ԵՐԵՎԱՆ, 27 հուլիսի – Sputnik. Բժիշկ-թերապևտ Սվետլանա Մարտինովան «Доктор Питер»–ին տված հարցազրույցում ասել է, որ ոտքերի գիշերային ցավերը, դողը կարող են ֆիզիկական ծանրաբեռնվածության, բարձրակրունկներով զբոսնելու, օրգանիզմում հեղուկի պակասի հետևանք լինել, ցավերի պատճառ կարող են դառնալ նաև հիվանդությունները։
Բժիշկը բացատրել է, որ որոշ դեպքերում ոտքերի գիշերային ցավերից ազատվելու համար կարելի է պարզապես ավելի շատ ջուր կամ կանաչ թեյ խմել։
«Ոտքերի դող կարող է առաջանալ, օրինակ, շաքարային դիաբետի, սիրտ-անոթային համակարգի հիվանդությունների, ռևմատիզմի դեպքում։ Երբ ոտքերի ցավը, դողն անընդհատ կրկնվում են, անհրաժեշտ է դիմել թերապևտի, նա կասի, թե ինչ անալիզներ է անհրաժեշտ տալ, ինչպես նաև պետք է խորհրդակցել նյարդաբանի ու էնդոկրինոլոգի հետ»,– ասել է Մարտինովան։
Արևայրուքն օգտակար է ոչ բոլորին. բժիշկը` հակացուցումների մասին
Նրա խոսքով` ոտքերի ցավերն ավելի հաճախ անհանգստացնում են կանանց, քան տղամարդկանց: Դա պայմանավորված է նաև այն հանգամանքով, որ կանայք հաճախ են ոչ հարմարավետ կոշիկ հագնում, օրինակ` բարձրակրունկներ։ Բացի այդ, կանանց շրջանում տարածված հիվանդությունները (վարիկոզ, թրոմբոֆլեբիտ, ֆլեբիտ) բարդացնում են արյան անհրաժեշտ արտահոսքը վերջույթներ։
Ռիսկի խմբում են նաև տարեցները։ Բժշկի խոսքով` երեխաներ ոտքերի ցավեր սովորաբար չեն ունենում, իսկ եթե նման խնդիր է առաջանում, ապա դրա առաջացման հավանական պատճառը կարող է լինել երեխայի բարձր ջերմությունը։
