https://arm.sputniknews.ru/20211003/hajkakan-khvorhrdanishneri-bacarik-ev-hin-cucanmushner-gjumrium-nvor-tangaran-bacvec-33889143.html

Հայկական խորհրդանիշների բացառիկ և հին ցուցանմուշներ. Գյումրիում նոր թանգարան բացվեց

Հայկական խորհրդանիշների բացառիկ և հին ցուցանմուշներ. Գյումրիում նոր թանգարան բացվեց

Sputnik Արմենիա

Թեև թանգարանը մասնավոր է, սակայն բոլոր այցելուների համար կգործի անվճար: 03.10.2021, Sputnik Արմենիա

2021-10-03T16:49+0400

2021-10-03T16:49+0400

2021-10-03T16:49+0400

գյումրի

թանգարան

խորհրդանիշ

հայկ դեմոյան

https://cdn.am.sputniknews.ru/img/07e5/0a/03/33888036_0:107:1600:1007_1920x0_80_0_0_467dcd238a51e10dbdee50158ee7ee4e.jpg

ԵՐԵՎԱՆ, 3 հոկտեմբերի – Sputnik, Արմենուհի Մխոյան. Գյումրու կենտրոնում` 1887 թ-ին կառուցված ալեքսանդրապոլյան շենքերից մեկում, երկու տարի տևած վերականգնողական աշխատանքներից հետո այսօր բացվեց «Հայկական ազգային խորհրդանիշների» թանգարանը:«Հայկական ազգային խորհրդանշանների» թանգարանում ցուցադրված են հայկական զինանշանային համակարգի նմուշներ, հայկական պետական ու ազգային խորհրդանշաններին առնչվող եզակի ցուցանմուշներ՝ փորագրանկարներ, պաստառներ, բացիկներ և այլն։ Դրանք հիմնականում ներկայացնում են եվրոպական և ռուսական պատկերագրության մեջ հայկական արքայական ընտանիքներին վերաբերող բացառիկ նյութեր, տարբեր հրատարակությունների կազմերին հայկական զինանշանների ու դրոշների նկարազարդումներ։Թանգարանի ցուցադրությունը պարբերաբար համալրվելու է նորանոր նյութերով։ Թեև այն մասնավոր է, սակայն բոլոր այցելուների համար կգործի անվճար:Թանգարանի նախաձեռնող ու սեփականատեր, պատմաբան Հայկ Դեմոյանը Sputnik Արմենիայի հետ զրույցում նշեց, որ բոլոր ցուցանմուշներն իր անձնական հավաքածուից են: «Տարիներ շարունակ ես տարբեր աճուրդներից ձեռք եմ բերել այս ցուցանմուշները: Վստահ եմ, որ ցուցանմուշները պարբերաբար հարստացվելու ու լրացվելու են »,-ասաց նա` տեղեկացնելով, որ միակ ցուցանմուշը, որն իր հավաքածուից չէ և հատուկ Գյումրիում ցուցադրվելու համար բերված է Լոս Անջելեսի «Արարատ-Էսքիջյան» թանգարանից՝ շուրջ 230 տարվա պատմություն ունեցող բացառիկ մետաքսյա սփռոցն է՝ հայկական զինանշանով ու առասպելական կերպարներով:Թանգարանի ոչ միայն ցուցանմուշներն են հետաքրքիր ու արժեքավոր, այլ նաև հենց շինությունը։ 19-րդ դարում կառուցված տունը գտնվում է Ալեքսանդրապոլի նախկին հունական (ուռումնոց) թաղամասում, այն մեծահարուստ Մալխասովների սեփականությունն է հանդիսացել: Թանգարանը տեղակայվել է տան նկուղային հատվածում, որտեղ ամեն ինչ՝ կահ կարասիով, հիշեցնում է ալեքսանդրապոլյան ժամանակաշրջանը:Ի դեպ, ցուցադրության բացման օրն իսկ թանգարանը համալրվեց նոր ցուցանմուշով. այն որպես նվեր ստացավ 19-րդ դարի Ալեքսանդրապոլում հայտնի դերձակ «Ֆանտազի Արտաշի» արդուկը:Հայկական ազգային խորհրդանշանների թանգարանի բացումը նվիրված է Հայաստանի Հանրապետության 30-րդ տարեդարձին։ Թանգարանը բաց է լինելու ուրբաթ, շաբաթ և կիրակի օրերին՝ առանց մուտքավճարի:

գյումրի

2021

Լուրեր

am_HY

գյումրի, թանգարան, խորհրդանիշ, հայկ դեմոյան