Ձվի էժանացման վտանգները. «Լուսակերտն» իր 8000 հավերը բաժանում է գյուղացիներին, որ փակվի
19:14 02.03.2022 (Թարմացված է: 19:18 02.03.2022)
«Լուսակերտը» հավերը բաժանում է գյուղացիներին
© Sputnik / Aram Nersesyan
Բաժանորդագրվել
Թռչնաբուծական ֆաբրիկայի 88 աշխատակիցները չգիտեն, թե ինչ են անելու, եթե ընկերությունը փակվի։ «Լուսակերտը» փակման եզրին է, քանի որ շուկայում դեմպինգ է. ձուն ինքնարժեքից ցածր գնով են այն վաճառում։
ԵՐԵՎԱՆ, 2 մարտի – Sputnik, Կարինե Հարությունյան. «Լուսակերտի» թռչնաբուծական ֆաբրիկայի տարածքը մարդաշատ է. եկել են հավ նվեր ստանալու։ Թռչնաֆաբրիկան փակման եզրին է հայտնվել, և տնօրինությունը որոշել է լավություն անել գյուղացիներին։ Երեկ յուրաքանչյուրին 10 հատ հավ են տվել, իսկ այսօր` 5–ը, որպեսզի նախրորդ օրվա պես իրարանցում չլինի։
«Լուսակերտ» թռչնաֆաբրիկան հավերը բաժանում է գյուղացիներին
© Sputnik / Aram Nersesyan
Մամուլում լուրեր են շրջանառվում, որ ձվի գինը նվազեցրել է «Շիրակի» թռչնաֆաբրիկան («Պրոյեկտ ինտեր-ինվեստ» ընկերությունը), ինչի պատճառով փոքր ընկերությունները փաստի առաջ են կանգնել։
Թռչնաֆաբիկայի տարածքում հավաքված մարդիկ
© Sputnik / Aram Nersesyan
«Ձվի գինն այնքան է իջել, որ մենք սնանկացման ենք գնում, քանի որ ձեռնտու չէ ձու վաճառելը։ Հիմա շուկայում 20 դրամից սկսած ձու են վաճառում, այն դեպքում, երբ ձվի ինքնարժեքը 55 դրամ է։ Շուկայում նոր խաղացողներ են ավելացել, որոնք ուզում են ձվի գինն էժանացնել` ասելով, թե իբր դա ժողովրդի համար է արվում»,–Sputnik Արմենիայի հետ զրույցում ասում է ընկերության սեփականատեր Արմեն Մանուկյանը։
Այս տղամարդն արդեն վերցրել է հավերը և հեռանում է թռչնաֆաբրիկայի տարածքից
© Sputnik / Aram Nersesyan
Նրա խոսքով` առաջին հայացքից, այո, լավ է ժողովրդի համար, որ ձուն էժանացել է, բայց որոշ ժամանակ անց ավելի է թանկանալու, փոքր ընկերությունները փակվելու են, ոլորտում մոնոպոլիա է լինելու, և ձվի գինը 100 դրամից էլ բարձր է լինելու։
Ինչ վերաբերում է հավերը գյուղացիներին նվիրելուն, Մանուկյանը նշում է, որ կերի գինը վերջին շրջանում 20 տոկոսով թանկացել է, և քանի որ ձուն էլ չի վաճառվում, որոշել են գյուղացիներին լավություն անել։
«Ֆինանսական վիճակն այնպիսին է, որ գնում ենք փակման և որոշեցինք մեր հետևից մի լավ հետք թողնել։ 8000 հավ ենք բաժանելու։ Ափսոս էր, որ դրանք վաճառեինք, քանի որ ածան հավեր են։ Գյուղացիներն իրենց օրական ձուն կունենան։ Սակայն սիրտս ցավում է` 88 աշխատող ունենք, նրանք ի՞նչ են անելու։ Մերն էլ ընտանեկան բիզնես է, ամեն ինչին ինքներս ենք հասել»,–ասում է Մանուկյանը։
Ստեղծված իրավիճակում միակ ելքն այն կլինի, որ նախ ձվի համընդհանուր գին որոշվի շուկայում, որը չի լինի ինքնարժեքից ցածր։ Բացի այդ, ըստ Մանուկյանի, հնարավոր կլինի ընկերությունը փրկել ու 88 աշխատակիցներին էլ պահել, եթե ավելի ձեռնտու պայմաններով վարկեր առաջարկեն։
Ընկերության աշխատակիցներից Ռուզաննա Օչինյանն ասում է` այստեղ է աշխատում դեռ այն ժամանակից, երբ ընկերությունը չէր սեփականաշնորհվել. նա 38 տարվա աշխատող է, ձու է տեսակավորում։
Ռուզաննա Օչինյան
© Sputnik / Aram Nersesyan
«Ուզում ենք` պետությունը մի փոքր աջակցի, կարողանանք աշխատել, սոված չնստենք մեր տներում։ Ամուսինս թոշակառու է, տղաս` անչափահաս, և միայն ես եմ տանն աշխատում։ Հիմա եթե մեր ընկերությունը փակվի, անգործ մնամ, սոված ենք մնալու։ 88 ընտանիք անգործ ու սոված է մնալու, ինչ ասեմ։ Կարծում եմ` հենց նման դեպքերում պետությունը պետք է մեր կողքին լինի»,–ասում է տիկին Ռուզաննան։
Ոլորտում երկար տարիների փորձ ունեցող կինը հիշում է` 2010-ին էլ էր նման իրավիճակ, երբ կրկին ձվի շուկայում դեմպինգ եղավ, գինը կտրուկ իջավ և մի շարք ընկերություններ փակվեցին, իսկ դեմպինգ անողն «ապրեց»։
Ընկերության մեկ այլ աշխատակից էլ` Նազենի Մուկայելյանը, նշում է, որ 15 տարի է, ինչ աշխատում է այստեղ և հիմա անգործ մնալու մտավախություն ունի։
Նազենի Մուկայելյան
© Sputnik / Aram Nersesyan
«Ես 60 տարեկան եմ, և իմ տարիքում մեր երկրում գործ գտնելը հեշտ չէ։ Դրանից բացի, մեր ընկերությունն է ափսոս, այսքան տարիներ աշխատել ենք, որ մի ընկերություն գա, գինը նվազեցնի ու մյուսներից ոլորտից հանի՞։ Պետությունը պետք է մեր մասին մտածի. նոր գործարան են բացում, որ աշխատատեղ լինի, մենք էլ թողնում ենք, որ եղածը փակվի»,–ասում է տիկին Նազենին։
Տիկին Սեդան Աբովյանից է եկել Նոր Գեղի, որպեսզի անվճար հավեր վերցնի։ Կինն ասում է, որ 20 հավ ունեն, ևս 5-ը կտանի, և գոնե վստահ կլինեն, որ ամեն օր ուտելու բան կա։
Տիկին Սեդան
© Sputnik / Aram Nersesyan
«Մենք անապահով ընտանիք ենք, և սա փրկություն էր մեզ համար, քանի որ 3-4 ձու ավել եմ ունենալու։ Բայց լավ չի, որ ընկերությունը փակվում է, քանի որ լիքը մարդ անգործ է մնալու։ Հիմա եթե ես գործ ունենայի, չէի գա, վիզս ծուռ կանգնեի, որ անվճար հավ տան ինձ։ Մեր պետությունը գնալով անկում է ապրում, փոխարենը առաջ գնա»,–ասում է նա։
Մրցակցության պաշտպանության հանձնաժողովի մամուլի քարտուղար Անի Սմբատյանը Sputnik Արմենիային հայտնեց` «Պրոյեկտ ինտեր-ինվեստ» ընկերությունը չէր կարող մրցակցության օրենսդրություն խախտել և դեմպինգ իրականացնել:
Թռչնաֆաբրիկայի աշխատակիցները
© Sputnik / Aram Nersesyan
Նրա խոսքով` շուկայում դեմպինգ կարող է իրականացնել գերիշխող դիրք ունեցող ընկերությունը, իսկ մրցակցության պաշտպանության հանձնաժողովը դեմպինգի հարցը կարող է դիտարկել այն պարագայում, երբ այն իրականացրել է այդպիսի ընկերությունը։
«Ապրանքային շուկայում տնտեսավարող սուբյեկտը համարվում է գերիշխող դիրք ունեցող, եթե նրա իրացման ծավալները կազմում են շուկայի 33,3%–ը և ավելին: «Պրոյեկտ ինտեր-ինվեստ» ՍՊԸ-ի` շուկայում ունեցած մասնաբաժինը չի գերազանցում 5%-ը»,–ասաց Սմբատյանը։
Հիշեցնենք, որ Sputnik Արմենիան անդրադարձել էր ձվի շուկայում կտրուկ գնանկման խնդրին. մեկ այլ ընկերության` «Արամուս» թռչնաֆաբրիկայի տնօրեն Հրայր Ասլանյանն էլ իր հերթին հայտնել էր` եթե այսպես շարունակվի, ձվի արկղերով փակելու են փողոցները և բողոքի ակցիաներ են անելու։
