ԵՐԵՎԱՆ, 30 հուլիսի - Sputnik. Շվեդիայի արտաքին գործերի նախարար, ԵԱՀԿ գործող նախագահ Անն Լինդեն Twitter–ի իր էջում գրառում է կատարել` կապված հայ-ադրբեջանական սահմանին կատարվող իրադարձությունների հետ։
«Հայ-ադրբեջանական սահմանին բազմաթիվ միջադեպերի մասին հաղորդագրությունները լուրջ մտահոգություն են առաջացնում։ Կոչ ենք անում կողմերին` հենվել վերջերս տեղի ունեցած մարդասիրական քայլերի վրա և ամբողջությամբ կատարել նոյեմբերի 9-ի հայտարարության պահանջները՝ չլուծված հարցերին խաղաղ լուծում տալու համար»,–ասել է նա։
Reports of repeated incidents along Armenia-Azerbaijan border causes grave concern. Urge sides to build on recent humanitarian steps & implement 9 Nov statement in full to address unresolved issues peacefully. #SWEOSCE2021
— Ann Linde (@AnnLinde) July 29, 2021
Նշենք, որ երեկ` հուլիսի 29–ին, ԵԱՀԿ Մինսկի խմբի համանախագահները կոչ էին արել Հայաստանին և Ադրբեջանին անհապաղ նվազեցնել լարվածությունը, ձեռնպահ մնալ սադրիչ հռետորաբանությունից և գործողություններից, ամբողջությամբ կատարել իրենց պարտավորությունները նոյեմբերի 9-ի հայտարարության և հրադադարի մասին այլ պայմանավորվածությունների համաձայն:
Նման կոչ էր արել նաև Գերմանիան և Ֆրանսիան` հորդորելով կողմերին վերսկսել քաղաքական գործընթացները։
Հիշեցնենք` հուլիսի 28-ին ադրբեջանական ԶՈւ ստորաբաժանումները հերթական անգամ դիմել էին սադրանքի և խախտել հրադադարը հայ-ադրբեջանական սահմանի հյուսիսարևելյան հատվածում: Հայաստանն ու Ադրբեջանը համաձայնել էին Մոսկվայի միջնորդությամբ դադարեցնել կրակը։
Ադրբեջանական ստորաբաժանումները, տալով կորուստներ, հետ են շպրտվել. ՊՆ
Հայկական կողմն ունի երեք զոհ, հինգ վիրավոր։
Հուլիսի 29-ին` ժամը 03:00-ի սահմանում, հայ-ադրբեջանական սահմանի Գեղարքունիքի հատվածում, Քարվաճառի ուղղությամբ ադրբեջանական ԶՈւ ստորաբաժանումները, խախտելով նախորդ օրը ձեռք բերված` կրակի դադարեցման վերաբերյալ պայմանավորվածությունը, կրկին դիմել էին սադրանքի ու կրակ բացել հայկական դիրքերի ուղղությամբ։
Հայ-ադրբեջանական սահմանի Գեղարքունիքի հատվածում արձանագրվել են ԱԹՍ-ների՝ ՀՀ օդային տարած մուտք գործելու փորձեր։
Այսօր` հուլիսի 30–ին, Խոցվել է Ադրբեջանի ԶՈւ սպառազինության մեջ գտնվող «Aerostar» տիպի ԱԹՍ, որի բեկորներն ընկել են Գեղարքունիքի մարզի Վանեվան գյուղից 3.5 կիլոմետր դեպի հյուսիս։
