakh was seriously retweeted with serious concerns by "Head of Defense Anti-Corruption Commission - NAKO, ex Ministry of Economy, expert on Ukraine’s defense industry, Euro-Atlantic integration, defense reform". Finally read Wikipedia dear experts https://t.co/Ku6RmCvSRj
— Kornelij (@Kornelij) March 29, 2022
