ԵՐԵՎԱՆ, 29 հուլիսի – Sputnik. Երևանի ավագանին արտահերթ նիստ է գումարել, որի օրակարգում երկու հարց է։ Մեկը վերաբերում է քաղաքապետարանի և վարչական շրջանների շուրջ 2000 աշխատակցի աշխատավարձի ավելացմանը, որն արդեն մի քանի օր է, ինչ բուռն քննարկվում է տարբեր հարթակներում։
Նախագծի քննարկման ընթացքում ելույթ ունեցավ ավագանու «Լույս» խմբակցության անդամ Անի Խաչատրյանը:
Նա կարծիք հայտնեց, որ Երևանի ավագանու իշխող խմբակցության կողմից այս փուլում նման նախագիծն օրակարգ բերելը ամենևին էլ զուգադիպություն չէ Ազգային ժողովի պատգամավորների աշխատավարձերի բարձրացման ֆոնին:
«Ես խիստ կասկածներ ունեմ, որ սա քաղական որոշում է, և իշխող կուսակցությունն ուզում է իր իշխանության աշխատակիցներին, պատգամավորներին բարձր աշխատավարձ տալ։ Այս նախագիծն այս պատերազմական շրջանում այսքան հրատապ արտահերթ նիստով բերելու նախագիծ չէր, որովհետև աշխատակիցները 1-2 տարուց ավել սպասում են այդ բարձրացմանը և այս մեկ ամիսն էլ կսպասեին, որ նախագիծը գար հաջորդ հերթական նիստ։ Այս իրավիճակում նման նախագիծ բերելը մեղմ ասած բարոյական չէ: Թաղապետի 400 հազարանոց աշխատավարձը դառնում է 800 հազար, ո՞ր արժանիքի համար»,-հարցրեց Խաչատրյանը:
Երևանի ավագանու «Իմ քայլը» խմբակցության անդամ Լևոն Հովհաննիսյանը, որը նաև նախագծի հեղինակն է, պատասխանեց, որ իրենց քաղաքական թիմի աշխատավարձերը համեմատելով պատգամավորների աշխատավարձերի բարձրացման հետ Անի Խաչատրյանը խեղաթյուրում է փաստերը:
«Տիկին Խաչատրյան, դուք խեղաթյուրում եք փաստեր, որովհետև քաղաքական թիմի աշխատավարձերը չեն բարձրանալու»,–ասաց Հովհաննիսյանը։
Երևանյան հնագույն քարայրը. ինչպես Հրազդանի ձորը դարձնել զբոսաշրջության կենտրոն
Խաչատրյանն էլ նկատեց՝ մի՞թե մի շարք վարչական շրջանների ղեկավարներ ու քաղաքապետարանի աշխատակիցներ իշխող կուսակցության անդամ չեն:
Հովհաննիսյանն էլ իր հերթին նշեց, որ «Լույս» դաշինքը, որը հիմա իր համար պարզ չէ, թե ինչ ֆորմատի մեջ է, 2019 թվականին հանրային տեսքով առաջարկեց, որ քաղաքապետարանի աշխատակիցների աշխատավարձը բարձրանա 30 տոկոսով, նաև միշտ կողմ է քվեարկել բյուջեի հաստատմանը, որի մեջ նաև պարգևավճարներն են ներառվել։ Հովհաննիսյանի արտահայտությունը զայրացրեց Խաչատրյանին, վերջինս արձագանքեց.
«Շատ սխալ գիտեք, «Լույս» դաշինքը երբեք բյուջեի նախագծերին կողմ չի քվեարկել։ Ինչ վերաբերում է մեր խմբակցության ֆորմատին, ասեմ` նույնն է, ինչ ձերը` «Իմ քայլը» դաշինք գոյություն չունի, մնացել ենք անտեր, ձեզ նման նույն կարգավիճակում ենք»,–ասաց նա։
Վերջում Անի Խաչատրյանը նշեց, որ նախագծին կողմ է քվեարկելու, որպեսզի բարձրանա մաքրուհիների, քաղաքապետարանի սովորական աշխատողների աշխատավարձերը, բայց ոչ նրա համար, որ ուռչեն իշխող թիմի գրպանները:
Երևանի հասարարական տրանսպորտում կարող են COVID-ը սպանող սարքեր հայտնվել
