ԵՐԵՎԱՆ, 23 հուլիսի - Sputnik. Աշխատանքային այցով Ճապոնիայում գտնվող ՀՀ նախագահ Արմեն Սարգսյանն այսօր Տոկիոյում այցելել է ճապոնացի հայտնի գործարար և բարերար, հայ ժողովրդի բարեկամ Շիբուսավա Էիչի հուշահամալիր-հիմնադրամ: Տեղեկությունը հայտնում է նախագահի մամուլի ծառայությունը։
Էիչի Շիբուսավան 1922 թվականին Տոկիոյում ստեղծել է բարեգործական «Հայ օգնության հիմնադրամը», որը զգալի օգնություն է ցուցաբերել ցեղասպանությունից մազապուրծ եղած հայերին: Հիմնադրամի ստեղծման գործում դերակատարություն է ունեցել նաև Օսմանյան կայսրությունում ԱՄՆ դեսպան Հենրի Մորգենթաուն:
Սարգսյանը Շիբուսավա Էիչի հուշահամալիր-հիմնադրամում հանդիպում է ունեցել տնօրեն Ջունեցու Կոմացուի և Էիչի Շիբուսավայի ծոռան՝ Մասահիդե Շիբուսավայի հետ:ՀՀ նախագահը հայ ժողովրդի և իր անունից երախտագիտություն է հայտնել ժամանակին Էիչի Շիբուսավայի և նրա հիմնադրամի կողմից հայ ժողովրդին ցուցաբերած անգնահատելի աջակցության համար։ Նա շեշտել է, որ Ճապոնիան օրինակ է մեզ համար։
«Դուք ևս որպես ազգ դժվարին ժամանակներ եք ապրել, ունեցել եք կորուստներ, երբեմն մտածել եք, որ ամեն ինչ կորցրել եք, իսկ հետո վերականգնվել եք և կառուցել եք ձեր հայրենիքը: Հուսով եմ՝ նոր էջ կսկսենք հայ-ճապոնական հարաբերություններում, որը կենտրոնացած կլինի ապագայի, նոր տեխնոլոգիաների, նոր ուղիների վրա: Հենց այս առաքելությամբ եմ ես այստեղ»,- նշել է նախագահը։
Սարգսյանը Մասահիդե Շիբուսավային է հանձնել Հայոց ցեղասպանության թանգարան-ինստիտուտի «Հենրի Մորգենթաու» հուշամեդալը: Նախագահը շեշտել է՝ Շիբուսավա Էիչիի շնորհիվ փրկվեցին մեծ թվով հայեր:
«Եվ այստեղ խոսքը միայն կյանքեր փրկելու մասին չէ: Ամենակարևորն այն է, որ ժողովուրդը վերապրում ու վերածնվում է, եթե ունի հույս: Կարևոր չէ, թե այսօր որքան ծանր վիճակում ես, եթե կա հույս, կարող ես վերապրել, եթե կա հույս, կարող ես վերակառուցել, եթե կա հույս, կարող ես շարունակել քո կյանքը: Հույս կունենաս, եթե ուժեղ ես, հույս կունենաս, եթե ունես ընկերներ՝ ինչպես 1915 թվականին՝ Ցեղասպանությունից հետո: Մենք ունեինք ընկերներ, և նրանցից մեկը դեսպան Մորգենթաուն էր, իսկ մյուսը՝ Ձեր մեծ պապը»,- ընդգծել է նախագահը։
Արմեն Սարգսյանը խոսել է հայ-ճապոնական տնտեսական հարաբերությունների սերտացման ու զարգացման, Ճապոնիայի ակտիվ օժանդակությամբ Հայաստանի տնտեսական վերածննդի մասին։
ՀՀ նախագահն ու հիմնադրամի տնօրենը քննարկել են ինչպես գործարար, այնպես էլ հումանիտար ոլորտներում փոխգործակցության ակտիվացման հեռանկարները, խոսել համատեղ ծրագրեր իրականացնելու ուղղությունների մասին: Սարգսյանը հիմնադրամի տնօրեն Ջունեցու Կոմացուին և Մասահիդե Շիբուսավային հրավիրել է Հայաստան:
Հավելենք, որ Շիբուսավա Էիչին համարվել է ժամանակի ամենաազդեցիկ գործիչը, «Ճապոնական կապիտալիզմի հայրը», եղել է Ճապոնիայում առաջին ժամանակակից բանկի, ինչպես նաև Ճապոնիայի Առևտրի և արդյունաբերության պալատի հիմնադիրը: Նա ներգրավված է եղել մոտ 500 ձեռնարկությունների ու տնտեսական կազմակերպությունների ստեղծման, ինչպես նաև սոցիալական ապահովության, կրթական կազմակերպությունների հիմնադրման գործում: Նրա դիմանկարը 2024 թվականից լինելու է ¥ 10000 թղթադրամի վրա:
Հիշեցնենք` Արմեն Սարգսյանի այցի շրջանակում հանդիպում է նախատեսվում Ճապոնիայի վարչապետ Սուգա Յոշիհիդեի հետ։
ՀՀ նախագահը հանդիպումներ կունենա նաև տեխնոլոգիական մի շարք հայտնի ընկերությունների ղեկավարների և գործարարների հետ` հայ-ճապոնական փոխգործակցության հնարավորությունները քննարկելու նպատակով, ինչպես նաև կայցելի գիտակրթական հաստատություններ:
