https://arm.sputniknews.ru/20211128/atshvogh-grichnery-tanaqn-avartveluc-hetvo-grichy-canum-ev-bvoghk-bazuk-kam-rehan-en-stanum-35787009.html

Աճող գրիչները. թանաքն ավարտվելուց հետո գրիչը ցանում և բողկ, բազուկ կամ ռեհան են ստանում

Աճող գրիչները. թանաքն ավարտվելուց հետո գրիչը ցանում և բողկ, բազուկ կամ ռեհան են ստանում

Sputnik Արմենիա

Հայկական շուկայում աճող գրիչներ են հայտնվել, որոնք ցանելուց հետո բանջարեղեն կամ կանաչեղեն կարող եք ունենալ։ Գրիչներն, ի դեպ, վերամշակված թղթից են պատրաստվում։ 28.11.2021, Sputnik Արմենիա

2021-11-28T20:30+0400

2021-11-28T20:30+0400

2021-12-01T17:28+0400

գրիչ

հայաստան

երեխա

աշխատանք

աշակերտ

էկոլոգիա

eco pen ընկերություն

https://cdn.am.sputniknews.ru/img/07e5/0b/1a/35773702_0:27:1600:927_1920x0_80_0_0_34ceee12f21563612bdd28849214929f.jpg

ԵՐԵՎԱՆ, 26 նոյեմբերի – Sputnik. Գազար, բազուկ, ռեհան, բամիա, քինուա, մանանեխ, բողկ, սպանախ և էլի շատ բուսատեսակներ ու բանջարեղեններ կարող ես ունենալ` թանաքը վերջանալուց հետո էկո գրիչները «ցանելով»։ Այո, այո, շատ ճիշտ եք կարդում` գրիչները հողի մեջ տնկելով` կարող ես նման տեսականի ստանալ։«Մենք արդեն 7 տարի է, ինչ էկո գրիչներ ենք արտադրում և մտածում էինք ինչ–որ հետաքրքիր բան ստեղծել, որն ավելի կմոտեցնի բնությանը։ Որոշեցինք աճող գրիչներ արտադրել, որ գրիչն ավարտվելուց հետո էլ այն բնությանը ծառայի։ Սկսեցինք փորձարկումներ անել ու սերմեր ընտրել»,–պատմում է Eco pen-ի հիմնադիր տնօրեն Արտակ Էլբակյանը։Հայկական շուկայից սերմերն ընտրելուց հետո դրանք թափանցիկ պարկուճով տեղադրել են գրիչների վրա և հողի մեջ տնկել։ Օրեր անց դրանք առաջին ծիլերն են տվել. փորձարկումը հաջող անցնելուց հետո աճող գրիչների արտադրություն են սկսել։ Էլբակյանը պատմում է, որ դժվար է եղել դրա շուկայական գինը որոշելը, քանի որ համեմատելու ոչինչ չկար. շուկայում նման արտադրանք չկա։Նրա խոսքով` հետաքրքրությունն աճող գրիչների հանդեպ մեծ է, և դրանք հատկապես որպես նվեր են գնում։ Իսկ որևէ բույս կամ բանջարեղեն ստանալու համար անհրաժեշտ է թանաքը վերջանալուց հետո 30 աստիճան թեքությամբ սերմի հատվածը հողի ներսում դնել։ Պարկուճը ներծծվում է հողի մեջ. սերմը ծլելու համար առանձնահատուկ խնամք չի պահանջվի` միայն թե ամեն օր մի փոքր ջրել է պետք։Բացի այդ, նա ուզում է երեխաները խնայել սովորեն` եթե բնությունից ինչ–որ բան ես վերցրել, օրինակ` թուղթ, գրիչ սարքելու համար, սերմը ցանելով` ինչ–որ բան հետ ես վերադարձնում բնությանը։Ի դեպ. օրինակ` բողկն ու բազուկը մի քանի օրվա ընթացքում են ծիլեր տալիս և շատ գեղեցիկ տեսք ունեն։Արտակ Էլբակյանի քույրը` ընկերության աշխատակից Անի Էլբակյանն էլ նշում է, որ աճող գրիչները, ի տարբերություն սովորական գրիչների, նվազագույն վնաս են հասցնում շրջակա միջավայրին, քանի որ պլաստիկի թափոնը քիչ է լինում։Անին ասում է, որ երեխաները շատ են ուրախանում, երբ տեսնում են, թե ինչպես է իրենց ցանածը սկսում ծիլ տալ։Նա հավելեց, որ առաջիկայում ուզում են էկզոտիկ սերմեր ներկրել, սակայն դրանք դեռ պետք է փորձարկեն` տեսնելու, թե տնային պայմաններում և ոչ առանձնահատուկ խնամքի դեպքում արդյո՞ք կաճեն։Բացի այդ, ընկերությունն ուզում է թանգարան հիմնել` բոլոր էկո գրիչներն այնտեղ ներկայացված կլինեն և երեխաները հնարավորություն կունենան իրենց ձեռքով ցանել ինչ–որ բան։ Սա, ըստ Անիի, նաև զբոսաշրջիկների համար շատ հետաքրքիր կլինի։Ի դեպ, երբեմն աճող գրիչներ գնելիս խնդրում են չասել, թե ինչ սերմ է գրիչի ծայրին դրված, որպեսզի անակնկալ լինի։ Բնությանը մոտ մարդիկ ծիլի տեսքից հասկանում են, թե ինչ է այն դառնալու, սակայն լինում են դեպքեր, երբ զանգում են ընկերություն և նկարագրում ծիլը` իմանալու համար, թե ինչ է այն։Հավելենք, որ գրիչների ստեղծման աշխատանքի հիմնական մասը ձեռքով է արվում, ավելի ճիշտ` տպագրությունից հետո մնացած ողջ մասն է ձեռքով արվում։ Eco pen–ում մեկ օրվա ընթացքում 30 հատ գրիչ են պատրաստում։

2021

Լուրեր

am_HY

գրիչ, հայաստան, երեխա, աշխատանք, աշակերտ, էկոլոգիա, eco pen ընկերություն