ԵՐԵՎԱՆ, 30 հուլիսի - Sputnik. ԱԺ պաշտպանության և անվտանգության հարցերի հանձնաժողովի արտահերթ նիստում հանձնաժողովի անդամ Արմեն Խաչատրյանը ՀՀ կառավարությանն առաջարկ ներկայացրեց, որպեսզի մի նախագիծ մշակեն, ընդունեն, որով սահմանամերձ բնակավայրերի համայնքի ղեկավարները, պետական պաշտոնյաները չեն կարողանա լրատվամիջոցներին տեղեկատվություն տրամադրել սահմանում տիրող իրավիճակի հետ կապված։
«Կարելի է օրենսդրական կարգավորման դաշտ բերել հարցը, որ պետական պաշտոնյաներն իրավունք չունեն տեղեկատվություն տարածել սահմանների վերաբերյալ ոչ այլ կերպ, քան ինչ–որ կարգով։ Ամեն անգամ, օրինակ` Սյունիքի մարզից տեղեկություններ են ստացվում, որ այսօր ահա, ադրբեջանցիք մտան, դուրս եկան, չգիտեմ ինչ արին, տարան, բերեցին և այլն։ Հասկանալի է, որ տեղեկատվությունը հնարավորինս շատ պետք է տրամադրվի մեր քաղաքացիներին, սակայն պետք է ֆիլտրվի, որևէ կերպ մոնիտորինգ արվի այս ուղղությամբ, թե արդյոք դա պետական գաղտնիք պարունակում է, թե ոչ»,–ասաց նա։
Պաշտպանության ու անվտանգության հարցերի մշտական հանձնաժողովի նախագահ Անդրանիկ Քոչարյանն էլ արձագանքեց, որ խնդիրը պետական գաղտնիքի եզրույթի մեջ է, եթե դա գտնեն ու կարգավորեն, Խաչատրյանի բարձրացրած հարցերը ապագայում կգտնի իր լուծումները։
Խաչատրյանը, շարունակելով խոսքը, դիմեց նիստին ներկա կառավարության ներկայացուցչին։
«Կառավարության ներկայացուցչին առաջարկում եմ այս ուղղությամբ, եթե հնարավոր է նախագիծ ներկայացնել կամ համատեղ ջանքերով ինչ-որ մի բան ներկայացնենք, որ այս խնդիրն էլ փակենք»,–ասաց նա։
Հիշեցնենք` հուլիսի 28-ին ադրբեջանական ԶՈւ ստորաբաժանումները հերթական անգամ դիմել էին սադրանքի և խախտել հրադադարը հայ-ադրբեջանական սահմանի հյուսիսարևելյան հատվածում: Հայաստանն ու Ադրբեջանը համաձայնել էին Մոսկվայի միջնորդությամբ դադարեցնել կրակը։
Ադրբեջանական ստորաբաժանումները, տալով կորուստներ, հետ են շպրտվել. ՊՆ
Հայկական կողմն ունի երեք զոհ, հինգ վիրավոր։
Հուլիսի 29-ին` ժամը 03:00-ի սահմանում, հայ-ադրբեջանական սահմանի Գեղարքունիքի հատվածում, Քարվաճառի ուղղությամբ ադրբեջանական ԶՈւ ստորաբաժանումները, խախտելով նախորդ օրը ձեռք բերված` կրակի դադարեցման վերաբերյալ պայմանավորվածությունը, կրկին դիմել էին սադրանքի ու կրակ բացել հայկական դիրքերի ուղղությամբ։
Հայ-ադրբեջանական սահմանի Գեղարքունիքի հատվածում արձանագրվել են ԱԹՍ-ների՝ ՀՀ օդային տարած մուտք գործելու փորձեր։
Այսօր` հուլիսի 30–ին, Խոցվել է Ադրբեջանի ԶՈւ սպառազինության մեջ գտնվող «Aerostar» տիպի ԱԹՍ, որի բեկորներն ընկել են Գեղարքունիքի մարզի Վանեվան գյուղից 3.5 կիլոմետր դեպի հյուսիս։
